Текстэз гожтӥз но суредаз Светлана Едыгарова.

Берпуметӥзэ тупатъямын 2.12.2021.

Улэм-вылэм принцесса.

«Да ладно! Тон удмурт сямен гожъяськод ук. Удмуртъёслэн принцессаоссы ӧй вал. Эн пӧяськы!»

Я бен. Улэм-вылэм Ныл. Ваньмыз солэн вылэм нормально.

«А малы верослэн нимаз «принцесса» гожтӥд?»

Ну, со уг тоды вал, со принцесса шуыса.

«Дак мон верасько ук, кытын удмуртъёс и кытын принцессаос!»

Эн мешатьты гожъяськыны! Итак, улэм-вылэм Ныл. Мамаез-папаез вылӥллям, яратӥллям нылзэс. Ныл туж педлон шудыны яратэм. Тололтэ лымымунё лэсьтылэм, йӧгурезьысь нискылам, букосэ тэтчам. Тулыс тудву кузя корабликъёс лэзьям, йӧӟузыриосты сюпсем, кызьпу пучыез спичка коробкае бичам. Гужем узыяны-борыяны ветлэм, шурын пыласькем, ошмесысь ӵаж-ӵаж кезьыт ву юэм, лудын скал-ыж возьмам. Сӥзьыл картошка копам, сике губияны ветлэм, дэриетӥ коласа ветлэм.

Одӥг пол ваньмыз воштӥськем. Педло но воштӥськем: табере лудъёс но сик интые – бадӟымесь, пурысесь вить этажъем бетонной коркаос, скалъёс но ыжъёс интые – бензин зын поттӥсь машинаос. Папаез Ныллэн кытчы ке чиптэм-чаптэм ышем, нош мамаез куинь уже ужаны кутскем но гуртаз кӧлыны гинэ вуылэм на.

«Перестройка вуэм-а мар-а? Папаез ужтэк кыльыса юыны кутскем но толалтэ кудӟыса кылльыкуз кынмыса кулэм? Или семьязэ куштыса мукет кышномурт доры кошкем? Или воштӥськонъёслы чидатэк инфаркт луэм солэн? Или сике мыныса ошиськем? А мамаез городэ умойгес улон утчаны кошкем?»

Эн мешатьты шуи ук! Ышем и всё! Мон исторической роман уг гожтӥськы! И вообще, мон выжыкыл гожтӥсько! Одӥг кылын вераса, улон воштӥськем, ваньмыз воштӥськем. Ныл мамазэ туж шер адӟылэм. Мамаез бер ӝыт бертыку, Ныл кӧлэ ини, ӵукна сайкакуз мамаез ужаны кошкемын ини. Ӝӧк вылысь маке со сиён шедьтыса сие но, берен шуныт валесаз выдэ. Туж мӧзмыт Ныллы, туж …э-э… одиноко.  

«Фууу, кыӵе шуш кылӥське! Малы ӟуч кылъёсты пыртылӥськод?! Тон удмурт сямен гожъяськод ук!»

А кызьы одинокий кылэз удмурт сямен гожтом?! Мон-а мар-а виноват, удмурт кыл сыӵе ӟучомемын шуыса?! Мон-а мар-а виноват, удмурт кылэз школаын почти уг дышето шуыса?! Мон-а мар-а виноват, удмурт кыл быре ини шуыса?!

«Я, тырмоз-тырмоз! Воксё мукет пала кошкиськод ини. Давай дальше гожъя.»

Туж мӧзмыт, вобщем, луэм Ныллы. Озьы со шуныт валесысьтыз султылымтэ ни, ну бен сиськыны гинэ султылэм на. Туж яратэм ческыт уйвӧтъёс вӧтаны. Валесаз выдэ, синзэ кыне но син азяз пуктэ: тани со Ныл, вылаз тӧдьы, туж капчи но тӧлъя тулкымъяськись, музъем дорозь ик кузь буртчин плаття дӥсямын. Ныл аслыз принцесса кадь потэ. Ныл ӟечыра. Платтяез ӟечыракуз тӧлъя тӧдьы тулкымъёсын лопыръя. Йырсиез кузь, кӧня ке бабыльске, йырсиез но ӟечыракуз веттаське. Ныл ӟечыраку дораз Со потэ, спортивной штанен, штань урдэсъёсаз горд полоскаос, тӧдьы кроссовкиосын, бабылес чёлкаез урдэслань сынамын, чиньыяз бадӟым печатка чиля, дорысьтыз одеколон зын. Со синмаськыса учке Ныл шоры но малпа: «Кыӵе со чебер, кыӵе со ненег но чылкыт, кыӵе со Пилэн Нылэз котькыӵе шуг-секытлэсь утемез потэ, кыӵе со дуннеысь самой умой ныл, кыӵе со Пилэн со Нылын ӵошен вань улонзэ улэмез потэ!» Пи матэктэ. Ныл дугдытэ сое. Ныллы яра Пилэн Ныл шоры синмаськыса учкемез. Ныллэн потэ, Пи котьку шораз синмаськыса мед учкоз шуыса, соин ик матэгес уг лэзьы, кышка, Пи Ныллэсь зэмзэ кыӵе луэмзэ тодӥз ке, со соку ик куштоз сое но аслыз мукет Ныл шедьтоз, умойзэгес.

Ныл сайка но гуразьпала сиён утчаны мынэ. Ӝог-ӝог сиське но нош ик валесаз выдэ, ческыт уйвӧтэз наркотик кадь буйгатэ мылкыдзэ.

Одӥг пол сиськыкуз Ныл ӝӧк вылысь газет шедьтэм, мамаез, видимо, вунэтэм. Мӧзмон вылысь газетэз оп! шуыса кадь быдэсак лыдӟем. Ярам лыдӟиськыны. Шкафъёстӥ утчаськем но, кӧня ке книга шедьтэм. Одӥгзэ бӧрсьы мукетсэ ньылыса кадь ик лыдӟе, пе. Книга дунне Нылэз уйвӧтэз кадь быдэсак пушказ кыскем. Гуртысьтыз мае луэ лыдӟыны, ваньзэ лыдӟыса быдтэм ини: туалетысь вуж газетъёсты но, жагын кыстаськись вуж инструкциосты но, банкаосысь этикеткаосты но, обойысь чеберъяса печатлам кылъёсты но. Всё, номыре больше лыдӟыны. Гуртысь книга утчаны потоно луэм. Ульчаетӥ, бадӟым сикысь городэ йыромем пӧйшур кадь ветлыкуз, витринаысь тодмо арбериосты адӟиз – книгаосты. Библиотека вылэм. Ныл капчиен шокчиз но библиотекае книгалы пыриз. Со дырысен нуналлы быдэ татчы пыралляз, библиотекаысь котькуд книгаез наизусть тодӥз: пушроссэ, кин гожтэмзэ, кыӵе арын потэмзэ, кытын интыяськемзэ. Иностранной кылъёслэсь грамматикаоссэс лыдӟыса, трос кыл дышетӥз.

«Нош мамаез ӧз шӧдылы шат, нылыз кӧлыса но лыдӟиськыса гинэ улэ шуыса?»

Ныллэн мамаез малпаз, со гуртын ӧвӧл дыръя, Ныл огшоры ныл кадь улэ шуыса. Книгаосты синйылтӥз, малпаз, нылыз ӟеч дышетске шуыса. Эшшо малпаз, нылыз ӝикыттэм шуыса, адӟе – Ныллэн комнатаяз вечной бардак, сиськем бервылзэ уг утялты, тусьты-пуньыез раковинаын люкаське, книгаосыз корка пасьтана кыстасько, валес котырез но дӥсез вошъямтэ-миськымтэ, йырсиез тугаськемын – лакудра кадь ветлэ. Мамаезлы ӝикатскыны некогда, вераськыны но некогда, ӟудыны-тышкаськыны но некогда. Главной – лыдӟиське, малпаз мамаез, педлотӥ тамак кыскыса уг калгы, тазьы но яралоз ини.

«Ну и правильно малпа Ныл,  кин сыӵе неряхаез кышно басьтоз!»

Ццц! Ныл мӧйы гырдым луэм ини. Но озьы ик, пе, валесаз кылльыса-лыдӟиськыса улэ, бардакын. Дась сиёнэз ӧвӧл ке, колбаса вандылэ, глазуння лэсьтэ, чипсы сие. Мамаезлэн чиданэз бырем. «Надоело! Кӧня можно озьы улыны! Ваньмыз мама вылын! Марш ужаны! Али ик!» озьы шуэм но нылзэ тодмо библиотекае эшез пыр ужаны интыям, лыдӟиськемысьтыз пайда поттэмлы шумпотыса.

Ныллы нырысь ярам библиотекаын ужаны. Тодмо книгаос пӧлын туж комфортно потэм. Угось вань книгосты умой тодэ. Нылэз ушъяллям умой но ӝог ужамез понна. Котькуд ӵукна ужан интыяз мылысь-кыдысь ветлэм.

Ныллэсь визьмо луэмзэ адӟыса, трос кылъёсты тодэмзэ валаса, Ныллы тросгес но тросгес, ответсвеннойгес но ответственнойгес уж сётъяны кутскиллям, нош уждунзэ будэтӥллямтэ егит на шуыса, семьяез но ӧвӧл на, пе, малы солы лишной коньдон. Вань ужасьёс доразы семьяен шутэтско ини, нош Ныл библиотекаын компьютер азьын ужаса пуке на.

«Малы нош со озьы ассэ бесплатно эксплуатировать карыны лэзе?!»

А ма солы кыле на?! Куаразэ поттӥз ке, соку ик ужысьтыз уллялозы, воштонтэм адямиос ӧвӧл. Одӥг пол Ныл туж берозь ужаз, автобусъёс но троллейбусъёс уг ни ветло. Таксиен бертӥз ке, капроновой колготкилы дасям коньдонэз быроз, эшшо выль косметика но кемалась басьтэмез потэ вал ини. Библиотекае кӧлыны кылиз. Собере эшшо одӥг пол кылиз, собере эшшо. Тазьы туж удобно вылэм, сомында дыр экономится кариське. Нош кӧлонэз табере уг тырмылы ни, ужез тросгес но тросгес луэ, уйен-нунал сураськизы, одӥг час коть буш кылдэ ке, Ныл книгаос вылэ ик выдыса кӧлэ.

«Господи, кызьы озьы можно улыны!»

Одӥг пол, книгаос вылын кӧлыкуз, ӵуш-паш куараос кылӥськизы. Ныл синзэ усьтӥз: библиотекаын ужасьёс отчы-татчы бызьыло. Ныллэсь нимзэ кесясько.

– Ма луиз? – юаз Ныл. 

– Москваысь спонсор лыктӥз, – кеськыса вазиз коллегаез. – Куинь миллион манет, пе, сёто библиотекадылы, мыным тыро-пыдо бизнес-план лэсьтӥды ке. Срочно лык, тон сяна нокин но уз быгаты сыӵе план сярысь вераськыны! Али ик! Срочно! Директор тонэ ӝыны час утча ини!  

Книга ӝажыос вискытӥ Ныл спонсорез адӟиз – СО! Уйвӧтысьтыз Ныллы синмаськем Пи! «Только не это!» йыраз чилектӥз Ныллэн, «Только не али!». Ныл ури-бери туалетэ пегӟиз, коллегаезлэн ныр азяз ик ӧсэз шальк! пытсаз. Туалетысь зеркалэ учкиз: йырсиез котьку сямен ик – кӧня ке нунал миськымтэ но лакудра, тушез (синъёсты буян тушь в смысле) уйин кӧлэм бервылтӥ виямын, пиньыз кӧня ке нунал сузямтэ ни, ымысьтыз зын потэ, кунулъёсыз пӧсямын, одӥгез пельугыез кытчы ке ышем, капроновой колготкиосаз куинь стрелка адске самой адӟиськон интыяз (кемалась магазинэ колготки басьтыны потаны малпа вал ини, но сыӵе трос уж дыръя туалетэ гинэ но ветлыны дыр уг тырмылы). «Даааа, пиосмаял ке пиосмаял!» малпаз Ныл, «Удмурт диалектъёс» книгаысь кылэз тодаз вайыса. (Пиосмаял – со, пе, лакудра. Та кыл Кез но Балезино удмурткаослэн куремзыя пыртэмын).

«Боже мой! Кин таӵе запущенной ныллы синмаськоз! Да любой принц таӵе нылэз адӟыса ури-бери пегӟоз куда подальше! Шонер вера «Модной приговорын» Эвелина Хромченко, кышномуртлы котьку дась луыны кулэ Принцсэ пумитаны, малы ке шуоно, ноку но уд тодӥськы, ку но кытын соин пумиськод!»

– Уг мыны!!! – кеськиз Ныл туалет ӧс сьӧрысь. 

– Начальник шуиз, через пять минут ӧд ке вуы, аслыд мукет уж можешь утчаны.

Одӥг минут отрчиз. Собере Ныл шуык сумказэ усьтӥз но куалекъясь киосыныз утчаськыны кутскиз. Кафельной пол вылэ нырысь ручка лобӟиз, собере зажигалка, собере пластиковой карточкаос, собере – помада. «Так!» малпаз Ныл, «щас мон тыныд возьмато, Спонсор, асме сыӵе вошто, улытозяд но уд тоды, кин мон сыӵе! Ха-ха!» Нырысь туалетной бумагаен синъёссэ посӥз-ӵушылӥз, тушез эшшо но золгес саптаськиз.

– Блин, малы именно туннэ вуид, зараза!

Шоро-куспо кузьда кечат-вамат тусо юбкаез кӧлыкуз ныркиськем. «Сӥтянэ донгам кадь» шуысал мамаез. Юбказэ кылиз но туалетысь жагведрае куштӥз. Тугаськем йырсизэ озьы но тазьы вылӥе ӝутыса, шпилькаосын дэмӟытылӥз. Помадазэ усьтӥз. Дуно бренд. Кема коньдон ширъяса ар талэсь азьло басьтӥз Москваысь, ГУМ-ысь. Помадаез кемалась быремын ини, пурысьтам зыныз но вань. Кемалась выльзэ басьтыны малпа вал ини, таӵезэ ик фирменнойзэ, коньдон но люказ вал ини, только шӧдтэк шорысь одӥг магазинысь кема возьмам книгаез адӟиз, помадалы шыръям коньдонзэ книгалы быдтӥз, ӧз чида басьтытэк.

«Нылъёслэн котьку озьы луэ, бырйыны кулэ: или тон чебер, или визьмо.»

Ныл чельызэ помадае донгиз, куръяз помадаез, чельыеныз ымдуръёссэ зыраз, ымаз вужмем помадалэн шӧмыз шӧдӥськиз. Бамъёссэ зыраз. Кӧня ке малпаськем бере, син котыръёссэ но зыраз. Собере куашкам колготкизэ ӝутъяны кутскиз, стралкаос куажыыыыр! карыса бадӟым пасьёслы пӧрмизы.

– Бляяя! Што за нунал! – куараен малпаз Ныл.

Пыдъёссэ учкиз: пыдаз сьӧд замшевой ботинкаос, отӥ-татӥ пась луэмын ини, кема нуллыса сьӧд буёлэз лыз луэм ини. Эшез сётӥз вал, та «говнодавкаосты», пе, нуллэме уг ни поты. Ныл ботинкоссэ вуэн коттӥз но, сьӧд буёл нош ик сьӧдлы пӧрмиз.  

– Али ӧд ке поты, ӧсэз тӥяло, – ӧс сьӧрысен кеськиз библиотекалэн директорез.  

– Одеколонэд вань-а? – юа Ныл директорлэсь, туалетлэсь ӧссэ усьтыса. Куинь минут улыса, директор Ныллы одеколон флакон мыче. Ныл одеколонэз ымаз пазьге, кунулаз пазьге.  

Нош Спонсор со дыре директорлэн кабинетаз пуке, директорлэн креслояз. Котыраз секретаршаос бызьыло, каблукъёссы цок-цок гинэ каро на, сюбег юбкаен золтэм берпалъёссы чукинь-бекинь выро, котырысьтызы кабинетэ узыен-жасминэн суро зын вӧлме. Спонсор азьын радэн библиотекаршаос сыло: бадӟым очкиос сьӧрысь синъёссы чорыг синъёс кадь Спонсор шоры быльк-быльк учко, пыдазы – кечат-вамат тусо ыжгон тапочкиос, йырсизы ваньзылэн одӥг кадь вакчи вандэмын но химия лэсьтэмын, кылемез кузь керттэм кофта улэ ватэмын.

– Гажано Спонсор эш, великой русской поэт Пушкин шуылӥз …. Собере мукетыз великой русской писатель Тургенев но … – дыг-мыг маке верало соос.

– Мыным неинтересно, ма Пушкин но Тургенев верало, мыным бизнес-план кулэ, – куспетӥ каре Спонсор.

Библиотекаршаос нош ик кинэ ке цитировать каро, нош Спонсор: бизнес-план, бизнес-план, бизнес-план.

Ӧс шуак усьтӥське. Кабинетэ нырысь ик нырез чепыллясь зол зын вӧлме. Валантэм зын: то ли дунтэм мужской одеколон, то ли туж дуно иностранной унисекс духи, то ли кыӵе ке но химия. Туж зол зын! Собере Ныл пыре. Йыраз гындэм йырсилэсь модной ӝужыт причёска, сюбег син котыръёсыз французский макияж выллем сьӧд-сьӧдэсь, тӧдьӟектэм ымныраз горд виштыос, одӥгаз пеляз – зарни кизили ворекъя. То ли кофта, то ли вакчи плаття мырдэмен быгылес макесъёссэ шобыртэ. Тӧдьы макесъёсыз сьӧд кесяськем капроновой колготки пыр чильпырало. Пыдаз брутальной, почти мужской, ботинкаос. 

Спонсорлэн нырысь йырыз поромиз. Собере малпаз: «Таидлэн кытыназ ке татуировкаез но вань, дыр.» Провинциальной библиотекаысь таӵе библиотекаршаез ну нокызьы но пумитаны ӧз малпа вал.

– Бизнес пла…. – веранзэ ӧз быдты Спонсор, ымыз пась кылиз.

– Так, значит тазьы, – ӝог вераны кутскиз Ныл. – Нырысь ик библиотекалы кулэ …. – отӥяз английский, французский, немецкий, испанский сямен книгаослэсь но авторъёслэсь нимъёссэс вераны кутскиз. Собере нош мукет кылъёсын компьютерной программаосты нимаз, соосты, пе, одно ик басьтыны кулэ библиотекалы, дунзэ вераз, эшшо кыӵе интыын кыӵе дунын вузаськемзэ вераз на. Пумаз ватсаз: кылемезлы коньдонэдлы, пе, кышноедлы гуртын улӥсь удмурт поэтъёслэсь книгаоссэс басьты, али, пе, туж модно лыдӟыны экзотической кылын гожъяськись авторъёслэсь книгаоссэс. Книгаос, пе, библиотекалэн магазиназ вузасько. Собере шуак берытскиз но кошкиз. Берытскыкуз помада футляр шлач! гинэ Спонсорлэн пыд азяз усиз. Ныл помадазэ кияз кырмыса возе вылэм, кышканназ вунэтэм сумкаяз поныны. Спонсор, библиотекаысь кошкыкуз, библиотека магазинын кӧня книгаез вал, ваньзэ басьтыса кошкиз. Киргам помадаез корманаз понӥз.

Нош Ныл пегӟыса сямен гуртаз бертӥз, жадённаз но возьдаськонназ сайкаллятэк куинь нунал кӧлӥз. Куинетӥ нуналаз, мырдэм султыса, телефонысьтыз смс шедьтӥз. Тодмотэм номер. Усьтӥз. Спонсор гожтэм. Бизнес-план сярысь, пе, эшшо кенешеме потэ. Мынам али уг луы, мон, пе, срочной командировкае кошки шуыса пӧяса гожтӥз Ныл. Нош ачиз малпаз: «Чёрт! Спонсор тодӥз ке, кыӵе мон неинтересной но азьтэм кышномурт, соку ик «бе!» шуоз но аслыз столицаысьтыз интереснойгес кышно шедьтоз. Ярам ини, тазьы ик уло ини неинтересной улонме всякой спонсоръёстэк.»

«Тынад веросэд, по-моему, низкопробной сериаллы пӧрмыны кутске ини. Дырын-дырын нош а ля Дарья Донцова порма луылэ, крокодилэз гинэ уг тырмы на!»

Ӵок! Мыным маке шат! Кӧня ке улыса Нылэз Москвае ыстӥзы книга вузан ярмаркае. Удмурт дэремен книга лавка сьӧрын сылэ Горд площадьын. Обед интые ГУМ-е ветлыны куриськиз. Dior, Chanel, Gucci, Louis Vuitton – лыдӟе магазинъёслэсь нимъёссэс. Помадазэ адӟиз, самой та магазинысь басьтӥз вал кылем арын, быдэс ар коньдон люказ выльзэ басьтон понна, ГУМ-е но юри помада басьтон вылысь куриськиз. Помада бырйыса сылыкуз, пель сьӧраз «Привет!» кылӥськиз. Ныр йырзэ ӧз берыкты, малпаз кинлы ке мукет адямилы вазисько шуыса.

– Привет, библиотекарша, – нош ик кылӥськиз. Ныл йырзэ берыктӥз – Спонсор. – Тон тае утчаськод-а? – шуыса Спонсор кияз помада мычиз. Ныл «Ах!» шуыны гинэ валаз на. 

«Стоп! Мон ӧй вала! Тынад выжыкылэд Золушка сярысь ук! Малы соку «Бабись принцесса» шуыса нимад?»

Зэмзэ вераса, уг малпаськы вал, выжыкылэ Золушка сярысь пӧрмоз шуыса. Собере зеркалысь Золушка потӥз. Малпай, выжыкыллэсь нимзэ оло «Бабись Золушка» шуыса воштоно, интересно ук, ма пӧрмоз, кык выжыкыллэсь сюжетъёссэс сурад ке. Собере малпай, нош кызьы Золушкаез удмурт сямен шуоно, кытын ке но вань, дыр, удмурт вариантэз. Оло Пенӟо, оло Курмича, оло Мачаган. Выжыкылме соку нимасал «Бабись пенӟо Ныл». Фу, кыӵе урод кылӥське, кыӵе вань, сыӵе ик мед кылёз ини.

Спонсор Нылэз ГУМ-ысь самой дуно ресторанэ ӧтиз. Книга лавкаяды, пе, ветлӥ. Коллегаосыд, пе, веразы ГУМ-е кошкид шуыса, соку ик, пе, валай, тани таӵе ик помада басьтыны мынӥд шуыса, татысь ик шедьтӥ, пе, тонэ. Мон, пе, тонэ то провинциальной библиотекаысь французский макияжен но кесяськем чулкиен пумитасько, то, пе, ГУМ-ысь бутикысь удмурт дэремен адӟисько. Кыӵе, пе, тон паймымон адями! Мукет нылъёс кадь ӧвӧл.

– Кстати, кышное мынам ӧвӧл. Гуртын улӥсь удмурт поэтъёслэсь книгаоссэс лыдӟыны некинлы.

Ныл Москвае улыны кылиз. Спонсорлы бызиз. Интересной адями луыны тыршиз. Интересной шмотакос басьтӥз, интересной прическа лэсьтӥз, интересной интыосы путешествовать кариз, интересной ужын ужаз, ачиз уждун поттӥз, Спонсорлэсь коньдонзэ ӧч карыса ӧз курылы. Собере пиналзы вордскиз. Пиналзэс интересно будэтыны тыршиз. Собере кыкетӥез пиналзы вордскиз.

Собере Ныллы ваньмыз неинтересно луиз. Одӥг пол ӵукна Ныл ӧз султы валесысьтыз, кӧлыса кылиз. Мукетаз но ӵукна ӧз султы, куинетӥяз но. Пиналъёсызлэн кӧтсы сюма, «Мама, султы ини, мама, кӧтмы сюма» шуыса бӧрдо. Спонсорлэн йырыз кур луиз. Ныл пиналъёссэс уг сюды, уг утялты шуыса, умой воспитание сётыны толыкез ӧвӧл шуыса, корказэс уг ӝикаты шуыса, ческыт сиён пӧраны толыкез ӧвӧл шуыса, ассэ но запустила шуыса, косметолог но парикмахер доры уг ветлы шуыса. Мон, шуэ, тонэ провинциысь поттӥ, тыныд развиваться кариськыны сомында луонлык сётӥ, дуннеын сомында интереснойез, нош тыныд номыр но кулэ ӧвӧл шуыса тышкаське.

Таӵе кылъёс бере Ныл султэ валесысьтыз, но сайкамез уг луы. Пиналъёсыз вогало, ваменъясько, жугисько, бӧрдо, нискето  – нош Ныллэн номыр каремез уг луы. Картэз керӟегъяське, тышкаське, даллаше, ӟугыртэ, мурт нылкышноосын калге – нош Ныллэн номыр каремез уг луы. Начальникез ятыр трос уж сётэ, тышкаське, уждунзэ уг будэты – нош Ныллэн номыр каремез уг луы. Бускелез жуг-жагзэ Ныллэн ӧс азяз ик куя, уйин кӧлон дыръя зол музыка ӝуатэ – нош Ныллэн номыр каремез уг луы. Ныл валесаз выдэ но нош ик сайкаллятэк кӧлэ.

Одӥг пол Спонсор гуртаз ӧз берты. Одӥг нунал ӧвӧл, кык, куинь. Ышиз-быриз. Пиналъёсыз бӧрдо, «Мама, кытын папа? Малы со уг берты? Со милемыз уг ни-а яраты? Со табере ноку но-а уз ни берты?» бӧрдыса юало. Ныл куинь нунал ӧз кӧлы.  

«Вот! Озьы ик малпай!» ассэ тышкаське Ныл. «Ведь тодко вал, куке соку одно ик кошкоз шуыса, монэ огнаме кельтоз шуыса! Малы бызёно вал та монстрлы?! Вань егит дырме быдтӥ! Улысал азьло сямен ик курадӟытэк, библиотекаын книгос вылын кӧласа. Котьку тодко вал ук, со мынэсьтым интереснойзэгес кышномурт шедьтоз шуыса! Ну и дура мон! Озьы ик кулэ мыным!» шуыса мыжыкеныз ӝӧк выллэ шуккиз. Ӝӧк вылын сылӥсь тусьты-пуньы жингыр-куангыр вазиз.

Ӧсын усьтон берытскиз. Спонсор пыриз. «Папа бертӥз! Папа бертӥз!» пиналъёсыз папазылэн чыртыяз ошиськизы.

– Кытӥ калгыса ветлӥд?! – вожпотонназ куалекъяса кеськиз Ныл.

– Неужели бабись принцессамы сайкам, – юри исаса вазиз Спонсор.

– Ну-ко ымдэ пытса, сука! – кеськиз Ныл.

«Э-э-э! Тон ма тазьы дауртӥськод? Ассэ гажась ныл таӵе кылъёсын уг вераськы!»

Иди на хуй, сука! Мыным табере ваньмыз по хуй!

«Тон кинлы али верад? Мыным или Спонсорлы?»

Задолбали, сволочьёс! Мынэ ваньды сӥтянэ! Кулэды вал! Ненавижу! Адӟеме уг поты!

Ныллэн синъёсыз ӝуало, мугорыз куалекъя. Спонсор кышканназ туалетэ пегӟиз но ӧссэ пытсаз.

– Ну-ко пот отысь, сволочь! Ӧд ке поты, али вань фарфоровой коллекцидэ пильыло. Куинёзь лыдъясько. Одӥг … кык …. куинь … – пилиськем куара кылӥськиз.

– Эн иса коллекциме, психопатка! – туалет ӧс сьӧрысь кылӥськиз.

Нош ик пилиськем куара кылӥськиз. Собере эшшо но эшшо.

– Вот тыныд, вот тыныд, сука! Кӧня можно, сука, тазьы кышнодэ курадӟытыны! Кӧня можно удмурт нылъёсты мукет нылъёслы вошъяны! Да мон кадь чидасьсэ, сука, улытозяд уд шедьты ни! Мон кадь ужасьсэ, сволочь, улытозяд уд пумита ни! Мын, мын, кошкы татысь деловой тёлкаосыд доры! Учком, кема-а чидалозы тонэ со эгоисткаосыд!

Нош ик пилиськем куараос кылӥськизы.

– Вот тыныд, вот тыныд, сука! Вань удмурт нылъёс понна! Вот тыныд! Ах тыныд интересной кышно кулэ, кудӥз ялан развиваться кариське, туала улонлэсь бере уг кыльы?! Сӥтясал мон со интересной улонды вылэ! Интересной улонды мыным неинтересно! Сяласал мон со бутикъёсты вылэ, развивашкаосты вылэ, модной выставкаосты но фестивальёсты, семинаръёсты вылэ! Кошко дорысьтыды, огнам уло! Удмурт гуртысь корка басьто, картошка мертто, ыж вордо, голошаен ветло.

– Мама, дугды, мама, дунды ини …. – пиналъёсыз бӧрдо.

– Ну-ко дугдэ бӧрдэмысь, вогпуйыос! Таосыз но вогало-вогало, вогало-вогало. Телефонэн шудонэз гинэ тодӥськоды! Мон тӥ быдӟа дыръям бакчае кыед поттылӥсько вал ини! Кӧня можно?! Дышетӥськод-дышетӥськод удмурт кыллы, дышетӥськод-дышетӥськод. Как только азбаре пото, соку ик ӟуч кылэ выжо! Кӧня можно?!

– Отын ваньмыз ӟуч сямен верасько ук… – нискетӥсь куара кылӥське.

–  Удмурт кыл понна выриськод-выриськод, ужаськод-ужаськод, куриськод-куриськод, миллион проект лэсьтӥськод-лэсьтӥськод, всёравно пиналъёс уг ни верасько! Полный пиздец! Кӧня можно?! Надоело!

Нош ик маке но кежыр-куажыр! вазьыса сӧриськиз.  

– Ну-ко пот отысь шуи, сволочь!

Спонсор уг вазьы. Соку Ныл гуразьпалась тусьты вайыса, тусьтыез туалетлэн ӧсаз сэрпалтэ. Тусьты жингыр-куангыр! карыса пилиське. Собере кыкетӥез тусьты лобӟе. Тусьтыос бырем бере, хрустальной бокалъёс туалет ӧсэ лобӟо. Собере графин. Пукон кутыса вань зеркалъёсты пильылэ. Зеркал миллион пырыослы пазьгиське, жильыыыыыр! вазьыса пырыос кизили зор сямен пол вылэ усьыло.

Ныллэн син азяз валес йӧтэ. Кӧня со отын кыллиз! Кӧня кӧлӥз! Тырмоз кӧлыса улыны! «Ну-ко сайка, сука! Усьты синдэ! Кӧня, блять, можно кӧлыны! Вань улонэд ведь озьы ик ортчёз кӧлыса! Уд но шӧдылы. Сайкааааа!». Валессэ кесяны кутске, качы кутыса дуно буртчин шобретэз ӟустарилы пӧрмытэ, миндэрез кесяса кужмысь пол шоры сальылэ. «Сайка шуи! Сайка!». Миндэр мамык пасьтана пурӟе, лымыяны кутске.    

Ма пилиське, ваньмыз пильылыса быремын. Ныл йырзэ ӝутэ, потолокысь люстра адӟе. Люстралэн эксклюзивной дизайнэз, кунгож сьӧрысь заказать карем материаллэсь лэсьтэмын, быдэс Москваез бугыртӥзы, та люстраез утчаса. Ныл швабра кутэ но люстрае шуккылэ. Люстра отчы-татчы шонаськыны кутске. Кӧня ке улыса, Спонсор ӧс сьӧрысь жон-жон, дымбыр-дамбыр, жингыр-жангыр куара кылэ. Быдэс Москва зурка.

Чалмыт луиз.

– Мон яратӥсько тонэ, – туалет ӧс сьӧрысь Спонсорлэн куараез кылӥськиз. – Мыным ӧвӧл кулэ интересной кышно, мыным тон гинэ кулэ. Мон тон кадь адямиез ноку но ӧй на пумиталля. Потэ ке, ойдо гуртэ улыны кошком, пудо вордом, бакчасиён будэтом, пиналъёсмы удмурт кыллы умойгес дышозы.

Чалмыт.

Спонсор ӧсэз усьтӥз, йырзэ месӥз. Ныл чай юыса пуке, пластмассовой шудон ӵашаысь. Коркан ваньмыз пильылэмын, куашкамын.

– Лыктэ чай юыны, – шуэ. Спонсор но пиналъёссы чай юыны лыкто. Ваньзы ӵошен пластмассовой ӵашаосысь чай юо.

Выжыкыл быриз. Тау лыдӟемдылы!