Текстэз гожтӥз Светлана Едыгарова

Яратоно эше, кыс телевизордэ,

вераськы монэным.

Вера, кызьы улӥськод, ма малпаськод.

Кылзы, мон тыныд верало, кызьы мон улӥсько, ма малпасько.

Сыӵе мӧзми тынэсьтыд.

Мама, кыс телевизордэ,

вераськы монэным.

Тон мыным вералляд вал «Нылы, умой дышетскы. Дышетскемед бадӟым дуннее поттоз»

Бен мон умой дышетски, сыӵе тырши. Бадӟым дуннее потӥ.

Нош табере дунне бöрсям пытсаське кадь.

Ку адӟом на тонэ табере?  

Мон сыӵе мöзмисько тынэсьтыд.

Папа, кыс телевизордэ,

вераськы монэным.

Буйгаты монэ, оскыты, ӵуказе ваньмыз быроз но улон нош ик умой луоз.

Тынэсьтыд но сыӵе мöзми.

Дуно дышетӥсьёс, кысэ телевизордэс,

вераське монэным.

Тӥ монэ дышетӥды, дуннеын тупаса но ог-огдэ гажаса улоно шуыса.

Нош малы али ваньмыз мукет сямен мынэ?

Гажано адямиос, кысэ телевизордэс,

учкелэ котырак.

Оскелэ асьтэ синъёстылы. Тани трос лымы усем. Ӝоген шуналоз. Сюресъёс ветлонтэм нöд-дэри луозы. Кытӥ-кытӥ тракторен но уд поты.

Оскелэ асьтэ пельёстылы. Кылӥськоды-а, кыӵе кылын пиналъёс верасько?

Оскелэ асьтэ визьдылы. Валаськоды-а, кызьы но малы улон воштӥськыны кутскиз?

Оскелэ асьтэ шодонъёстылы. Кышкыт-а тӥледлы? Секыт-а тӥледлы?

Адямиос, вераське монэным.