Текстэз гожтӥз Светлана Едыгарова, туспуктӥз Любовь Архангельская.

Яратоно удмурт пиосмурт, эн кошкы! Мон уг тодӥськы, кызьы тон быгатод, но эн кошкы!

Яратоно пересь ӵужатае,

Яратоно ӵужатае,

Яратоно папае,

Яратоно ӵужмуртэ, дядяе,

Яратоно братэ,

Яратоно картэ,

Яратоно пие,

Яратоно эше,

Эн кошкы.

Пересь ӵужатайме, корказэ-ваньбурзэ таласа, Сибыре келязы.

Ӵужатае, бадӟым ожысь бертыса, вӧсьлы чидатэк, кулӥз.

Эшелэн ӵужмуртэз, Афганистанысь бертыса, пыраклы ӧлексы кылиз.

Папае ужзэ ыштӥз.

Братэ Чечняын быриз.

Табере пиосты Украинае, пе, келялом.

Вань пиосмурт выжымес быдтыны малпаллям лэся.

Жади пиосмуртъёстэк улыны, ӧй дышы пиосмуртэн улыны, уг тодӥськы, кызьы пиосмуртэз яратыны. Уг валаськы, кызьы пиосме будэтыны. Тонтэк мон уродгес луисько, “баба с яйцами” луисько. Уг поты ни озьы улэме.

Удмурт пиосмурт, мыным герой ӧвӧл кулэ, мыным тон кулэ, татын бордам. Мыным ӵужатай кулэ, мыным папа кулэ, мыным брат кулэ, мыным эше кулэ, мыным пие кулэ. Татын бордам. Эн кошкы.

Удмурт пиосмурт, тонэ весь раскулачивать каро, репрессировать каро, войнаосы ысто, ульчаын жуго, пумит луэмдэ возьматӥськод ке, тюрмае пукто яке ужысь палгыто. Сю арлэсь кема озьы улӥськод ини тон, атаед, песятаед, пересь песятаед… Табере мон валасько, малы тон сомында вина юиськод. Валасько, малы куддыръя семьядэ вӧсь кариськод но ултӥяськод, палэнэ калгиськод, куштыса кельтӥськод.

Табере валасько, малы атай луыны лад-лад ӧд дышы, малы семьядэ, пиналъёстэ куштӥд. Ачид атайтэк будӥд яке юись атаен будӥд яке травмированной атаен будӥд. Табере уд тодӥськы, кызьы атай но карт луыны.

Удмурт пиосмурт, ми ӧм вуэ дышетскыны ог-огмес яратыны. Милемыз весь вождьёсты, абстрактной идеяосты яратыны ӧтё, нош кызьы ми дышом ог-огмес яратыны?!

Удмурт пиосмурт, эн кошы. Тон мыным туж кулэ. Тужгес но али. Мон яратӥсько тонэ.

Уг валаськы, кызьы уд кошкы, но мон туж оскисько тыныд, багатод кыльыны но эрико улыны. Ӵошен эрико уломы ог-огмес яратыса но пиналъёсмылы пример возьматыса.

Нош мон кыл сётӥсько, ӧжытгес йыркуръясько тыныд, ӧжытгес нукырто, тросгес ӟыгыръяло но чупало, ярато тонэ сыӵеен кыӵе тон вань.

Эн гинэ кошкы.

Тонэ яратыса,

пиедлэн нылызлэн нылыз

нылыдлэн нылыз

нылыд

сестраед

кышноед

мамаед