Текстэз гожтӥз Светлана Едыгарова, туспуктӥзы Светлана Едыгарова но Надежда Рипатти.

Дас вить аресам гуртысь городэ улыны кошки. Табере улонысьтым ӝыныезлэсь кемагес городын улӥсько ини: пӧртэм странаосын, пӧртэм городъёсын, пӧртэм кылъёсын. Озьы ке но, сюлмы весь гуртлэсь мӧзме, инкузьлы матэгес кыске. Паймисько, кызьы мукет удмурт гуртысь потэм адямиос уло, кызьы соос бадӟым городъёсын но мегаполисъёсын улыны дышо, кызьы соос пӧртэм культураосын но кылъёсын тупало, кызьы пиналъёссэс будэто. 2020-тӥ арын ноябре «Удмурт кышномуртлы» (лыдӟе татысь) нимаськись текст гожтӥ. Та текстын удмурт кышномуртлэн чеберезлы но кужымезлы паймемме верасько. Нош табере зэмос адямиосын вераськеме потэ, тодэме потэ, кызьы дуннелэн пӧртэм палъёсаз огшоры удмурт адямиос уло.

Дэмласько нырысетӥ интервьюме лыдӟыны. Тодматске – Надя Рипатти. Надялы 50 арес, вордскемын Игра районысь Зура гуртын. Финляндиын 22 ар улэ ини. Надя картэныз Хельсинкиын улэ. Пиналъёсыз ӧвӧл. Надялэн аслаз «Traveller» шуыса нимаськиз туристической фирмаез вань.

Надяез мон кемалась тодӥсько ини. Тодматскыкумы Удмуртиын улӥсько на вал. Финляндие студентъёслэн конференциязы ветлыкум, университетын ректорен пумиськон вал, отын пумиськи Надяен. Собере, Хельсинкие вуылыкум, Надя доры пыратэк ӧй кошкылы ни. Туж шумпотӥсько, та гожъяськонме Надя бордысен кутскисько шуыса.

Надяен интревью 2021-тӥ арын январе гожтӥ, Хельсинкиысь Ekberg нимо кафеын вераськыса пуким. Туэ милемлы туж удалтӥз – трос лымы усиз но кема шунатэк кыллиз. Кафеын пукыкумы укно сьӧрын туж чебер лымыяз. Вераськимы ӟуч но удмурт сямен, ӟуч сямен вераськеммес ачим удмурт кылэ берыктӥ.   

Светӥ: Надя, вера кӧня ке семьяед сярысь.

Надя: Семьяе бадӟым вал но вань. Ми вить кузя. Кык агае, кык апае, мон самой пичиез. Атае шофёр луыса ужаз, Играысь Зурае вузъёсты нуллӥз, анае кунян сюдӥсь-утялтӥсь вал. Мон но апайёсыным юрттӥськи анаелы. Озьы ми гужембыт вазь ӵукнаысен кунян сюдыны, кыед мычыны юрттӥмы. Анай-атае но агайёсы кулӥзы ни, апайёсы Зураын уло. Зураын трос ӵыжы-выжыосы, Глазовын но ӵыжы-выжыосы вань.

Светӥ: Ӵыжы-выжыосыныд кусып возиськод-а?

Надя: Бен, ӵемгес племянникъёсыным Viber но WhatsApp пыр кусып возисько. Татчы дорам куное вуыло.

Светӥ: Семьяяды кыӵе кылын вераськиды?

Надя: Ӟуч сямен. Анае ӟуч вал, нош атае – удмурт. Анае ӟуч гуртысь. Бызем бераз, Зурае вуыкуз, удмурт сямен пал кыл но уг тоды вал. Мон удмурт кылэз школаын ӧй дышеты, бускельёслэсь кылыса дыши. Бускельёсмы ваньзы удмуртъёс вал. Лыдӟиськыны но, гожъяськыны но удмурт сямен ӧй дышетскы. Туж умой уг вераськиськы, но ма кулэ, сое быгатӥсько вераны. Одӥгез бускельмы Калиста апай вал. Яратӥсько вал дорамы ветлэмзэ. Со вуриськись луыса КБО-ын ужаз. Дорамы лыктэ но, туж ӝог маке но шенгыль удмурт сямен вера. Нош ми валаса но ум вуттӥське. Со мыным сомында дэрем вуриз! Школаысь выпускное но со мыным дэрем вуриз.  

Светӥ: Зураын нош удмуртъёсыз-а, ӟучъёсыз-а тросгес вал?

Надя: Соосыз но, таосыз но. Азьло Зуринский район вал, нош Зура – райцентр. Зура котырысь гуртъёс – ваньмыз ик удмуртэсь. Куинетӥ класс бере пиналъёс Зурае дышетскыны лыкто вал, интернатын уло вал.

Светӥ: Тон Зураын вордскемын но будэмын, нош ку кошкид гуртысьтыд?

Надя: Школаез быдтэм бере кошки, 17 арес вал мыным. Нырысь Пермьысь торговой техникуме поступать кари. Аттестатам куиньёсыз ӧй вал бере, экзаментэк пыреме луэ вал. Собеседованиын мынэсьтым юало, малы татчы пыремды потэ шуыса. Нош мон сыӵе шузи маке шуисько: «Ма апае озьы вераз». Монэ, конешно, ӧз басьтэ. Иже кошки, отын одӥг арзэ оружейной заводлэн музеяз ужай. Отын ик Кезысь Катя нимо удмурт нылэн тодматски, собере солэн Надя нимо апаеныз эшъяськи. Надяен али но кусып возиськом, удмурт сямен гожъяськиськом. Уг ке но быгаткы, кызьы пӧрмытӥсько, озьы гожтӥсько. Со вала гожтэмме. Одӥг ар ужаме бере, нош Перме поступать карыны кошки, химической анализ лэсьтыны дышетӥсь училищее.

Светӥ: Тон химиез яратӥськод вал шат?

Надя: Уг яратӥськы вал.

Светӥ: Кытчы пӧрмиз, отчы пырид?

Надя: Озьы, о-о (серекъяськом). Дышетски, диплом басьтӥ, собере Пермьысь заводын басьтэм специальностея ужай. Пермьын 7 ар улӥ.

Гажано егитъёс, нырысетӥ дышетскемдыя ужамды уг ке поты, кышкыт ӧвӧл. Будэмдыя умойгес валалоды, ма яра, нош ма уг яра. Дышетскыны котькыӵе арлыдын луэ, пересьмыса но!

Светӥ: Кышкыт ӧй-а вал гуртысь лыктыса бадӟым городын улыны?

Надя: Ӧй, мон боевой кышномурт (серекъя), востэм но боевой. Нырысьсэ дышетскыны мыныкум, Перме поездэн уйин вуи. Нош мыным эшшо автобусэн Закамск районэ одӥг час котыр мыноно. Кызьы ке озьы вуи. Общежитие йыгаськи но, монэ ӧз лэзе пырыны. Нош кӧлэме потэ. Ӟусэз адӟи, сое куакъёс пӧлы кыски но озьы ӵукнаозь ӟус вылын кылли (серекъя).

Светӥ: Тон общежитиын улӥд-а?

Надя: Озьы. Общежитимы армия выллем вал. Нылъёс но пиос нимаз, ӧсэз ӵоганы уг яра вал, котькуд ӵукна комендант зарядкае ӝутэ. Зарядка кырын, котькыӵе куазь дыръя. Комнатаын вить кузя улӥмы. Дышетсконме быдтыса, Пермьысь Дзержинской нимо заводын ужай. Одӥг пол, гужем отпуске дыръя, Дима племянникеным Москвае ветлӥм. Мавзолее, пе, ветлэме потэ. Глазовысь Москвае плацкартной поездэн мынӥм, куинетӥ полкаын.

Светӥ: Азьло куинетӥ полкаын но ветлыны луэ вал шат?

Надя: Бен. Ӵыжы-выжыосмы дорын кӧлӥмы. Табере мынӥм Горд площаде, нош ГУМ-ын туж бадӟым черод мокасиныос дуре. (Мокасины – со басмалэсь пыдэпонон, туж модной Перестройка вакытэ). Иностранноесь, Венгриысь-а мар-а вал. И сылӥ ук! Черодэ вуыку, мынам размере ӧй вал ни, пичиосыз гинэ кылиллям, кыӵеез вал, сыӵезэ ик басьтӥ! (серекъя). Озьы ик ветлӥ. Мавзолее черодын сылыкумы, пыдъёсам бадӟым вупульыос вал ини! Собере пыдберзэ куасалтӥ но шлёпки карыса ветлӥ. Шедим ик Мавзолее (серекъя). Эшшо одӥг учыр сярысь верало Москвае ветлыкумы. Кока Кола но сосиска басьтэммы потӥз.

Егит удмуртъёс, мед тододы шуыса: Перестройка дорозь Советский Союзын улӥсьёс Кока Кола сярысь ӧз тодылэ, нош Перестройка вакытэ сосиска яке колбаса выллем сиёнэз но мукет товаръёсты Москваысь гинэ шедьтыны луэ вал.

Мынӥм «Елисеевский» магазинэ, Кока Кола отын гинэ вузало вал, басьтӥм. Табере бертӥськом ини электричкаен ӵыжы-выжыосмы доры но Кока Кола юиськом, сосиска сииськом. Адямиос шорамы паймыса учко. Дима племяннике шуэ, ойдо, пе, удмурт сямен вераськом, мед, пе, милемыз иностранецъёс кожалозы. Озьы ик мынӥм электричкаын: сосиска сиыса, Кока Кола юыса но удмурт сямен вераськыса. Али Димаен пумиськиськом ке, Москвае ветлэммес тодамы вайыса гор серекъяськом. 

Светӥ: Пермьын заводын кема ужад-а?

Надя: Ӧй. Вовикен пумиськи но заводысь кошки, ми ӵошен коммерсантъёс луимы.

Светӥ: Нош маин вузкариды?

Надя: Парфюмерия вузамы. Москвае ветлыны кутскимы. Ӵапак соку Москваын Макдональдс усьтӥськиз. Макдональдсэ черодын сылӥм.

Яратоно песянайёс, Макдональдс – со Америкаысь лыктэм но быдэс дунне пасьтана вӧлмем кафе-ресторан выллем сиськон инты.

Светӥ: Самой нырысьсэ усьтӥськыкуз-а? Мынам та черодлэсь туж тодмо туспуктэмъёссэ адӟылэме вань.

Надя: Бен, самой со черодын сылӥм. Гамбургер кутӥм, картошка фри. Сыӵе ческыт потӥз. Нош али пыдме но Макдональдсэ уг лёгаськы.

Светӥ: Кызьы нош бизнэсэд мынӥз?

Надя: Вовикен ми люкиським. Бумага вылын договормы ӧй вал бере, со ваньзэ аслыз басьтӥз. Мон мае быгатӥ, сое гинэ басьтӥ. Собере финн картэным пумиськи.

Светӥ: Кызьы пумиськид финн картэныд?

Надя: Кинотеатрлэн кафеяз пумиським. Вовикен отчы пыримы вал. Соку Вовикен ӵошен улӥськомы вал на. Бускель ӝӧк сьӧрын иностранецъёс пуко. «Учкы, учкы, иностранецъёс!» шуисько Вовиклы. Пӧлысьтызы вуоно картме синйылтӥ. «Мын ук, ӧть сое эктыны» шуэ Вовик.

Светӥ: Со вал «высокий блондин с голубыми глазами»? (серекъясько)

Надя: Озьы, оо. Мон мынӥ но ӧти сое эктыны.

Светӥ: Озьы ачид дӥсьтӥд?! Мон ни за што озьы ӧй дӥсьтысал! (гор серекъяськом)

Нылъёс, дышетске. Маке кулэ ке, мынэ но басьтэ, возьмаса эн улэ, кин ке но мае ке но ваёз шуыса.

Светӥ: Нош собере?

Надя: Вылам соку туж чебер салатной костюм вал. Вовиклэн одӥгез тодмоез туж ӟеч вуриське вал, со мыным та костюмме вуриз. Собере Петри нимо выль тодмоеным Кам дурын пумиським, со мыным розочка кузьмаз.

Светӥ: Нош кин кинлы нырысь жингыртӥз?

Надя: Мон. Петрилэн мынам номере ӧй вал. Озьы ми пумиським, кафее сиськыны ветлӥм. Собере Петри монэ Выль ар пумитаны ӧтиз. Вовиклы верай, озьы-озьы шуыса. Уродэн люкиським. Со монэ квартирае ӵогаса кельтӥз, медам мон кошкы шуыса. Нош мон быгатӥ усьтыны но кошки.

Светӥ: Кӧня тон Петриен пумиськылӥд?

Надя: Пермьын ӵошен куинь ар улӥм. Собере Петрилэн контрактэз быриз. Со Финляндиысь строительной фирмаын ужа вал, со фирма нырысетӥосыз пӧлысь Перестройка бере Россие лыктэмын вал. Озьы ми 1999-тӥ арын Финляндие улыны кошким. Магазинысь «Кива ютту» финн кылэз дышетон книга басьтӥ, малы ке шуоно, финн сямен пал кыл но уг тодӥськы вал. Мынам сыӵе визае вал, котькуд 10 нунал граница пыр потаны кулэ вал. Озьы ветлыны акыльтӥз но брак заключить каримы.

Светӥ: Нырысьсэ Финляндие вуыкуд, мар малпад?

Надя: Порядок!Ваньмыз туж ӝикыт шуыса соку ик синйылтӥ! Ми Петриен машинаен лыктӥм Лапенрантае.Тодӥсько на, «Сокос» универмаге мынӥ. Отысь нижнее бельё адӟи, улытозям но таӵезэ адӟылэме ӧй вал на! Мертаськыны пыри, одӥгзэ мертай но потӥ, собере берен мертаськыны пыри. Адямиос абдраса шорам учкизы, дыр.    

Светӥ: Нош кытын улӥды?

Надя: Коткаын. Отын курсъёсын финн кылэз дышетӥ. Собере выль специальность басьтон понна дышетскыны документ сётӥ. Монэ Хельсинкие дышетскыны басьтӥзы. Сыӵе шумпотӥ! Кык ар туризмлы дышетски, Котка но Хельсинки вискын улӥ. Мон сяна курсъёсын эшшо одӥг ӟуч нылаш вал, соин эшъяськи. Дышетскыкум практикае «Traveller» шуыса нимаськись фирмае мынӥ. Кивалтӥсезлы ужаме яраз но дышетскеме бере со монэ ужаны ӧтиз. Табере кивалтӥсе пенсиын ини, нош мон солэсь акциоссэ басьтӥ но табере ачим фирмамылэн кивалтӥсез луи.

Светӥ: Финляндие улыны лыктэм берад, маиз самой секыт вал? Финнъёслэн кыӵе аспӧртэмлыксы тужгес но син шорад йӧтӥз?

Надя: Финнъёс бордазы матэ уг лэзё, картэлэн анаеныз но туж матын ӧм луэ. Таиз туж валантэм вал мыным. Милям вань семьяен эшъяськыса, ог-огедлы юрттыса улыны дышемын ук! Эшшо финнъёс туж огшоры дӥсясько. Нош милям магазинэ мыныку гинэ но, одно ик йырсидэ тупатоно, маке кулэ ӧвӧл дӥсяса уд мыны. Одӥг пол Коткаын магазинэ мынӥ шуба дӥсяса, ваньмыз шорам учко, одӥгез шубаме исаз но! Табере озьы уг ни дӥсяськиськы, табере офинниться кариськи ни (серекъяськом).    

Светӥ: Нош малы картэныд люкиськид?

Надя: Ӵошен кема улэм бере, мыным воштӥськонъёс кулэ вал. Солэн ӧз поты. Соку ойдо люкиськом шуи. Кема малпаськи, конешно. Озьы люкиським.

Светӥ: Ӧд-а кышка? Куке кунгож сьӧрын улӥськод, семьяед вӧзад ӧвӧл, эшъёсыд но трос ӧвӧл, туж секыт люкиськыны шуыса малпасько. Собере тыныд 42 арес вал ини соку, ӧд-а кышка пыраклы огнад кылёд шуыса?  

Надя: Ӧй.

Светӥ: Тон сыӵе боевой! (серекъяськом). Нош кызьы выль картэныд тодматскид?

Надя: Интернет пыр. Котькыӵеез шедьылӥз. Одӥгезлы пиналызлы нянька кулэ вал. Нош мынам нянька луэме уг поты, мынам яратӥсь кышномурт луэме потэ. Собере Интернетысь али картэлэсь фотозэ адӟи, мусо гинэ ымныртусыз, финнлы уг тупа, яраз. Ачим нырысь гожтӥ. Со соку ик ӧз гожты. Собере гожтэ, командировкаысь, пе, али гинэ бертӥ. Скайп пыр вераським, Норвегиысь вылэм, но финн выжыосыз вань. Люкиськемын но пиез вань. Оулуысь дорам Хельсинкие тодматскыны ветлӥз. Одӥг толэзь ортчыса ӵошен улыны кутским Хельсинкиын.

Светӥ: Нош малы пиналъёсыд ӧвӧл? Бер вал ни яке ӧз-а пӧрмы?

Надя: Мон тазьы аслым шуи: луизы ке пиналъёсы, луозы, ӧз ке – ӧз.

Светӥ: Нош уд-а жаляськы, пиналъёсыд ӧвӧл шуыса?

Надя: Уг. Пичи дырысен ик котырам трос пиналъёс вал, ӵыжы-выжыосылэн, бускельёсмылэн. Кӧты тыриз-а мар-а.

Светӥ: Табере идентитет сярысь юан. Тон астэ тросгес ӟуч адямиен яке удмурт адямиен шӧдӥськод? Яке кызьы со шӧдонъёс улонад вошъяськизы?

Надя: Мммм. Секыт вераны. Мон аслым котьку ачим кадь потӥсько.

Светӥ: Мар тыныд юрттэ аслыд ачид кадь потыса улыны?

Надя: Уг тодӥськы, сямы, дыр, сыӵе.

Светӥ: Нош Финляндие лыктыкуд, ӧд-а курадӟы, тон мукет, тон финнъёс кадь ӧвӧл шуыса?

Надя: Со сярысь одӥг но ӧй малпаськы. Секыт вал соиз, общение уг тырмы вал. Эшшо мон кылэз уг тодӥськы вал. Солэсь курадӟи, бӧрдӥ но. Гуртэ ӵемысь жингыртылӥ, анаеным но эшъёсыным кема вераськылӥ, туж дуно бен усиз озьы жингыртылэме. Собере аслым цель пуктӥ – финн кылэз дышетыны. Калленэн дыши но капчигес луиз, выль эшъёс шедьтӥ. Эшъёсын капчигес улыны.

Светӥ: Нош астэ удмуртэн куке но шӧдылӥськод-а?

Надя: Куке мынэсьтым юало, кытысь мон, Удмуртиысь шуисько ке, куд-ог финнъёс тон почти милям шуо.

Светӥ: Тросэз тодо, удмуртъёс финнъёслэн ӵыжы-выжызы луо шуыса, Финляндиын школаын та сярысь верасько.

Надя: Бен. Тужгес но Брангуртысь песянайёс Евровидение вулэм бере, тросэз тодо табере.  

Светӥ: Нош кызьы тон тодӥд, удмурт но финн кылъёс ӵыжы-выжы луо шуыса?

Надя: Уг но тодӥськы ни табере. Зураын школаын дышетскыкум на, финн-угор учёнойёс ветлӥзы, школьникъёслэсь анлыоссэс мертазы. Монэ ӧз басьтэ, мон чылкыт удмурт ӧвӧл шуыса. Соку тодӥ ни, дыр, финн-угор калыкъёс сярысь.  

Светӥ: Паймымон ук! Соос озьы генетической исследование лэсьтӥзы шат?

Надя: Уг тодӥськы.

Светӥ: Табере ужед сярысь вера.

Надя: Туристической фирмамы «Traveller» шуыса нимаське. Практикант луыса татчы лыктӥ, табере кивалтӥсько та фирмаен. Милям фирмамы Финляндиысь нырысетӥосыз пӧлысь Транссибирской магистраль кузя Пекинозь путешествиос радъяны кутскиз. Пумен клиентъёсмы тросгес луизы, но мукет интыосы но путешествиос радъяны кутскимы, кылсярысь, Кавказэ, Средней Азие но Азие, Европаысь странаосы. Со сяна фирмамы визаос лэсьтэ.

Светӥ: Тодӥсько, Удмуртие но финн туристъёсты вайылӥд шуыса.

Надя: Озьы. Одӥг пол Удмуртие но финн туристъёсын группа вайылӥ. Туж умой ветлӥм! Удмурт гуртысь песянайёс милемды нянен-сылалэн пумитазы, кырӟазы. Финн туристъёсы синвуаськизы. Иже, Глазове вуылӥм, Иднакарез адӟим.

Светӥ: Пандемия дыръя нош кызьы ужад?

Надя: Ужмы султӥз. Туристъёс ӧй вал. Инмарлы тау, фирмамылэн долгъёсыз ӧй вал. Эшшо государстволэсь грант басьтыны быгатӥм Финляндия пушкытӥ туризмез радъян понна. Али та бордын ужаськомы. Грант ӧй ке басьтысалмы, секыт йӧтысал. Тросэз туризм удысын ужасьёс грант ӧз басьтэ. Соку соос финн парламент азе мылкыдзэс возьматыны потӥзы. Сомында налог тырыса, секыт югдур кылдыку государство соослы ӧз юртты шуыса малкыдзэс веразы. Нош туризм удыс тужгес но курадӟе пандемия дыръя. Люкаськемъёс азе министр но мукет адямиос потазы вераськыны. Табере грант басьтон понна куронъёс ӧжытгес луизы кадь. Картэ но ужтэк кылиз.      

Светӥ: Нош мар кариськод буш дырыд вань дыръя?

Надя: Яратӥсько нюлэскы ветлыны, узыяны-эмезяны, губияны. Со сыӵе терапия выллем (серекъя). Пандемия дыръя ӵем нюлэскы ветлӥ, трос эмезь бичай, губияй. Спортэн вырисько. Эшшо восточной эктонъёслы дышетскисько, кылсярысь, «танец живота» нимаськись эктонлы.

Светӥ: Тон вералляд вал, Тарья Халонэн но отчы ветлэ шуыса.

Тарья Халонэн – со Финляндилэн азьвыл президентэз, та дырозь одӥг гинэ кышномурт президентэз.

Надя: Бен, со но милемын эктыны ветлӥз. Ӵемысь коӵышез сярысь вералляз, кудзэ солы Путин кузьмаз.  

Светӥ: Кызьы нимыз коӵышезлэн?

Надя: Уг ни тодӥськы. Раздевалкаын дӥсьмес воштыкумы, весь вера вал со сярысь.

Светӥ: Тон но соин вераськид-а?

Надя: Одӥг пол со маке но юаз. Мон солы маке но верай, но уг ни тодӥськы, ма верай.

Светӥ: Чебер дӥсяськыны яратӥськод-а?

Надя: Яратӥсько, туж яратӥсько!

Светӥ: Кыӵе брендъёсты яратӥськод?

Надя: Азьло, кылсярысь, Guess брендэз яратӥсько вал, нош табере брендъёсты уг ни учкиськы, маке тупа ке, сое ик басьтӥсько.

Светӥ: Кыӵе бен магазинъёсы ветлӥськод?

Надя: Guess, Vila. Stockmann (Стокманн) – яратоно магазинэ. Интернетысь Zalando-ысь басьяськисько. Мон яратӥсько магазинэ ветлыны. Отчы лыктӥськод, мертаськиськод, тонэ обслуживать каро. Яратӥсько путешествиосы ветлыкум отысь мае ке но басьтыны. Кылсярысь, Молдавиысь туж чебер, калык орнаментэн, дэрем басьтӥ. Туж сумкаосты, пыдэпонон яратӥсько. Сомында пыдэпононэ! Уг но тодӥськы ни, кыӵе пыдэпононэ вань (серекъя).

Надя улэ Вуосаари шуыса нимаськись Хельсинкилэн районаз, зарезь дурын. Квартираез бадӟым, кык этажъем, террасаез вань. Квартираяз саунаез (мунчоез) вань. Финляндиын тросаз выль квартиросын мунчоез вань.

Светӥ: Тон туэ 50 арестэ пусйид. Кызьы пусйид?

Надя: Туристической лайнере круиз басьтӥ вал, картэным но эшъёсыным дуннеез учкыны. Но корона вань планъёсты сураз.

Светӥ: Мылкыдыд куашказ-а?

Надя: Ӧз. Гуртын умойгес гинэ пӧрмиз вордӥськем нуналме пусйыны. Узбек ресторанысь туж трос плов заказать кари, быдэс арня сиыны вырим, куноосылы но сьӧразы келяй.

• 

Светӥ: Аслыд пересь потӥськод-а?

Надя: Кызьы вералом ай… Арлыдэз уд дугдыты. Мыным али та аресам туж умой.

Светӥ: Нош егитомон процедураос лэсьтӥськод-а?

Надя: Уг. Ачим асме утялтӥсько. Ботоксъёс, синлысъёс лэсьтылэме ӧвӧл. Ваньмыз аслам (серекъяськом). Егит но чебер луон понна главноез – яратон но умой кӧлон, чылкыт омыр но умой мылкыд.

Нылъёс, мон 100 % соглаш Надяен!

Светӥ: Кыӵе яратоно сиёнэд?

Надя: Ваньзэ яратӥсько. Сӥль яратӥсько. Итальян сиёнэз яратӥсько. Удмурт перепечез яратӥсько. Алигес, 1-тӥ январе, куноосылы перепеч пыжи. Кылем арын пандемия дыръя куинь пол пыжи. Мынам паймымон рецептэ вань, племянникелэн кышноез сётӥз, туж ӝог но ыльнянез небыт луэ (рецептэз учке та текстлэн пумысьтыз).

Светӥ: Кыӵе яратоно книгаед?

Надя: Чеховлэсь книгаоссэ яратӥсько, тужгес но «Француз» шуыса нимаськись вероссэ.

Светӥ: Яратоно фильмед?

Надя: Ӟучъёсыз пӧлысь «Москва слезам не верит», нош кунгожсьӧрысь фильмъёс пӧлысь – «Крёстный отец».

Светӥ: Ого! Кыӵе фильмъёсты тон яратӥськод! Нош кыӵе кылын тросгес лыдӟиськиськод?

Надя: Ӝыны – ӝыны, ӟуч но финн кылын. Финн сямен информационной книгаостыгес лыдӟисько.

Светӥ: Кыӵе берпуметӥ книга лыдӟид?

Надя: Казахстанысь «Казахстанлэн историез» книга басьтӥ вал ӟуч кылын, сое лыдӟи.

Светӥ: Телевизор учкиськод-а яке тросгес Интернетысь учкиськод?

Надя: Финн телевидениысь иворъёсты котькуд нунал учкисько. Ӵукна ӟуч передачаосты Интернет телевидение пыр учкисько. Netflix-ысь сериалъёсты яратӥсько, огнам учкыку ӟуч субтитръёсын учкисько (соос вань ке), картэным учкыкум финн субтитръёсты лыдӟисько. Берпуметӥзэ «Острые козырьки» (“Peaky blinders”) нимо сериал учки.

Светӥ: Кытчы берпуметӥзэ путешествовать карид?

Надя: Лымшор Кипре кылем ноябре картэным ветлӥмы. Самолётэ билет басьтыса но гостиницаысь номер заказать карыса асьме коже ветлӥм. Куазез туж умой вал.

Светӥ: Тон трос путешествовать криськод, кыӵе инты тонэ тужгес но паймытӥз?

Надя: Монголия. Калыкез отын ӧжыт, туж паськыт степьёс. Воля отын. Кӧчылыса ветлӥсь монголъёслэн юртазы кӧлӥм. Юртаосазы сӥль куасьтыны ошылэмын, кутъёс лобало. Валес огшоры дранчаослэсь лэсьтэмын. Таӵе кӧлон интыез улытозяд уд вунэты! Нош вить кизилиё гостинацаысь валесъёс котькытын одӥг кадесь. 

Светӥ: Тон шудо-а?

Надя: Бен.

Светӥ: Ма тонэ шумпоттытэ?

Надя: Уже, яратон картэ, эшъёсы. Путешествиос.

Светӥ: Тон материться кариськиськод-а?

Надя: Бееееен! Удмурт, ӟуч но финн сямен! (Серекъяськом) Картэ ӟуч сямен уг вала. Йыры кур луыку кааак верало ӟуч сямен! «Мар шуид?» шуыса юа.

Светӥ: Надя, туж тау вераськыны соглаш луэмед понна! Туж шумпотыса но капчи мылкыдын вераськи тонэныд! Тон сыӵе синмаськымон кушномурт!

Надя: Аслыд тау!

Тазьы Надя перепечлы ыльнянь лэсьтэ:

300 мл. вуэз быректытоно но пызен одно ик быректэм бераз ик сурано. Пызез пужноно. Сылал пононо на. Собере нырконо, нырконо, нырконо. Туж ӝог но ыльнянез туж небыт пӧрме.

Нош тани Надялэн фирмаезлэн адресэз:

www.traveller.fi