Текстэз гожтӥз но фотоос лэсьтӥз Светлана Едыгарова.

Руанын картэлэн семьяез улэ. (Француз сямен Rouen гожтӥське.) Арлы быдэ татчы вуылӥськом. Туэ, или табере кылем 2021-тӥ арлэн пумаз, Рождестволы бертылӥм. Финляндиын сётэм коронапаспортэн (кык пуктэм привика сярысь документ) Францие проблемаостэк ветлэммы луиз.

Нормандия – со Парижлэн шундыпуксён (западной) палаз интыяськем регионлэн нимыз. Нормандия нимыз уйпал (Север) шуэмез возьматэ. Нормандилэн шундыпуксён палаз океан яке Ла-Манш пролив бызе, пролив Франциез Англиялэсь висъя. Куддыръя, сайкыт куазен, Франциысь ярдурысен Англиез но, пе, луэ адӟыны. Руан город Нормандилэн шоркарез луэ. Руан, Париж бере, Франциысь тужгес но бадӟымез вашкала город. Париж дорысь одӥг час котыр поездэн мынонэз. (Сан-Лазар вокзалысь кошко поездъёс).

Ми Руанэ 20-тӥ декабре вуим. Вуэм берамы куазь -5 градус кезьыт луылӥз, нош бертыкумы +14 вал ини. Лымы татын туж шер усьылэ, нош зоре трос. Картэ шуэ, Руанын куазь толалтэ но, гужем но одӥг кадь, пе, улэ – зоре, зоре, зоре. Нош инбам котьку пурысь. Бертон азямы зэмзэ но зоремысь ӧз дугдылы. Одӥгаз шундыё нуналэ фотоос лэсьтыны дыртӥ.

Руан океан дорысь кыдёкын ӧвӧл, соин татын, зор сяна, океанэн герӟаськем культура зол. Кылсярысь, котькуд вить ар татын Армада шуыса нимаськись вашкала но туала корабльёслэн фестиваль-парадзы луылэ. Ми но куинь ар талэсь азьло вуылим отчы.     

Со сяна, Руан Жанна Д’Арклэн нимыныз герӟаськемын. Татын сое тюрьма-башняын возизы но татын ик сутӥзы. Куке но нимысьтыз пост гожто та сярысь.

Вашкала Руан

Вашкала Руанлэн шорсюлмыз – Вуж базарлэн площадез яке Place du Vieux-Marché (Плас дю Вьё марше) но со котырысь вуж коркаос но сюбег ульчаос. Вьё марше – со вуж базар шуэм луэ, базарез али но вань на. Та площадьын тани таӵе вашкала ресторан вань, али но ужа.

Нош та башняын Жаннаез тюрмаын возиллям. Али отын музей. Башня вуж базарлэн площадьысьтыз кыдёкын ик ӧвӧл интыяськемын. Фотоын туж интересно пӧртэм дыръёсысь пуктӥськон стильёс сураськемын.

Мыным туж яра вашкала Руанлэн атмосфераез: фахверк техникаен пуктэм вашкала коркаос, туж сюбег ульчаос.

Ма со фахверк корка пуктон техника

Ачим но уг тодӥськы вал та кылэз, пост гожъякум нырысьсэ адӟи. Фахверк кыл немец Fachwerk кылысь, пе, потэмын, кудӥз Fach ’ящик, панель’ но Werk ’уж’ кылъёслэсь пӧрмемын. Таӵе техеникаен пуктӥськон Шор но Уйпал (Северной) Европаын, пе, 10-11-тӥ дауръёсы вӧлмем. Со сыӵе корка пуктон техника, куке нырысь вӧлэм коръёслэсь (брусъёслэсь) каркас лэсьтӥське, коръёсты кечат-вамат но диагонально юнмато. Собере коръёс вискы изэн сурам вашкала бетон поно вылэм, нош берлогес куроен но шашыен сурам гордсюй поныны кутскиллям. Бетон яке гордсюй стена выллем мед кынмоз шуыса, коръёс куспы пуныса выллем векчи ньӧр тыро вылэм. Гордсюй кынмем бере, ньӧръёсы бичало вылэм но стенаосты тӧдьы мелэн штукатуритьто, нош коръёсты штукатурить кырытэк кельто вылэм, мед чебер адскоз шуыса. Таӵе техникаен куинь этажъем коркаос лэсьтыны луэ вылэм, солэсь трос кор каркас уз, пе, чида. Вылӥ этажъёс улӥ этажлэсь азьпалгес мычисько – озьы соос улӥ этажез зорлэсь-лымылэсь утё, пе. Руанысь таӵе коркаосты мон вужмыса азьпала мычиськемын шуыса кожасько вал. Оказывается, соос юри озьы лэсьтэмын. Таӵе корка туж ӝог пуктӥське вылэм, дуныз но дунтэм усе вылэм, шунтыны но ӝог шунтӥське вылэм, шунытэз но, пе, умой возе (из коркаосын ӵошатыса). Европаын корабль пуктон вакытэ, таӵе техника уката но паськыт вӧлмем, соку кибашлы плотникъёс но трос вылэм, нош пуэз корабль пуктӥськонлы жаляллям.

Та фотоын кык коркалэн пу брусъёсыз пӧртэм буёлэн буямын.

Таиз нош туж вашкала адске.

Нош таосыз коркаос шудон корка кадь адӟисько.

Таиз вашкала сюбег ульча. Татын туж умой адске, кызьы коркалэн вылӥ этажъёсыз азьлань мычисько, коркаез зор-котлэсь утьыса.

Эшшо одӥг чебер фахверк корка.

Та вашкала кварталын туж трос пичи но сюбег проулкаос. Тани одӥгез.

Вуж базарлэн площадьысьтыз кыдёкын ик ӧвӧл – Gros-Horloge (Грос Орлож) – астрономической час. 14-тӥ даурын лэсьтэмын, пе, со. Час туж чебер лэсьтэмын, зарниямын, Ренессанс вакытэ. Час вылын гырлыен башняез вань, котькуд час али но жингыртэ дырез возьматыса. Часлэн механизмез 1389-тӥ арын лэсьтэмын! Уйпал Европаысь адямиос туж пунктуальноесь. Та часэз адӟисько ке, валасько, малы соос сыӵе пунктуальноесь – Руанын улӥсьёс 800 ар ӵоже ини та часэн уло. Мынам талэсь умой фотое ӧз шедьы.

Час Грос Орлож шуыса ик нимаськись ульчаын интыяськемын. Со – пыдын ветлон сюбег ульча, татын трос магазинъёс. Та ульча потэ черк доры – Руанысь собор доры.

Руанысь собор  яке Cathédrale Notre-Dame de Rouen (Собор Руанской Богоматери) готика стилен лэсьтэм католической черк. 1876 – 1880-тӥ аръёсы дуннеысь самой ӝужыт пуктӥськем, пе, вылэм. Та черк 1030-тӥ ар котыр лэстыны кутскемын, пе. Со дырысен черк трос пол тылын ӝуамын, войнаен куашкатъямын, но выльысен пуктэмын. Соборлэсь одӥгзэ башнязэ Тур де бёрр шуо (Tour de Beurre, удм. сямен Вӧй башня). Руанысь калык башня пуктыны аслэсьтыз коньдонзэ сётэм, но со понна черк мед, пе, вӧй сиыны лэзёз быдӟым пост дыръя. Отысь сыӵе ним потэм. Та черкез туж яратэ вылэм суреданы Клод Монэ. Клод Монэ сярысь гожтӥ вал ини одӥг пост, учке татысь.

Та черк азе Рождество дыръя кыз пукто. Туэ тани таӵе.

Сен Маклу черклэн азьвыл шайвылэз. Сен Маклу черк берын азбар вань. Со азбаре 15-тӥ даурын чума висёнлэсь кулэм адямиосты ватылӥллям. Чума бырем бере но татчы ватылӥллям на. Кема ӵоже татын гробовщикъёс ужаллям. Азбарысь коркаос фахверк техникаен лэсьтэмын, нош коръёс черепъёсын, кусоен, лыосын чеберъямын. Али но кӧшкемыт адӟиське! Али татын школа искусств (Школа изящных искусств Руана).

Нош татын черепъёс но лыос.

Гурезь бамалысь Руан

Вашкала Руан шур дурысь бур палан нялмыт азьын интыяськемын. Кӧня ке кыдёказгес ӝужыт ярдур яке гурезь бамал ӝутске. Татын Руанысь тужгес но дуно кварталъёс интыяськемын. Вань коркаос татын излэсь но кирпичлэсь лэсьтэмын, огзы борды огзы туж матэ пуктылэмын. Туж интересно пото мыным та коркаос! Соос туж сюбегесь, но ӝужытэсь яке куинь этажъемесь, куддыръя туж векчиесь но. Азбаръёссы но пичиесь, ӝужыт, кирпичлэсь лэсьтэм кенер сьӧрысь адӟыны уг луы, маиз азбаразы вань. Нош куддыръя, пась ӟезьыысь зэмос миниатюрной дворецез адӟыны луэ. Ульчаос татын но туж сюбегесь, машинаен ветлыны татӥ туж шуг, мон руль сьӧрын пукытэк но туж шурдӥсько!

Таяз фотоын коркаос ог-огзы борды лякисько.

Нош таяз фотоын кирпичлэсь кенер.

Эшшо одӥг ульча.

Таӵе пичи дворец порма коркаос но пумиськыло.

Нош таяз коркаын туж тунсыко адске, кыӵе коркалэн вылӥ, берпуметӥ этажез векчи, картонной коробкалы укша. Не представляю, кыӵе пичи комнатаосыз со этажын!

Нош тани кирпич стенаын турын-куар будэ.

Сена шур

Парижысь татчы бызись Сена шур городэз кыклы висъя: бур паллы (rive droite) но паллян паллы (rive gauche). Татын шур туж паськыт но мур, корабльёслы ветлымон луэ. Шур дурын трос промышленной пуктӥськемъёс вань, малы ке шуоно, али ке но татӥ вуз нуллӥсь баржаос ветло, окенаысь корабыльёс пырак татчыозь вуыло. Шур кузя променадъёс вань – пыдын калгон сюрес-тротуаръёс. Трос зорыку та променад вуэн шобырскылэ.  

Фотоын Сена шур, шур кузя баржа мынэ. Куазез Руанысь типичной тол куазь.  

Тайзэ фотоез выж улысен лэсьтӥ. Кыдёкын ӵуж кранъёс адско. Эшшо та фотоын Флобер нимо выж адӟиське. Со выж ӝутске но лэзиське, озьы бадӟым корабльёслэн но машинослэн ветлэмзы луэ.

Рождество

Французъёс католической Рождествоез 25-тӥ декабре пумитало. Семьяос огинэ люкасько но ог-огзылы кузьымъёс сётъяло. Продуманной адямиос рождестволы кузьым одӥг-кык толэзь азьло ик дасяло ини. Ми Франциысь вань кузьымъёс басьтыны малпам но Рождество азьын ури-бери бичаськыса бызьылӥм. Финляндиен ӵошатыса, татын дунъёс пичиесьгес, нош бырйонэз бадӟымгес.

Рождество азьын ярмарка луэ. Отысь саламъёс но сиён-юон басьтыны луэ.

Татын тани канфет вузало.

Нош татын шунтэм горд но тӧдьы вина.

Нош таяз куасьтэм сӥльлэсь колбаса. Туж яратӥсько таӵе колбасаез. Францие ветлыкумы котьку басьтыса ваиськом.

Нош тазьы магазинъёс чеберъямын Рождество азьын. Таиз тани вуж городысь огшоры парикмахерской. Сыӵе чеберъямын, выжыкылысь дунне кадь потэ мыным.

Эшшо тани таӵе кафеез возьматэме потэ. Таиз театрысь декорация кадь адске. Мыным сыӵе яра.

Эшъёс, таин гожъянме йылпумъясько. Эшшо но текст но фотоос дасяй вал. Но постэ туж кузь пӧрмиз ини. Нимаз пост гожто на. Францие вуылӥды ке, ветлэ одно ик Руанэ!