Туэ корона вирусэн сэрен кунгож сьӧры потаммы ӧз луы, Удмуртие но ӧм бертылэ, малпамы семьяен тросгес Финляндиез учкыны-котыртыны. Озьы одӥгаз арня пумын Порво городэз учкыны ветлӥмы. Хельсинкиысь Порвоозь 50 км. гинэ. Ми Хельсинкилэн шундыӝужан (восток) палаз улӥськом бере, милемлы эшшо но матын мынонэз, машинаен ог 40 минут гинэ.

Порво (Porvoo) ним швед Borgå нимлэсь, пе, пӧрмемын. Швед сямен вераськись адямиос али но та городэз Борго (Borgå) шуо. Borg швед кылысь «замок» шуыса берыктӥське, нош -å со «шур» луэ, пе.

Та городлэн нимыз нырысьсэ 14-тӥ даурын, пе, пумиське. Соку со Швед королевствое пыре вылэм 1809-тӥ арозь. Россия шведъёсты вормем бере (1808-1809 аръёсы) Финляндия Российской Империлэн люкетэз луиз, озьы ик Порво но.

Порво море дорысь кыдёкын ӧвӧл. Порвоонйоки (Porvoonjoki) шур кузя ӝоген мореозь вуоно. Соин Порвоын трос яхтаос, корабыльёсыз но вань. Мореетӥ лыктыса, соослэн пырак Порвоозь тубемзы луэ.

Ми лыктӥмы машинаен. Вашкала чугунсюрес вокзал доры машинамес кельтӥм. Али татчы поездъёс уг ветло ни. Татын дунтэк парковаться кариськон интыосыз трос. Вуж городозь матын.

Таяз фотоын шур сьӧрысь вуж Порво. Вашкала черк, пулэсь лэсьтэм но пӧртэм буёлъёсын буям лапег коркаос.

Шур вамен потыса, тани таӵе излэсь лэсьтэм сюрес кузя тубиськом черк пала.

Вуимы черк азьысь площаде.

Таиз черк. Кафедральный собор Девы Марии шуыса нимаське. Та черк нырысьсэ 1450-тӥ ар котыр пуктэмын вылэм. 1809-тӥ арын Россиялэн императорез Александр I та черкын Финляндиялэн Российской Империе пыремез сярысь ялэм. Милям черке пыреммы ӧз луы, отын кыӵе ке но церомония мынэ вал.

Тани таӵе коркаосты Скандинавской странаосысь трос шедьтыны луоз. Нап-горд буёл – Скандинавиын типичной буёл.

Малы нап-горд буёл? Таӵе буёлэз эшшо фалун горд (фалунская красная) шуо, пе. Нимыз Швед Фалун городысь потэмын. Та городын горд ыргон (медь) потто вылэм, но солэсь буёл лэсьтыны кутскиллям. 17-тӥ даурын гуртын улӥсь адмиос та буёлэн пу коркаоссэс буяны кутскиллям, мед, пе, пу корказы кирпичлэсь лэсьтэм коркалы тупалоз, узыр муртъёслэн выллем. Нош узыр муртъёс из коркаоссэс ӵуж но тӧдьы буяны кутскиллям. Куанергес муртъёс азьланяз но коркаоссэс фалун буёлэн буяллям, малы ке шуоно, со умойгес пу коркаез уте, дуныз но дунтэм вылэм. Таӵе буёл традиция али но улэ.

Тани таӵе пичи проулкаос татын трос. Куинь пу корка: одӥгез – ӵуж, мукетыз – чагыр, куинетӥез – тӧдьы.

Таиз вашкала городской площадь.

Таиз ратуша вылэм. Ратушаын городэн кивалтӥсь адямиос пуко. Али татын музей.

Порво шур дурын сылӥсь пулэсь лэсьтэм но пӧртэм яркыт буёлъёсын буям коркаосыныз тодмо. Со коркаос – амбаръёс. Вашкала дыръя отын море кузя пыжъёсын-лодкаосын ваем вузъёсты возё вылэм. Со амбаръёсты нап-горд буёлэн буяло.

Таиз швед кылъем лицей, Borgå gymnasium шуыса нимаське.

Швед кыл сярысь. Кема дауръёс ӵоже 1809-тӥ арозь Финляндия Швед королевстволэн люкетэз вал. Туннэ нуналэ Финляндиын вань сыӵе интыос, кытын адямиос, в основном, швед сямен верасько, кылсярысь, Финляндилэн шундыпуксён (запад) палаз Остроботния шуыса нимаськись регионын. Хельсинкиысь Турку пала мынку но швед кылъем интыос пумисько. Аланд шормуӵъёс Финляндие пыро ке но, вань калык швед сямен вераське, финнзэ уг тодо. Швед кыл Финляндиын официальной кыл луэ, соин вань нимпулъёс кык кылын гожтэмын, вань остановкаослэсь нимъёссэс кык кылын гожто но верало. Швед кылэз вань школаосын дышето, али швед кылэз дышетон, по-моему, 6-тӥ классысен кутске. Финляндиын вань швед кылъем садикъёс, школаос, лицейёс. Одӥгез швед кылъем лицей Порвоын.     

Шурлэн мукет палаз выль коркаос лэсьтэмын. Кинлы туала архитектура тунсыко потэ, учке, кызьы туала городын выль но вашкала архитектурной стильёсты огазеяны луэ. Нырысь ик, коркаос ӝужытэсь ӧвӧл, сыӵе ик буёлъёсын буямын. Выль материалъёслэсь лэсьтэмын ке но, пулэсь лэсьтэм элементъёсыз вань, малпан кылдэ, та коркаос быдэсак пулэсь лэсьтэмын шуыса.

Вашкала Порволэн шур сопалаз – ӝужыт но меӵ ярдур. Татын ӝужыт но пересь кызъёс будо, быдӟым изъёс музъемысь ӝутско.

Татысен, ӝужыт ярдурысен, вашкала Порво туж чебер адӟиське. Татысен одно ик фото лэсьтоно!

Рождество дыръя Порво выжыкыл кадь луэ! Одно ик вуыло татчы Рождествое но со сярысь эшшо одӥг пост гожто.