• 

Оляен вераськиз но текстэз гожтӥз Светлана Едыгарова.

Азьланьтӥсько дуннеысь удмурт кышномуртъёсын тодматонме. 2020-тӥ арын ноябре удмурт кышномурт сярысь текст гожтӥ (лыдӟе татысь). Та текстын паймисько, кыӵе удмурт кышномурт чебер, ужась, пыд вылаз тып-тып сылӥсь адями. Табере зэмос кышномуртъёсын тодматӥсько. Нырысетӥ тодматскон Зура гуртысь потэм но Хельсинкиын улӥсь Надяен вал (лыдӟыны луоз татысь). Нош туннэ дэмласько Оляен тодматскыны.

Оляез мон университет дыръёсысьтым тодӥсько. Кыкнамы ик удмурт факультетын дышетскимы, Оля одӥг арлы бергес. Мон финн кылъя группаын, Оля – венгер группаын. Университетысь коридоръёс сяна, ӵемысь факультетысь огъя финн-угор ужрадъёсын пумиськылӥм. Университет бере мон Эстоние дышетскыны кошки, Оля – Венгрие кошкиз, собере Германие. Пинал ваем бераз, Оля удмурт кылын блог нуыны кутскиз, пиналъёсыз сярысь гожъяз, мадиз, кызьы нылъёсыз удмурт, венгер но немец кылын верасько. Жаляса верано, али блогез ӧвӧл ни, но табере Оля активно инстаграм нуэ. Отын Олялэн кык бамез вань: @vujuis но @ig.ol_ga. Собере аслам пиналъёсы вордскизы но туж тунсыко потӥз Олялэсь блогзэ лыдӟыны, кунгож сьӧрын удмурт кылъем пинал будэтон сярысь вераськыны. Пиналъёсмы ог-ёзоесь бере, куддыръя фэйсбук пыр гожъяськи-юалляськи. Малпай, блогам одно ик Оляен вераськеммес гожто шуыса!

Финн-угор кылъёсты дышетон но кунгож сьӧрын яке Ижкарын улыку пиналыныд осознанно удмурт сямен вераськон – со йӧспӧртэм феномен. Мон ӧй малпаськылы, удмурт филологиысь кыӵе отделение пыро, кыӵе кылын пиналъёсыным верасько. Мынам син азям котьку но туж яркыт примеръёс вал – удмурт нылъёс-пиос: Настя Петрова, Наташа Гусева-Дмитриева, Ирина Решетникова, Инга Игнатьева, Саша Егоров, Дима Денисов. Образованноесь, талантливоесь, иностранной кылъёсын вольыт верасько, Европа сямъя чебер дӥсяськемын, Европаын яке Ижкарын улыса но пиналъёсынызы удмурт сямен верасько! Яратоно эшъёсы, тӥлесьтыд адӟем карыса, финн-угор кылъёсты дышетӥ, пиналъёсыным удмурт сямен вераськыны кутски. Собере кин ке мынэсьтым адӟем карыса озьы ик кариз, Олялэсь адӟем карыса кин ке но озьы ик кариз. Тӥ бордысь, нылъёс-пиос, синмаськымон удмурт выжы потыны кутскиз! Тау тӥледлы! Тау анай-атайёстылы! Одӥгез та выжыысь – Оля. Ачим но та выжыысь ик луисько.

Оляен 2021-тӥ арын март толэзе zoom пыр вераським, ӵукна суббота нуналэ. Мон Хельсинкиысь, нош Оля Нюрнбергысь. Озьыен, тодматске!

Оля Игнатьева, вордскемын Алнаш районысь Кузёбай гуртын. Олялы 38 арес. Улэ Германиын Нюрнберг городын. Олялэн картэз венгер. Кык нылъёссы вань. Эмилиялы 9 арес но Валериялы 8 арес. Олялэн пиналъёсыз удмурт, венгер, немец, ӟуч кылъёсын верасько. Оля эрготерапевт луыса ужа.  

Светӥ: Мон али футболэн шудыны ветлӥ… (серекъя)

Оля: Туж умой! Тынад физзарядка вал ини. Тӥляд [Хельсинкиын] одӥг часлы вазьгес ук дырды?

Светӥ: Озьы, о-о. Кыӵе мар куазьды?

Оля: Куазьмы шундыё но кезьыт, плюс кунь градус возьматэ кадь.

Светӥ: Милям лымыя, кезьыт. Сюрес йӧӟектэмын, йӧ кынмемын. Тӥляд туннэ кин ма ужа?

Оля: Милям субботаосы ӟуч школамы (Олялэн нылъёсыз ӟуч кыллы дышетско). Но карантинэн йырин школазы онлайн. Соос али компьютер азьын пуко.

Светӥ: Кыкназы-а?

Оля: О-о, курадӟо.

Светӥ: Курадӟо?!

Оля: Дышетӥсьсы пинял ай. Со валэктэ, мар со глагол, мар со существительной. Марлы со кулэ, уг тодӥськы, но озьы дышетэ. Туж академической подход.

Светӥ: Нош нылъёсыд уг-а шуо «Уг поты дышетскеме. Малы косӥськод?»

Оля: Уг. Куддыръя шуыло, малы милемлы субботае но дышетскыны кулэ. Нош мон верасько, мон быдэс улонме субботаосы дышетски.

Германиын но Финляндиын пиналъёс но студентъёс субботаосы уг дышетско.

• 

Светӥ: Тӥ улӥськоды Нюрнбергын?

Оля: Бен. Туж вож татын. Вӧзамы ик бадӟым парк. Туж умой татын. Нылъёс асьсэ понна школае пыдын ветло.

Светӥ: Нош ужаськод …

Оля: … эрготерапевт луыса.

Светӥ: Валэкты, ма со сыӵе.

Оля: Секыт валэктыны (серекъя). Интернетын реабилитационной терапия шуыса нимаське. Татын Германиын ми нылпиосын трос ужаськомы. Сенсориказэс юнматыны юрттӥськом, концентрироваться кариськыны, крупная-мелкая моторикалы дышетӥськом.

Светӥ: Адямиослэн диагноззы луыны кулэ-а?

Оля: Германиын школа азьын пиналъёслэсь развитизэс эскеро. Ӵемысь отысь нылпиосты дорамы лэзё. Ужам кык нылпи Даун синдромен вань. Вань эшшо пересьёс, кудъёсыз деменциен яке инсульт бере. Германиын инсульт бере адямиослы быдэс арлы эрготерапия выписать каро. Ми медстраховкаен ужаськомы. Страховка терапия понна тыре, куддыръя ӝынызэ гинэ. 8 аресозь нылпиослы дунтэк терапия ортче. Эшшо операциос, переломъёс бере терапия лэсьтӥськом. Туж бадӟым удыс та, соин яраз. Ачим тужгес пиналъёсын яратӥсько ужаны, малы ке шуоно, результатэз вань.

• 

Светӥ: Тон Кузёбай, Кузебаево, гуртын вордскемын?

Оля: О-о. Алнашский районын.

Светӥ: Семьяяды кӧня кузя тӥ?

Оля: Мон но апае. Апае куать ареслы бадӟымгес. Мамае-папае вал. Мамае кулӥз, куке мыным дас вить арес вал, папае кунь ар талэсь азьло кулӥз.

Светӥ: Кытын ужазы мамаед-папаед?

Оля: Папае математика дышетӥз Кузёбайысь школаын, нош мамае фельдшер вал.

Светӥ: Тӥляд туж тодмо удмурт гурт, диалектты но вашкала асьтэлэн. Гуртты эшшо вашкала осконъёсыныз тодмо. Нош тынад вань-а вуылэмед вашкала вӧсяськонъёсы яке со выллем ужрадъёсы?

Оля: Папае мынам ветлэ вал Лудэ. Милям семьямы, Игнатьевъёс, Луд выжые пырисько вылэм. Куке но ветлэмысь дугдӥллям. Кулэ вылэм чебер дӥськут, вӧсяськыны тӧдьы дӥсяськыса мыныны кулэ вылэм. То ли уксёзы ӧвӧл вылэм, то ли уг ни тодӥськы малызэ, но вӧсяськонъёсы ветлэмын ӧвӧл со, куке строгоесь правилоос вал на, видимо. Озьы верамез вань папалэн. Но берло аръёсы папае ветлэ вал Лудэ. Тодӥськод, дыр, кышномуртъёс отчы уг ветло. Аслам пичи дыръям Куалае ветлэм вань ӝук сиыны, отын ӵӧж вандо, ӝук пӧзьто.   

Светӥ: Со гурттылэн яке кинлэн ке выжыезлэн вӧсяськонэз?

Оля: Со гуртысь именно Куала выжыослэн вӧсяськонзы. Нош мон эшъёсыным-а мар-а тупай вал раз мон Куала выжы ӧвӧл. Ӧтизы, дыр, вал но, мон мынӥ. Гуртамы эшшо Булда выжы вань на, прямо вӧсяськоназы ветлэме ӧвӧл, но тодӥсько кытынзэ.

• 

Светӥ: Тынад аслад комнатаед вал-а?

Оля: Папаелы выль корка сётӥзы специалистлы шуыса. Бадӟым шумпотон вал. Милям апаеным ӵошен комнатамы вал. Кык этажъем валесмы вал, мон вылӥяз, апае улӥяз изимы. Но дорысь ужме мон залын лэсьтӥсько вал, телевизор учкисько вал, «До 16 и старше» передачаез яратӥ.

Светӥ: Кыӵе яратоно шудонъёсты вал пичи дыръяды?

Оля: Мон туж кема шудэмын мунёосын. Дас арескам нырысетӥ барбиос потӥзы, дӥськут вурылӥ соослы. Урамын эшъёсыным трос шудылӥ. Тупен трос шудӥськом вал. Урам пумын быдтымтэ бугроос вал, отын ӵемысь шудӥськом вал. Бакча сьӧрамы трос кызьпу будэ вал, отын шудыны яратылӥ, котькуд кызьпу со нимаз корка шуыса шудылӥ.

• 

Светӥ: Тон отын ик Кузёбай школаын дышетскид-а 11-тӥ классозь?

Оля: Озьы. Как раз соку школаямы 10-11-тӥ классъёс усьтӥзы.

Светӥ: Нош кыӵе яратоно предметэд вал?

Оля: Мон ведь отличница вал. Школаез медален быдтэмын. Наверно, математика яратоно предметэ вал. Кызьы мон филологие вуи, ачим но уг валаськы.

Светӥ горрр серекъя.

Светӥ: Тӥляд быдэс гуртты удмурт ук. Школады но-а?

Оля: О-о.

Светӥ: Нош ӟуч кыллы кызьы дышид?

Оля: Мамаелэн сузэрез Воткинскын улэ вал, мукетыз сузэрез Алнашын улэ. Алнашысь двоюродной сестрае бон вераське удмурт сямен. Воткинскысь двоюродной сестраосы ӟуч кылын верасько. Тодӥсько на, кызьы соосын ӟуч сямен турттӥсько вераськыны, кызьы родъёсты сурасько вал, кызьы соос серекъяло вал. Соос котькуд гужем бертало вал, бабае доры кылё вал, соллань-таллань урамысь-ураме ветлӥськом вал. Гожтэтъёс почта пыр гожъяськом вал ог-огмылы.

Светӥ: Кин луэмед потэ вал пичи дыръяд?

Оля: Врач, конешно, мама кадь. Мамае фельдшер вал, апае но фельдшерлы дышетскиз. Со али фельдшерын ужа. Мон но аръёс ортчемъя медицинае кошки, только Германие лыктэм бере.

• 

Светӥ: Нош кытчы али бертылӥськоды?

Оля: Татчыозь папае доры бертылӥмы. Но кык ар талэсь азьло папае кулӥз. Коркамес вузамы. Со дырысен кык ар ӧм ни бертылэ пандемиен сэрен. Но ӵыжы-выжыосы трос, капчиен быгато бертылыны.

Светӥ: Тон школа бере, 11-тӥ класс бере кошкид-а? Сразу удмурт факультетэ пырид-а?

Оля: Сразу. Медале вал бере, экзамен удмурт кылъя но литературая гинэ сётоно вал. Венгер кылъя группае пыреме потэ вал.

Светӥ: Малы именно венгер группае пырид?

Оля: Настя Петрова! Мон «Шундыкаре» ветлэмын ук!

Серекъяськом кыкнамы.

«Шундыкар» со удмурт пиналъёслы лагерь, котькуд гужем ужа. Отын пиналъёс кырӟаны, эктыны, гожъяськыны-кылбураны, проектъёс лэсьтыны дышетско.

Финн группа луысал ке, финназ пырысал. Настя пыр тодӥсько вал, удмурт филологиын финн-угор отделение вань шуыса. Со милемыз дышетӥз («Шундыкарын») финн, венгер кырӟанъёслы. Со кельшиз, малпай, со отделение тупалоз мыным шуыса.

Яратоно Настя! Тон шоры учкыса но тыныд синмаськыса, тынэсьтыд адӟем карыса, сомында удмурт нылъёс улонзэс финн-угор кылъёсын герӟазы, анай кылзэс гажаны но яратыны дышизы! Мон но шорад котьку синмаськыса учкисько, тынэсьтыд адӟем карисько! Тау тыныд, Настя!

Светӥ: Удмурт филологие соин сэрен пырид-а?

Оля: Соин сэрен.

Светӥ: Тон яратыса дышетскид-а удмурт филологиын?

Оля: Мон мукетсэ уг тодӥськы вал, уг быгатӥськы вераны. Эшъёсы умоесь вал. Мон ӝыны арзэ двоюродной сестрае дорын улӥ, собере общежитие потӥ. Мыным сок ик двухместной комната сётӥзы, бордам однокурссницаме Родионова Алёнаез ӧти. Ми ӵошен дышетскон пумозь улӥмы.

Светӥ: Дышетскыкуды Венгрие вуылӥды-а?

Оля: Нырысь Алёна Родионова ветлӥз, собере монэ Дебреценэ одӥг толэзьлы ыстӥзы.     

Светӥ: Тон соку нырысьсэ кунгож сьӧры потад-а? Кыӵе нырысетӥ малпанъёсыд вал? Кӧня арес вал тыныд?

Оля: Конешно нырысьсэ!19 арес вал мыным. Поездэн ветлӥ, виза басьтыса. Выжыкыл выллем вал со мыным! Сыӵе чебер город, чебер, вашкала университет. Адямиос но туж мукетэсь. Ӵем экскурсиосы нуллӥзы милемыз. Мон соку нырысьсэ электронной почта лэсьтӥ. Австриысь одӥг ныл лэсьтыны юрттӥз.

Светӥ: Ӧд-а мӧзмы?

Оля: Мӧзми. Собере гужем пумын бертӥ но, сентябре монэ Будапештэ ӝыны арлы дышетскыны келязы. Мынам озьы ветлэме бӧрсьысь-бӧрсьы луиз. Куинь кузя кошким. Кыкетӥзэ кошкыкум, бӧрдыса кошки ини.

Светӥ: Тодӥськод на-а Кельмаковлы экзамен сётэмдэ?

Гажано удмуртъёс! Вань сыӵе предмет удмурт факультетын – удмурт кыллэн исторической фонетикаез шуыса нимаське. Сое Валентин Кельмакович Кельмаков профессор нуэ. Та предмет куинетӥ курсын луэ, туж зол дасяськоно солы. Валентин Кельмакович туж зол тодосчи но дышетӥсь.

Оля: Конешно!

Серекъяськом.

Светӥ: Кыӵе юан шедиз тыныд?

Оля: Диалектной материал люкан амалъёс но ошмессинъёс. Шумпотӥ со юанлы. Но мыным Кельмаков малы ке но «кунь» пуктӥз, хотя мон туж умой дасяськи вал. Витетӥ курсын та предметъя выльысен экзамен сётӥ «горд диплом» басьтон понна.

Светӥ: Тон УдГу-эз но «горд дипломен» быдтэмын-а?

УдГУ со Удмуртский Государственный Университет луэ.

Оля: О-о. Туж кулэ, дыр, вал со мыным (серекъя). Но мон «кунь» понна укыр ӧй ӝожомы, тодӥсько вал, умой дасяськи шуыса. «Кунь» ке «кунь», со но алама ӧвӧл.

Гажано студентъёс, куддыръя экзаменъёс – со лоторея выллем. Ятыр зол эн куректэ оценкаос понна. Главноез – кыӵе тодон-валан йырады кылёз.

• 

Светӥ: Нош Ижевскын секыт вал-а улыны гурт бере?

Оля: Мон нырысь двоюродной сестрае дорын улӥ бере, секыт ӧй вал.

Светӥ: Тон, в основном, дышетскыса улӥд?

Оля: Дышетскыса улӥ, физкультураын плавание гожтӥськи. Мынам льӧль малпанэ вал бассейнэ ветлыны. Басьтӥзы платной группае, собере основнояз. Венгрие вутлыкум, монэ вань кельтэм занятиосме отработать карыны косӥзы.

Светӥ: Мон но озьы трос гинэ отрабатывать кари физкультураез. Физкультура УдГУ-ын главной предмет!

Горрр серекъяськом.

Светӥ: Табере вера, кызьы тон пыркалы Венгрие кошкид?

Оля: Кыкетӥ курсын дышетскыкум, Будапештэ ӝыны арлы ветлӥ. Соку вуоно картэным тодматски. 19 арес вал мыным соку.

Светӥ: Сыӵе кемалась!

Оля: Сыӵе кемалась! Ачим но паймисько!

Светӥ: Кызьы тӥ пумиськиды? Внимание! Али луоз романтическая история, как выйти замуж за иностранца!

Горрр серекъяськом.

Оля: Ми группаысьтымы кунь кузя Будапештэ вуэмын. Куке нырысетӥ стипендия басьтӥмы, мынӥмы ширпотреб базаре. Кытысь сыӵе интыосты но шедьтӥськом вал паймисько! Басьтӥм чебер дӥськут. Адӟимы урамысь дискотека сярысь ялон-объявление. Нылъёслы пыронэз дунтэк, пе. Малпам, чебер дӥськутмы вань, уксёмы вань бере, можно дискотекае мыныны. Эшшо общежитиысь дискотека луоз шуыса ялон адӟим. Малпаським, кудаз мыноно шуыса. Инмарлы тау, нырысетӥяз мынӥмы, сотэк картэным ӧй пумиськысал!

Светӥ: Со дискотекаын пумиськиды-а?

Оля: Озьы. Нырысетӥ венгер дискотекаын пумиськи (серекъя).

Светӥ: Нош соку венгер сямен быгатӥськод-а вал ини вераськыны?

Оля: Быгатӥсько ни вал. Эшшо Дебреценэ ветлэмын вал. Ми ведь Фейеш Ласло пыр потэмын. Удмурт факультетысь группаысьтымы ваньмы вераськиськомы вал. Фейеш Ласло зол милемыз тренировать кариз. Солы тау карыса, ми чалякгес дышим вергер кыллы. Милям группамы но зол вал. Со но зол дышетскыны мотивировать кариз.

Фейеш Ласло – со венгер кылтодосчи (учёной-лингвист), умой удмурт кылэз тодэ, УдГУ-ын вергер кыллы студентъёсты дышетӥз.

Дуно Ласло! Тау тыныд ӟеч ужамед понна! Визьмо но умой венгер сямен вераськись студентъёс будэтэмед понна! Венгриын удмурт студентъёслы юрттэмед понна!

• 

Светӥ: Будапештысь Удмуртие бертэмед бере бойфрендэныд (туганэныд) электронной почта пыр гожъяськид-а?

Оля: О-о. Адресме но сётӥ. Со мыным Кузёбае но, общежитие но гожтэтъёс гожъяз. Нош компьютеръёс соку 3-тӥ яке 4-тӥ корпусын гинэ вал, отчы электронной почтаме эскерыны ветлӥсько вал.

Светӥ: Мон но отчы ветлылӥ (серекъя). Мон туж вазь аслым электронной почта кылдытӥ. УдГУ-ын но уг на дышетскиськы вал. Мыным сое Саша Егоров кылдытыны юрттӥз, адресэ eudoramail.com вал. Эстониысь эшъёсыным озьы гожъяськи.   

Оля: Асьме корпусын но вал (2-тӥ корпус), но одӥг гинэ аудиториын – факультет иностранных языков. Отчы но пегасько вал. Соос уг тодо ук, кин пыре. Соос кожало вал, мон со кафедраысь шуыса.  

Гажано егитъёс, вал сыӵе дыръёс, куке Интернет бадӟым но дуно привилегия вал. Со но туж дыг вал. Электронной почтаез лыдӟон понна нимысьтыз интые мыноно вал.

Светӥ: Нош ку тон Венгрие улыны кошкид?

Оля: Мон 4-тӥ курсын эшшо быдэс арлы Балашие дышетскыны ветлӥ. Собере туганэным малпаським, одӥг ар мылкыдмес валаны тырмоз шуыса. Собере гужем мон дорад, пе, лыкто. Мон, может, уд ай шуисько, приглашениос да визаос лэсьтоно луоз. Нош со адӟеме, пе, потэ, кытысь тон лыктӥд (серекъяськом). Мон ӝог-ӝог папаелы шуи, ӧтен мед лэсьтоз шуыса.

• 

Светӥ: Вуоно картэд Кузёбае вуэмез бере мар малпаз?

Оля: Мон сое кызьы быгатӥ, дасяй. Солэн эшъёсыз соку гинэ Москвае ветлӥзы, вераськоназы весь Москва гинэ вал. Мон шуисько, асьмеос Москвалэсь кыдёкегес мыном (серекъя). Мыным потэ, солэн культуный шок вал. Ярам ини. Дышиз. Кык арня улӥз. Собере поездэ пуктӥм огназэ ӟуч кылэз тодытэк, проводницаослы чаклалэ сое шуим. Нош соосыз солэн рубыльёсыз вань-а шуыса юало (серекъяськом).

Светӥ: УдГУ-ез быдтыса, тон Венгрие ӵошен улыны шуыса кошкид-а ини?

Оля: Аспирантурае пыри. Нырысетӥ арзэ туганэным ӵошен улыны кутским соку.

Светӥ: Нош кыӵе темая диссертацидэ гожтӥд?

Оля: Мынам научной кивалтисе ӧй вал. Озьы ачим малпай [Анатолий] Уваровлэсь венгер кылысь удмуртэ «Нуналлы быдэ выжыкыл» берыктэмзэ эскерыны. Та ужме Фейеш Ласло эскериз, со ӧй вал ке но кивалтӥсе, туж юрттӥз.

Светӥ: Тон диссертация гинэ гожъяд, яке маке мукет но ужад?

Оля: Диссертация гожъякум, кык пол Финляндие вуылӥ. Мукет университетын переводчиклы дышетски на. Со университетын мыным ӵектӥзы студентъёслы ӟуч кылъя курс нуыны. Со самой умой дыр вал! Студентъёс визьмоесь, активноесь, англи кылэз умой тодо ни, дорам кунетӥ кыл дышето, туж тунсыко соослы ӟуч кыл. Мыным нош со уж туж кельше вал!

Светӥ: Кызьы нош Германие вуид?

Оля: Картэлы Германиын уж дэмлазы. Со юаз мынэсьтым, мон ойдо мыном шуи. Озьы Амберге улыны лыктӥмы. Собере картэлэсь контрактсэ одӥг арлы кузятӥзы, собере эшшо но эшшо. Германиын улыкумы ини диссертациме защитить кари 2011-тӥ арын. Малпай, можно сюан карыны но нылпи вайыны. Мынам уже вал немец кылэз дышетыны но нылпи вайыны (серекъя).

Светӥ: Сюан нош Венгриын кариды-а?

Оля: О-о, пичи гинэ сюан карим. Кузёбайын но берлогес пичи сюан карим.

Светӥ: Картэныд юри озьы бӧрсьысь-бӧрсьы нылпи вайыны малпады-а?

Оля: Самой ӧжытэз кык шуыса вераськемын вал. Нылъёсмылэн 1 ар но 1 толэзь виссы луиз. Ми шумпотӥм, озьы пӧрмиз шуыса.

Светӥ: Кызьы нош кенешиды, кыӵе кылъёсын вераськоды шуыса?

Оля: Кенешыса ӧм пуке. Ну, вордскиз нылпие. Мон апаеным, папаеным удмурт сямен вераськисько. Мон мукет кылын ӧй но быгатысал вераськыны. Со нонсенс луысал! Оло венгер сямен луысал вераськеме картэным венгер сямен вераськисько бере. Ӟуч кылын точно ӧй вераськысал. Картэ – венгер, мон – удмурт. Вот и венгер-удмурт кошкиз милям.

• 

• 

Светӥ: Нош ку тон блог гожъяны кутскид? Кытысь сыӵе малпан кылдӥз?

Оля: Пиналъёсы пичиесь вал ай соку. Малпанэ Ижысь Бузанова Машалэсь блогзэ адӟыса кылдӥз. Со но tambler-ын гожъя вал. Кельшиз блогез.

Светӥ: Кӧня ар гожъяд? Со юрттӥз-а тыныд?

Оля: Вить ар гожъяй. Со мынам дневник выллем вал. Апаелы фотоосты озьы капчигес вал адӟытыны. Со понна гинэ.

• 

• 

Светӥ: Табере вера, кызьы пиналъёсты верасько?

Оля: Ог-огенызы соос венгер сямен верасько, но ӵемысь школаен герӟаськем ужъёс сярысь вераськыкузы немец кылъёс пыртылыса венгер сямен верасько. Немец кылъёсты кутылыса, пумаз венгер суффиксъёс пуктыло. Удмурт кылын соослэн лексиказы уггес тырмы, конешно. Но апаеным удмурт сямен верасько, Кузёбае бертыса но удмурт кылэ капчиен выжо. Тужгес ик куке гурт нылпиос удмурт сямен верасько.

Светӥ: Нош тонэныд? Тон соослы удмурт сямен вазиськод ке, кыӵе сямен нылъёсыд тыныд вазё?

Оля: Ку кызьы. Тема огшорыгес ке, верало удмурт кылын. Но мон ӵем потасько нылъёсыным вергер кылэ. Мыным капчи потаны. Мынам вал «Мон ӧй вала» стратегие.

«Мон ӧй вала» стратегия со куке нылпиед кулэтэм кылын вераське, тон валамтэ улэ аналскиськод, «мон ӧй вала» шуиськод, мед кулэ кылын вералоз шуыса.

Собере Эмилия «А мон тыныд ӧй вера» шуыны кутскиз (Светӥ серекъя). Папаелы, пе, верай. Соин ик кыӵе ке конфликтъёс сярысь соослы капчигес венгер кылын вераны. Верало папазылы, а мон-то вожасько. Соин конфликтъёс но пушдунне сярысь лэзисько венгер сямен но вераны.

Светӥ: Интересно! Мынам пиосы али финн сямен трос вазё мыным. Мынам сыӵе стратегие ӧй вал. Удмурт сямен соос огшоры фразаосты верало. «Сиеме» шуо сиемзы потыку, «потэ» кылэз вератэк (серекъя). Кӧня ке золгес дышетоно вылэм.

Оля: Тӥляд но трос кылъёс семьяяды?

Светӥ: Трос, о-о. Куспазы финн сямен верасько. Мон но, куке шуг тема луэ, финн сямен верасько. Финн сямен капчигес вераны. Чувствоос, эмоциос, конфликтъёс сярысь. Кызьы дышиськод, кызьы садикын, школаын дышето, и тон но озьы повторять карыса вераськод ини, ма карыны яра, ма карыны уг яра.

Финн садикъёсын но школаын трос чувствоос но эмоциос сярысь верасько, улонлы дышетӥсь темаос сярысь трос верасько.

Куддыръя удмурт сямен валэктыны вырисько но, ачим но уг валасьы, ма верай (серекъя). Эшшо малпасько на, ӟуч кылысь кыл кутыса верано-а, яке выль удмурт кыл пыртыса верано-а. Папаенызы француз сямен верасько, умой верасько кыкназы.

Оля: Валало-а ӟуч кылэз?

Светӥ: Уг валало. Уг но дышето. Но урод кылъёсты тодо (серекъя).

Оля: Ми Нюрнбергын сыӵе районын улӥськом, кытын ӟучъёсыз трос. Соин но нылъёслэн ӟуч кыллы интерессы вань. Ӟуч школае ветло кыназы. Эшшо Италиысь кышномурт Интернет пыр арняяз кык пол ӟуч урокъёс нуэ. Отын соос лыдӟисько, собере верасько, грамматикаез ӧвӧл. Сое нылъёсы ярато.

Светӥ: Нош кызьы немец сямен дышетсконзы мынэ школаын?

Оля: Эмилия 3-тӥ классэ ветлэ, Валерия туэ 2-тӥ классэ мынӥз. Школаын кылын сэрен уг курадӟо. Мон нылъёсме яслие вазь сётӥ, соин соос немец кыллы чаляк дышизы. Школаын нокин уг тоды, соос доразы мукет кылын верасько шуыса. Уг шӧдӥськы.

Светӥ: Милемлы шуо вал, финн сямен кӧня ке словарной запассы уггес окмы шуыса. Татын Финляндиын пиналъёслы, кин дораз финн сямен уг вераськы, садикын (школаын но) нимысьтыз занятиос нуо но кылъя тестъёс лэсьтыло.

Оля: Милемлы озьы пока ӧз шуылэ. Валериямы школае пока рос-прос вытлымтэ ай пандемияен сэрен. Милям весь карантин, школаос ворсамын.

Светӥ: Венгер кылъя урокъёссы вань-а?

Оля: Нюрнбергын вань венгер кылъя урокъёс. Но милемлы бырйыны кулэ вал: венгер яке ӟуч урокъёс. Ӟучсэ бырйим, малы ке шуоно, со умой радъямын. Отын огдыре ик спорт, суредаськон но кыл радъямын. Нылъёсы гожъяськыны быгато венгер сямен. Эмилия дневник нуэ, немец букваосын венгер сямен гожъяське. Эшшо венгер песянаенызы венгер сямен верасько.

Светӥ: Удмурт сямен быгато-а лыдӟиськыны?

Оля: Быгато. Али Эмилия ачиз «Сяла курег» книгаез лыдӟе.

Светӥ: Книга лыдӟиськод-а нылъёсыдлы удмурт сямен?

Оля: Милям удмурт урокъёсмы вань. Интернет пыр арняосы Алёна Родионоваен, Юля Спешиловаен но нылпиосынызы пумиськылӥськом. Книгаосын бугыръяськиськом, выжыкыл лыдӟиськом, вераськиськом. Кыӵе ке но мотивация вань. Куке лыдӟиськыны уг на быгато вал, ачим суредъёсъя мадисько вал. Али словарьёс нылъёсылы тунсыко пото. Ӟуч-англи-удмурт словарез ярато, отчы немец сямен но кылъёс гожтыны лэзисько.    

Светӥ: Кыӵе хоббиоссы нылъёсыдлэн?

Оля: Ми активной семья. Куке пандемия ӧй вал, нылъёс арняяз куинь пол хоккее ветло вал. Гитараен шудыны дышетско.

• 

Светӥ: Тон кӧня ар декретын пукид?

Оля: Ваньзэ куинь ар пуки. Пукыкум немец кыллы дышетски. Шумпотӥсько, дышетски шуыса. Мон котьку яратӥсько вал дышетскыны. Нылъёсы но блокнотъёсын ветло. Эмилия мон кадь выре, пичи дырысен адӟемын бере, соос но озьы выро табере.

Светӥ: Табере культурной пӧртэмлык сярысь вераськом. Маиз секыт? Ма яра? Ма уг яра?

Оля: Венгеръёсын мыным котьку удалтылӥз. Общежитиын венгеркаосын улӥ. Соосын капчи вал. Куное но доразы ӧтьылӥзы. Нош немецъёсын уг эшъяськиськы, ужасько гинэ соосын. Немецъёс уг верасько. Куд-ог венгер но ӟуч семьяосын гинэ эшъяськиськом. Мон тросгес ӟуч песянайёсын кусып возисько татын, Германиын. Вань мынам сыӵе фрауэнклуб (Frauenclub), отын 50-60 аресъём кышномуртъёс пятницаосы огазе люкаськыло. Али пумиськылыны уг яра но, ми кырын калгиськом. Пӧртэм темаослы вераськиськом, мон соосты чильпаськыны дышетӥ. Мон ёзам кышномуртъёс татчы подросток дыръязы вуэмын, соос туж мукетэсь, мон соосын одӥг кыл уг шедьтӥськы.

Чильпаськыны – со одӥг векчи крючокен керттӥськыны.

Светӥ: Нош мар сииськоды семьяяды? Кыӵе сиён?

Оля: Мон чаляк сиён лэсьтӥсько, кылсярысь, пюре, рис но сӥль. Бакчасиёнъёс. Картэ венгер шыдъёс пӧзьтэ, яратэ пӧраськыны. Мон юрттӥсько солы, ма кулэ шуыса юасько, но картош, кешыр юдӥсько, со кылемзэ ачиз ваньзэ лэсьтэ. Картэлэсь венгер специосын пӧраськыны дыши. Немец сиён ми ум сииське, ресторанъёсын гинэ. Туж шер перепеч но чебурек пыжылӥсько. Нылъёсмы малпало, кухня – со папалэн интыез шуыса (серекъя).

Светӥ: Ачид нош воштӥськид ин-а? Немка яке венгерка кадь луид ин-а?

Оля: Табере мыным пунктуальность, порядок кулэ. Мае ке запланировать карид ке, кыл сётӥд ке, одно ик кылдэ возёно, пландэ быдэстоно. Вераськыса кенешиськод ке, мон оскисько, бумага вылэ договор гожтытэк. Татын пунктуация (запятойёс но точкаос пуктылон) мукет. Алигес ужам пумит луись мылкыдме электронной почта пыр гожтыкум, кивалтӥселэн нимыз бере кеськон пус пуктӥ вал. Соизлэн вожез потӥз, со кожаз мон озьы вожме поттӥ шуыса. Мон валэктӥ, чик йырме кур ӧй кар вал, соку, пе, отчы запятой пуктыны кулэ вал! (серекъя) Вот сыӵеезлы но дышетскыны кулэ. Эшшо комплиментъёс вераны дышетскисько. Ӟучъёс дышемын ук, нырысь тышкаськозы-возьытэ уськытозы, собере гинэ умойзэ вералозы.

Светӥ: Жагдэс нимаз карыны дышид ин-а?

Германиын но Европаысь куд-ог странаосын ульчаосын но жагез люкыса нимаз куяно: биожагез, сутоно жагез, пластикез ваньзэ нимаз.

Оля: Соизлы соку ик ӝог дыши.

Светӥ: Нош Венгриын озьы уг-а каро?

Оля: Венгриын мынам табере шок луэ, жагзы люкемын ӧвӧл ке.

Светӥ: Мыным туж яра жагез люкыны, вань пичи жаг пумъёсты нимаз люкасько.

Оля: Татын Германиын туж строго со. Умойтэм люкид ке, жагдэ берен могут берыктыны.

• 

Светӥ: Кызьы дӥсяськиськод? Кытысь дӥсь бичаськод?

Оля: Ӝинсыосынгес ветлӥсько. Ужам нылпиосын  спортэн но выроно луэ. H&M но Promod выллем магазинъёсысь октӥськисько.

Светӥ: Ма кариськод буш дырыд вань дыръя?

Оля: Чильпаськисько. Дышетскыкум дыры ӧй вал, мон соку вӧталляй но, чильпаськисько шуыса. Мае ке но туж чаляк чильпаны яратӥсько, нылъёсылэн барбиоссылы дӥсь чильпасько, кылсярысь.

• 

Светӥ: Кыӵе берпуметӥ книга лыдӟид?

Оля: Али немец кылын «Die Charité» книга лыдӟисько, со Берлинысь самой бадӟым госпиталь сярысь книга. Но ӵынзэ вераса, али автошколаысь правилоосты лыдӟисько. Венгриын ӟуч правое понна басьтэм документэн ветлӥсько вал, но Германиын продлить ӧз каре. Озьы, пе, ветлыны уг яра вылэм, мон татын 10 ар ни соосын ветлӥ. Выльысен сдать карыны косӥзы.

Светӥ: Нош удмурт кылын кыӵе берпуметӥ книга лыдӟид?

Оля: [Никвлад] Самсоновлэсь «Адӟон» книгазэ лыдӟи куке но сӥзьыл.

Светӥ: Кыӵе бурпуметӥ фильм учкид?

Оля: Ми картэным «1917» шуыса нимаськись фильм учким венгер кылын нырысетӥ быдӟым ож сярысь.

Светӥ: Кытчы берпуметӥзэ путешествовать карид?

Оля: Зарезь доры сю ар ни вуылэммы. Кылем гужем Венгрие бертылӥм, Балатон ты дорын шутэтским. Али ветлыны уг яра бере, Нюрнберг вӧзысь интыосы потаськом семьяен. Алигес пещераосы ветлӥмы.

• 

Светӥ: Тон шудо-а аслыд потӥськод?

Оля: Ну конешно шудо!

Светӥ: Ма тонэ шумпоттытэ?

Оля: Алигес вераським вал со сярысь. Картэ шуэ, тон точно котькытын шудо луыслыд. Яратоно адямиосы вӧзам ке, соку мон шудо. Эшшо апае вӧзам луысал ке, соку эшшо но шудогес луысал. Может быть, татын Германиын эшъёс уггес тырмо. Но Интернет пыр университетын дышетскем эшъёсыным кусып возисько. Кузёбай школаысь одӥг классын дышетскем эшъёсыным татчыозь эшъяськисько.

Светӥ: Тон материться кариськиськод-а?

Оля: Венгер сямен материться кариськисько.

Светӥ: Венгер сямен гинэ-а?

Оля: О-о, венгер сямен гинэ. Ӟуч сямен туж шер. Венгер кылын нокин но уг вала кожасько-а мар-а. Венгер яке иностранной кылын кӧня ке удгес валаськы, кыӵе со секыт. Соин капчигес-а мар-а вераны (серекъя).

Светӥ: Мон ӟуч сямен (серекъя). Каак вералод, эмоциостэ поттод, нош мукет адямиослы, кин уг вала, со огшоры валантэм кылъёс гинэ. Ну мон озьы малпасько.

Оля, тау вераськемед понна! Эшшо но туж кема но трос пӧртэм тунсыко темаос сярысь тонэныд вераськысал! Верасько но эшшо! Туж тау тыныд но юн тазалык семьяедлы!

Оля: Аслыд тау!

Ми, конешно, эшшо но олома гинэ супыльтӥм, ваньзэ поттыны инты уз тырмы!