Гажаса ӧтисько ШУМПОТОН блогам! Ма сярысь та блог? Котьма сярысь. Ма йырам берга, татчы гожтӥсько. Ма монэ шумпоттытэ, со сярысь гожъясько, соин блоглэн нимыз но сыӵе.
Ма мыным тунсыко но ма сярысь гожъяськеме-вераськеме потэ та блогын?
- Эмоциос но эмоциональной интеллект, тужгес но тунсыко потэ удмуртъёслэн эмоциональной культуразы.
- Удмурт сям яке удмурт сям шоры выль синмын учкон. Жаляса верано, удмуртъёс но Удмуртиын улӥсьёс удмурт сямез ӵемысь уродэн адӟо. Зэмзэ вераса, «удмурт сям» мукет «сямъёслэсь» (кылсярысь, «ӟуч сямлэсь», «француз сямлэсь») номырин пӧртэм уг луы. Нош «удмурт сям» сярысь урод малпанъёс удмуртъёслэн социальной статусэнызы но историенызы герӟаськемын.
- Удмурт калык педагогика. Удмурт эмоциональной культура но удмурт сям – ваньмыз педагогикаен яке пинал будэтонэн герӟаськемын. Мынам валаме потэ, кызьы конкретно соос герӟаськемын.
- Удмурт кыл, тужгес тунсыко потэ, кызьы удмурт кылын пӧртэм стильёс кылдытыны луэ, кызьы соосты уже кутыны луэ. Эшшо тунсыко потэ, кыӵе эмоциос кылдо удмурт кылын вераськыку.
Та сяна, мукет темаос сярысь но гожъяло.
Кутскон бамысь туспуктэм Любовь Архангельскаялэн. Любовь Архангельская, яке Люба апай, удмурт кышномурт, улэ Таллиннын. Огшоры телефонэн туж чебер туспуктэмъёс лэсьтэ. Фэйсбукысь ужъёссэ адӟыса, пайми. Мыным но ыстыны кури. Табере блогам поттылӥсько. Малпасько, Люба апайлэсь туж усто художник пӧрмысал!
Эмоциос но удмурт кыл яке кызьы удмурт кыл монэ бурмытӥз
Кышномурт бадӟым городын. Надя
Shumpoton 