Алигес именике вал. Трос ӟечкыланъёс басьтӥ. Тау, эшъёс.

Зэмзэ вераса, берло нуналъёсы мылкыды секыт. Блогам сомында выль постъёс гожтыны малпасько вал, дась текстэ но вал ини. Нош табере номыр кареме уг луы, номыр гожтэме уг луы. Одӥг нунал куспын вань планъёс, улон куашказы. Уг тодӥськы, кызьы табере улоно, ма кароно, кызьы дунне шоры учконо.

Мон Украинаын 2 ар улӥ, 6 ар отчы-татчы ветлӥ. Киевысь эшъёсы гожто, соос вылэ котькуд нунал бомбаос усьыло, адямиос пичи пиналъёсынызы бомбоубежищеосын уло, тросэз гуртсэс но вань котырзэс куштыса мукет странаосы кошко.

Россияысь эшъёсы гожто, дунъёс ури-бери будо, магазинъёсысь вузъёс быро, аптекаосысь эмъюм-лекарствоос быро, сиён, дӥськут, косметика, мебель, технологиосын вырись брендъёс Россияысь кошко. Корка басьтон, шутэтскон планъёс куашкало.

Финляндиысь но мукет странаосысь эшъёсы но тодмоосы шокын, семьяоссы Россияын но, Украинаын но вань. Ачим соосыз понна но, таосыз понна но сюлмаськисько. Котькытысь Россияез курлан кылӥське, хотя тросэз валало, огшоры калык виноват öвöл шуыса.  

«Эхо Москвы» пытсамын, «Дождь» ужамысь дугдэмын, социальной сетьёс facebook, twitter, tiktok мырдэм но кызьы ужало. Котькыӵе пасьысь агрессивной информация лыктэ, уд вала, кин пӧяське, кин зэмзэ вера. Пумит мылкыдзэс возьматӥсь адямиосты тюрмае пуктыны дась.  

Мон уг валаськы, кызьы можно аслэсьтыд калыктэ таӵе калозь вуттыны!     

Мон понна гуманитарной катастрофа вуиз. Уг тодӥськы, ма табере карыны. Но тазьы улыны уг яра!