Текстэз гожтӥз но туспуктылӥз Светлана Едыгарова.

Котькуд ар яблок вуэм бере крамбл нимо пирог лэсьтӥсько. Вань семьяе яратэ. Азбарамы кык яблокпу будэ. Пиналъёс яблок окто но мон со яблокен кӧня ке пол крамбл пыжисько.

Крамбл яке crumble (английской кылысь “пыргытыны, юдыны” шуыса берыктӥське) – со английской десерт, узы-борыен яке мукет емышен пыжем пирог. Тужгес но тодмо вариант – яблокен. Сое туж капчи но ӝог лэсьтыны луэ, трос олома но кулэ ӧвӧл. Та пирог Великобританиын кыкетӥ быдӟым ож дыръя тодмо луэм, малы ке шуоно, лэсьтонэз туж дунтэм но огшоры: пызь, песок, вӧй но кыӵе ке емыш сяна номыр кулэ ӧвӧл. Францие но та пирог англичанъёс дорысь вуэм. Франциысь Нормандия яблоклэсь сиён-юонэныз тодмо. Яблокен крамбл но туж яратоно сиён татын.

Кулэ луоз

6 – 7 яблок. Азбарысьтымы яблокъёс пичиесь, чырсэсь но чурытэсь, соин тросгес понӥсько. Таӵеосыз умой тупало крамбллы.

50 гр. вӧй (сливочной)

Ыльняньлы:

220 гр. пызь

200 гр. песок

200 гр. вӧй (сливочной)

Лэсьтӥсько тазьы

Яблокъёсты вандылоно но кидыссэс, шорсюлэмзэс басьтоно. Юдоно.

Яблокез табаын вӧйын пыжоно кӧня ке, зарниям но небыт луытозяз.

Пызез, песокез но вӧез одӥг тэркые поныса сурано но киын кырмано. Вӧй кӧня ке шунам бере, ыльнянь однородной но дась луэ. Таӵе ыльнянез ӟуч сямен песочное тесто шуо.

Пыжиськон тэркыез вӧйын зырано. Ыльняньлэсь 3/4 люкетсэ пыжиськон тэркые, пыдэсаз но дуръёсаз, чиньыосын зӥбылыса пононо.

Пыжем яблок понӥсько.

Собере вылаз кылем ыльнянез пыргытӥсько.

Гуре 180 °C шунытэ понӥсько 40-50 минутлы.

Тани таӵе пӧрмиз таязэ пироге.

Пирогез, кылсярысь, корицаен чеберъяны луэ. Таӵе пирог эшшо мороженоен ческыт луэ.

Ческыт мед кошкоз, эшъёс!