Туспуктэмез Любовь Архангельскаялэн.

Текстэз Светлана Едыгаровалэн.

Та текстэз кылзэмды луоз татысь:

Кыл сётӥ, эмоциос сярысь гожто шуыса. Кылме возисько. Котьку малпасько вал, мон уравновешенной адями шуыса. Кыкетӥез пие вордскем бере, туж секыт луиз эмоциосты контролировать карыны. Садикын (Финляндиын) весь верало, пиналъёсты чувствоос сярысь вераськыны дышетоно шуыса. Ас поннам малпасько: мон дас ар университетын дышетски, доктор философии луи, но мон не представляю, кызьы пиналэз дышетоно чувствоос сярысь вераськыны. Ачим но уг быгатӥськы.
Собере книгаос лыдӟи, интернетысь ма но со учки. Ваньмыз валамон кадь теоретически, нош улонын книгаосын кадь уг пöрмы. Одӥг нуналэ, очередной эмоциональной стресс бере, гугылэ гожтӥ: эмоция (англи но ӟуч кылын учки). Мон пайми, эмоция но чувство – со одӥг öвöл шуыса. Зэмзэ вераса, пӧртэмлыксэс валаны секыт вал. Инга Игнатьева, Тартуын (Эстониын) дышетскем но ужась удмурт психолог, мыным лад-лад удмурт сямен гожтыса валэктӥз, соку гинэ валай! 

Тани татын Инга Игнатьевалэн валэктэмез: “Эмоциос но чувствоос сярысь. Эмоциос но чувствоос сярысь. Эмоция кылдэ кыӵе ке ситуациын, со сыӵе вакчи дыр куспын кылдӥсь реакция. Нош чувствоос комплексноесь, соос быгато кема кыстӥськыны. Кылсярысь, яратон – со чувство. Валтӥсь огшоры эмоциос – вожпотон (йыркур), ӝож луон, юрӟым потон, шумпотон, кышкан, паймон, адӟемпотостэм луон. Тынад адямиез яратэмед (чувство) луэ, но со дыръя ик кышкамед яке йыркуръяськемед луэ куке со, кылсярысь, кесяськыны кутске тон шоры (эмоция). Пӧртэм эмоциос дыръя мугорын кӧня ке пӧртэмгес физиологической реакциос кылдо, со гормонъёсын герӟаськемын. Эмоциос мугорлы валаны юртто, кызьы астэ возьыны кулэ, мар карны. Кылсярысь, кышкаку бызьыса кошкы (опасность!), йыркуръяськыку – урдскы, границаостэ уть, ачид утиськы но мукет. Соин ик милемлы эмоциональной интеллект (аслэсьтыд эмоциостэ эскерыны но валаны быгатон) туж кулэ, но солы милемыз уг дышето ук. Наоборот, соосты пушкад ватыны дышето. Соин ик сомында стресс, висёнъёс но суицидъёс вань.”

Википедиын гожтэмын, пöртэм калыкъёслэн пöртэм эмоциональной культуразы луэ шуыса. Куд-ог калыкъёс тросгес эмоциоссэс возьмато (тодэ лыкто итальянецъёс), мукетъёсыз öжытгес (финн сям, кылсярысь). Китаецъёс, пе, шоро-куспо мылкыдзэс возьыны тыршо. Тае лыдӟыса тодам лыктӥз: ми палан ӵукна кырӟад ке, ӝыт бöрдод шуо. Соку малпай, оло удмуртъёс но, китаецъёс кадь, мылкыдзэс шоро-куспо возьыны тыршо. Отын ик гожтэмын, вань, пе, сыӵеесь эмоциос, кудъёсыз одӥг культураын гинэ пумисько, со сярысь кылъёс верало. Кылсярысь, саудади (португал кылын) ӝож, ортчемзэ тодэ ваён но шудо луэмез возьматӥсь мылкыд, пе (ӟуч Википедиысь).
Ну бен лыдӟи, тросгес эмоциос но чувствоос сярысь тодӥ, и ма? шуыса малпасько. Соку тодам лыктӥз: пиналъёслэн садиказы ымныръёс ошылэмын, улӥяз гожтэмын, кыӵе чувствоосты со ымныръёс возьмато. Пиналъёсын удмурт сямен вераськисько бере, малпай чувствоослэсь нимъёссэс удмурт сямен гожтыны. Шедьтӥ интернетысь туспуктэм ымныръёс: мон тусам кышномурт, йырсиез пеймыт, синмыз чагыр. А3 бумага вылэ со ымныръёсты лякылӥ (куать ымныр, куать чувство), улӥяз гожтӥ удмурт но француз предложениос, кыӵе чувствоез котькуд ымныр возьматэ. Бумага вылӥе кык юан гожтӥ: Кыӵе солэн мылкыдыз? Ма со каре? Тани таӵе предложениос гожтӥ:

1. Со кышка.
2. Со пайме.
3. Со ӝож. (Куддыръя Солэн кöтыз ӝож шуисько).
4. Со шумпотэ.
5. Солы юрӟым (потэ).
6. Солэн йырыз кур.

Ваньзэ тае ныль аресъем пиелы возьматӥ но лыдӟи. Со кылъёс тодмотэмесь вал, собере ӝог дышиз, ачим но дыши. Адӟисько ке, маке но умойтэм шуыса, по списку юаны кутскисько: «Тон ӝож-а?» – «Уг», «Тон кышкаськод-а?» – «Уг», «Тынад йырыд-а кур?» – «О-о». Ачим но дыши вераны, кылсярысь «Мынам йыры кур, малы ке шуоно со но та». Тӥни озьы адӟи, куараен шара вераськод ке чувстоосты, ӝоггес буйгаськод, урод мылкыд ӝоггес ортче.
Али пиосы монэным трос финн сямен верасько. Но мон котьку удмурт сямен вазисько. Та кылъёсты ӵем кутӥськом, ми понна со конкретной кылъёс, точно тодӥськом, ма со финн но француз сямен луэ.
Та чувствоосты сяна, мукет чувствоосты но нимано луэ, конечно. Удмуртъёслэн, финнъёслэн но французъёслэн эмоциональной культуразы пöртэм. Куддыръя чувствоослы яке конкретной кыллы аналогия мукет кылысь шедьтыны шуг. Милям семьяямы вань одӥг сыӵе зол реакциез жутӥсь чувство. Ӟуч сямен сое разочарование шуо, финн сямен pettymys. Удмурт сямен тупась кыл öй шедьты. Нырысь ик ӟуч сямен вераны выри: «Мон валасько, тон али туж разочарованной». Ачим малпасько, блин! туж шуш кылӥське, пельме ик вандэ, эшшо тазьы вераськем туж зол серемме поттэ. Собере финн сямен вераны кутски: «Тон, пие, али туж pettynyt». Таиз но чебер уг кылӥськы, зато та кылэз пиосы умой тодо. Удмурт кылын куатаськон кыл вань. Озьы ке но, куатаськонлэн ӟуч, француз, финн кылъёсын точной аналогез öвöл, мыным потэ. Куатаськон но разочарованиен герӟаськемын кадь, нош реакциез мукет. Куатаськон  обижаться ӟуч кыллы матын, озьы ке но точной аналогия уг луы кадь мыным потэ.

Гожтӥ вал ини, вань чувствоос мугорын уло шуыса. Куке пиналъёслы чувствоослэсь нимъёссэс удмурт кылын гожтӥ, кöня ке улыса куд-огзэ мугорысьтым шöдыны кутски, мугор люкетъёс уго чувствоослэн нимъёсазы вань ини! Кылсярысь, йыркур, сюлэмшугъяськон, кöтӝож, но мукет. Озьы мон валай, йыркуры йырам, сюлэмшугъяськонэ сюлмам, ӝоже кöтам улэ шуыса.
Одӥг пол мынӥсько поездэн. Йырын пумтэм-йылтэм малпанъёс бергало. Поездысь потыкум шöдӥсько, йыры висьыны кутскиз. Син азям пиналъёслы дасям А3 бумага вылысь туспуктэм пуксиз, «Солэн йырыз кур» предложение тодам лыктӥз. «Неужели йыры кур?!» – малпасько. Собере пайми, а малы мынам йыры кур? Малпаськыны кутски, ма сярысь мон поездын малпаськыса мынӥ, ма ужын туннэ вал. Но шедьтӥ! Одӥг учырлы йырме кур кариськем! Куке вань та цепочка огазе вуиз, йыры висемысь дугдӥз. Со дырысен йыры трос поллы öжытгес висьылэ. Шöдӥсько ке, висе шуыса, соку ик малпасько: «Так, малы меда мынам сыӵе реакцие кылдӥз?» Со озьы-тазьы шуиз, сое-тае адӟи, соин значит йыры озьы реагировать кариз, табере валамон. Кöня ке улыса, йыр висемысь дугдэ. Тӥни озьы удмурт кыл монэ бурмытӥз! Пиналъёслы гожъям кылъёс, асме дышетӥзы чувствоосты тодманы!

Куд-ог чувствоослэн нимзы, пе, öвöл, нош мугорын соос вань. Озьы сыӵе нимтэм чувствоосылы, яке мугорысь шöдонъёсылы, мон нимъёс малпаны кутски. Одӥгезлэн «шуям сӥть» нимыз. Ӟуч сямен со Вася Обломовлэн кырӟанэз кадь чузъяське. Со социальной но культурно-специфической чувство. Таиз сярысь нимысьтыз текстын гожтыны кулэ.
Эшшо тодӥ, пöртэм калыкъёслэн одӥг кадь нимаськись чувствооссы, пе, мугорлэн пöртэм люкетъёсаз улыны быгато. Кылсярысь, удмурт кыл мыным юрттӥз валаны, йыркуры йырам улэ шуыса. Научной статьяысь лыдӟи, одӥг Африкаысь калыклэн йыркур чувствоез кöтаз, пе, улэ. Ӵемысь именно кыл эмоциональной культуралэсь аспöртэмлыксэ валаны юрттэ. Соин мынам юаме потэ. Тросаз удмурт диалектъёсын йыры кур интые воже потэ шуо. Кызьы со потэ? Кытысь со потэ? Кыӵе мугор люкетын со улэ? Йыры кур- но воже потэ- шуись удмуртъёс пöртэм сямен меда йыркуръясько? Нош адями удмурт кылын уг ке вераськы, нош будэмын удмурт эмоциональной культураын, со быгатоз-а мугорысьтыз чувствооссэ шедьтыны? Кылъёс шедьтоз-а, соосты валэктыны?
Туж кулэ удмуртъёслэсь эмоциональной культуразэс дышетыны. Со милям туж узыр ресурсмы луысал, яке, кызьы Ирина Хакамада шуэ, эмоциональной капиталмы луысал.

Инга Игнатьева вордскемын Пичи Пурга районысь Уча черкогуртын (Ильинское). Дышетскемын клинической психологлы Тарту университетын. Али ужа Тарту университет клиникумлэн Психиатрической клиникаяз клинической психолог, когнитивно-поведенческой терапевт но схематерапевт луыса.