Кӧшкемыт дыръёсы улӥськом, эшъёс. Малпасько, тае котькин шӧдэ, но валаны шуг, кыӵе зэмос югдур, кудпала улон воштӥське, туж трос ог-огезлы пумит луись информация. Тросэзлэн адямиослэн мылкыдзы сураськемын-пожаськемын, нуналысь нуналэ вошъяське, аслам но сыӵе.

Интернетысь али трос видео но статьяос шедьтыны луэ, кызьы но ма кароно кема кыстӥськись стресс дыръя. Мынам но со сярысь вераськеме потэ, удмурт сямен вераськеме потэ. Та постын кутскисько со сярысь вераськонме. Оскисько, матысь дыре луоз азьланьтэме.   

Алигес «Снобын» тани таӵе статья потӥз, туж яраз мыным. «На связи с собой. 10 карточек о том, как помочь себе и близким в стрессе» шуыса нимаське.

Тани ссылка: https://snob.ru/psihologiya/na-svyazi-s-soboj-10-kartochek-o-tom-kak-pomoch-sebe-i-blizkim-v-stresse/

Та статьяын гожтэмын, мылкыдъёсты-эмоциосты бумагае гожъяны луэ шуыса, яке вообще гожъяськон – стресс дыръя туж умой но юрттӥсь амал. Мон дэмласько удмурт сямен гожъяськыны но малпасько, удмурт адямилы мылкыдыз сярысь удмурт сямен гожъян – со трос поллы золгес юрттэ, мукет кылъёсын ӵошатыса. Али валэкто, малы озьы малпасько.

Вылӥысь статьяын ик гожтэмын (5-тӥ пункт, «Заземление» нимаське), куке эмоцилы реакция тужгес но зол луэ, адями зэмос улонысь «отключится» кариське, ассэ контролировать карыны уг ни быгаты. Более-менее нормальной состояние берытскон понна заземление техника, пе, юрттэ. Заземление техника – со котырысьтыд улонэ берытскон, кылсярысь, куараен вераськод, мае адӟиськод, мае кылӥськод, ма кариськод.

Татын пример: Удмурт сямен куараен верасько “Тани та постлэн кутсконаз бубыли ӵуж сяська вылын пуке, бурдъёсаз ньыль “синмыз” вань, сизьым тӧдьы виштызэ лыдъяй, бордаз майсыэз но вань, майсылэн йыр котыраз – тӧдьы вишты, нош берпал пумыз – морковной ӵуж”, “Табере тусьты-пуньы миськыны кутскисько”, “Вуэ шуныт”, “Одӥгаз тусьтыам горд векчи сяськаос”, “Чай юисько”, “Чае мята зын”, “Укно ултӥ трактор гуретыса кошке”.… Ваньзэ тае удмурт сямен вераськод ке, заземление эффект трос поллы кужмогес луэ.     

Одӥгаз постам гожъяй вал (лыдӟе татысь), удмурт кыл адямилэн котырысьтыз, матысь конкретной улонэныз герӟаськемын шуыса, малы ке шуоно, школаын но телевизорын кыдёкысь но абстрактной улон сярысь котьку ӟуч сямен верало, нош гуртын, семья куспын огшоры бытовой ужъёс сярысь удмурт сямен вераськиськомы. Соин, малпасько, удмуртъёслэн автоматической переключение луэ: удмурт сямен вераськиськом ке – соку ик бытовой улонэ вуиськом, т.е. заземление луэ, нош политика но экономика сярысь вераськиськом ке – ӟуч кылэ выжиськом. Озьы удмурт кылын вераськон али дырын улыны юрттэ. 

Со сяна, туннэ телевизорысь, радиоысь, Интернетысь тужгес но трос агрессивной, валантэм, кышкыт информация ӟуч сямен лыктэ. Берло почти куинь толэзьзэ ӟуч кыл мон понна таӵе кышкыт информациен ассоциироваться кариське. Соин мыным удмурт сямен вераськыны безопасногес потэ, комментариос но соцсетьёсын удмурт сямен гожъяны каньылгес потэ.

Малпасько, гуртын улӥсь, удмурт сямен вераськись, музъем бордын ужась калык практически котьку музъем вылын пыд вылаз тып-тып сылэ, т.е. улонэз солэн заземленной луэ. Соин таӵе калык – самой стрессоустойчивой калык. Удмурт кыл но калыкез музъемлы, гуртлы но гурт калыклы матэгес каре: кылсярысь, удмурт инты нимъёс, Ацетнюк, Кучапи шуисько ке, соку ик син азям Порозысь тодмо интыос пуксё. Пороз котырысь будосъёслэсь нимъёссэс удмурт сямен тодӥсько, нош тросэзлэсь ӟуч нимъёссэс уг тодӥськы, кылсярысь пешник, чуньыбыж, чырстурын. Вань та конкретной тодон-валан, кудӥзлы тон пичи дырысен дышиськод, кудзэ луэ сиыны, ишкалтыны, зынъяны, адӟыны, адямилы чувство безопасности сётэ. Нош ма телевизорын возьмато – соиз туж кыдёкын, валантэм, ас синмын адӟыны уг луы, зынъяны уг луы – валантэм но кышкыт.

Жаляса верано, куддыръя удмурт сямен вераськон наоборот мылкыдэз бугыртыны, вӧсь карыны может. Кылсярысь, адями кемалась вордскем гуртысьтыз кошкемын ини, оло Удмурт шаерлэсь палэнын кемалась улэ ини, удмурт сямен кемалась уг ни вераськы. Таӵе адямилы шӧдтэк шорысь удмурт сямен вераськон эмоциональной потрясение может луыны. Яке адямилэн пичи дыръяз психологической травмаосыз вал. Будэм бераз ни, ӟуч кылэ выжем бераз, удмурт сямен вераськон может пичи дырысь травмаосты улӟытыны. Яке, шуом, кинлэн ке но удмурт гуртысь ӟуч городэ выжон сюресэз туж секыт вал, таӵе дыръя удмурт кылын вераськон может туж секыт мылкыдъёсты тодэ вайытыны.

Куке удмурт кылын вераськон секыт мылкыддэс, вӧсь луэмдэс бугыртэ, кӧшкемыт, нестабильной  дыръёсы эмоциос сярысь вераськыны нейтральной кылын умойгес но безопасногес луоз. Нейтральной кыл – со сыӵе кыл, кудӥныз адями эмоционально ӧжытгес герӟаськемын, кылсярысь, пичи дыръяз вераськымтэ (но необязательно). Мон понна али самой нейтральной кыл – со финн кыл.

Нош куке дыръёс тупатскизы, улонды но мылкыдды более-менее стабильной луиз, соку вордскем гуртлэсь мӧзмонэз, пичи дырысь травмаосты, егит дырысь секыт мылкыдъёсты удмурт кылын бурмытыны луэ. 

Бадӟымез пие вордскем бере (соку мон куатетӥ арзэ удмурт шаерын уг ни улӥськы вал), кык толэзь нуны веттан карӟан удмурт сямен кырӟаме уг луы вал, соку ик бӧрдыны кутскисько вал. Соку аслым пайми, кызьы, оказывается, анай кыл, пичи дырысь кыл, туж зол эмоциосты ӝутыны быгатэ. Собере дыши. Пиналъёс бадӟымгес будэм бере, юри бумага вылэ гожъяса удмурт сямен эмоциос сярысь вераськыны дышетски (та сярысь татысь лыдӟыны луоз). Озьы блог но гожъяны кутски.  

Эшъёс, туж оскисько удмурт кылмы юрттоз секыт дыръёсы улыны шуыса.