Текстэз гожтӥз Светлана Едыгарова.

Яратӥсько адямилэн сямыз сярысь лыдӟиськыны но малпаськыны. Тужгес но тунсыко потэ, кыӵе сямы монэ мукет удмурт адямиосын герӟа. Та текстын куинь книгаез уже кутӥсько. Соос туж пӧртэмесь: пӧртэм жанр, пӧртэм контекст, пӧртэм удыс, пӧртэм кылын гожтэмын. Озьы ке но, та книгаосысь куд-ог малпанъёсты пазл выллем бичаса, аслым суред кылдытӥ: кин кызьы конфликтъёсты сэрттэ-пертче. Озьыен, та текст конфликтъёсты сэрттон-пертчон сярысь.

Г.К. Шкляевлэсь «Очерки этнической психологии» книгазэ лыдӟи. Татын Шкляев гожтэ, кин, ку но ма удмуртъёслэн сямзы сярысь гожъяз. Гожтэ, кыӵе туала удмуртъёслэн югдурзы но шуг-секытъёссы. Одӥг интызэ лыдӟыкум, «пассивная борьба» кылсочетание пумиськиз. Мон пукон вылысьтым усисько вал ини! «Пассивной» но «борьба» кылъёс мыным антонимъёс кадь потӥзы. Пайми, кызьы та кылъёс ваче вуизы шуыса. Со дырысен та кылсочетание йырам кугӟаз, дырын-дырын малпаськи со сярысь.

Та текстэз гожтон понна нош ик учки Шкляевлэсь книгазэ. Со озьы И.Н. Смирновез цитировать каре вылэм: «И. Смирнов считал, что привыкнув к пассивной борьбе с природой, удмурт также держал себя с людьми» (Шкляев 2003: 42). Иван Николаевич Смирнов – 19-тӥ даурлэн пумаз Казаньысь университетын ужам профессор-историк. Со финн-угор калыкъёсты, удмуртъёсты, бесерманъёсты но мукет калыкъёсты эскерем. Удмуртъёс сярысь нимаз «Вотяки» (1890) шуыса нимаськись книга гожтэм. Смирновлэн малпамезъя, удмурт адямилэсь сямзэ инкуазь, музъем но улон интыез кылдытӥзы, тужгес но удмурт адямилэсь зӥбыт(сдержанность), вераськисьтэм луэмзэ, но пумтэм-йылтэм чиданы быгатэмзэ. Озьы, пе, удмурт адямилэн «чиданы кулэ» улон философиез вордӥськем. Ваньмыз та – результат «пассивной борьбы с природой».

Зӥбыт прилагательной зӥбыны глагол бордысь пӧрмемын. Мае ке но зӥбыса возиськод. Мае удмурт адями зӥбыса возе? Мылкыдзэ, чувствооссэ, мукет яке пӧртэм луись малпанъёссэ зӥбыса возе-а? Соин-а уг вераськы но вераськисьтэм луэ?

Чидан котькуд удмурт адямилы тодмо: Из но му но пилиське но, адямилы чидано. Та кылъёсты котькинлэн кылылэмез вань, дыр.

Удмурт адямиез зӥбыт но чидась луэмез понна куддыръя неконфликтной шуыса кожало. Но мон малпасько, со зэм ӧвӧл. Удмурт адями конфликтъёсты мылкыдзэ зӥбыса но чидаса решать каре. Удмурт адями дась мылкыдзэ зӥбыны но чиданы, огъя конфликт (семья, эшъёс, гуртоос, ӵошен ужасьёс пӧлын) мед ӝоггес сэрттӥськоз-пертчиськоз шуыса. Удмурт адями понна со проблема ӧвӧл, малы ке шуоно, со тодэ, мукетъёс но мылкыдзэс зӥбо но чидало шуыса. Удмурт адями умой тодэ, со туннэ бускельёсыныз меӵак даллашиз-керетӥз ке, ӵуказеяз пудо вандыны, картошка мерттыны, турын утялтыны юрттӥсез уз луы. Проблема кылдэ соку, куке удмурт адями мукет культураысь яке туала индивидуалистской улонысь адямиосын ваче вуэ, куке индивидуалистской культураысь адями мылкыдзэ уг зӥбы, уг чида: йырыз кур луэ ке, копаське-черекъя; аслэсьтыз интересъёссэ защищать каре, нюръяське, огъя ужъёс понна аслаз интересъёсызлэсь уг куштӥськы, уг чида.

Удмурт адями меӵак аслэсьтыз мылкыдзэ вераны, споръяськыны дышымтэ бере, ӵемысь со куатаське. Ма со куатаськон? Мыным потэ, куатаськон – со пушкад зӥбем йыркур, пушкад улӥсь агрессия. Ӵемысь куатаськем адями «тушмонэныз» вераськемысь дугдэ, сое юри кылымтэ-адӟымтэ каре. Озьы адямиен юри вераськытэк но кылытэк-адӟытэк улон – со но, пе, агрессия луэ, пассивной агрессия. Блогысьтым нырысетӥ постам удмурт кыл но эмоциос сярысь, гожтӥ вал ини, Инга Игнатьева удмурт психолог но гожтэ (учке татысь), эмоциосты зӥбыса улӥськод ке, соос висёнъёслы пӧрмыны быгато шуыса. Озьы зӥбем йыркур депрессиялы берытскыны быгатэ.

Ваньзэ мае гожтӥ – со 100% мон сярысь! Картэ – француз, французъёслэн туж зол индивидуальной культуразы, ченгешон но споръяськон культуразы. Мон, удмурт сямен, капчиен мылкыдме зӥбисько, чидасько. Картэ шумпотэ, кыӵе капчи тонэныд шуэ. Нош ачиз уг зӥбы мылкыдзэ, уг чида. Мынам воже потэ. Мылкыдэз зӥбыса улон но чидан депрессия дорозь вуттэ, тужгес но соку, куке кыӵе ке но группаысь яке параысь одӥгез гинэ озьы чидаса но зӥбыса улэ. Табере дышетскисько мылкыдме зӥбытэк улыны, дышетскисько чидан интые интересъёсы понна нюръяськыны. Шумпотӥсько, француз картэлэсь споръяськыны дышетскеме луэ шуыса.  

Табере мукетыз книга борды выжо. Лыдӟи Ирина Хакамадалэсь «Дао жизни. Мастер-класс от убежденного индивидуалиста» книгазэ. Та кнгиаяз со активной лидер луыны дышетэ. Валэктэ, кыӵе сям успешной ужбергатӥсь (бизнесмен) луон понна кулэ. Та книгаысь одӥг инты туж тунсыко потӥз: «методы айкидо».

Айкидо – со Япониысь нюръяськон искусство. Айкидолэн валтӥсь малпанэз – пумит нюръяськись адямиез травмировать карытэк вормон; тон пумит урдскем адямилэсь энергизэ мукет ӧре берыктон но вормон.

Ирина Хакамада айкидоез «икусство выигрывать, будучи слабее» шуэ но дышетэ методъёслы-амалъёслы, кудъёсыз бизнес переговоръёсын вормыны юртто. Одӥгез сыӵе амал, айкидоын кадь, – урдскем партнёрлэсь агрессизэ аслыд басьтон интые вӧзтӥд кельтыны яке жугиськытэк берен солы берыктыны. Книгаяз со пыр-поч гожъя, кызьы но ма кароно. Мукетыз амал – партнёредлы янгышаны эрик сётыны. Адями янгышаз ке, тон йыркуръяськон интые, солы эшшо одӥг шанс сётӥськод.

Ваньмыз та йырам бергаз но, таӵе малпанэ кылдӥз: удмуртъёслэн зӥбыт, чидась сямзылэн но «айкидо методлэн» маиз ке но одӥг кадез вань. Кыкез ик «пассивная борьба» выллем луэ, куке партнёрдэ меӵак атаковать уд кариськы, яке партнёредлэсь атаказэ меӵак уд дугдытӥськы. Со сяна, отын но, татын но партнёрдэ жаляськод но гажаськод: меӵак кымсаз уд сётӥськы, травмировать карытэк дугдытыны тыршиськод.

 Куинетӥ книгаез лыдӟеме бере, син азям пазлъёслэсь быдэс суред пуксиз. Харри Виртанен, финн психоаналитик но гожъяськись, «Травма но яратон» книгаяз гожтэ, шундыпуксёнпалась (западной) но шундыӝужанпалась (восточной) калыкъёс пӧртэм сямен, пе, конфликтъёсты сэртто-пертчо. Со пӧртэмлыкез Виртанэн супергеройёс пыр возьматэ. Шундыпуксёнпалась (западной) герой драконъёсын ожмаське, мечен йыръёсты кора, кужмыз но визьмыз солы вормыны юртто. Пиналъёслы мультикъёсын-фильмъёсын но таӵе геройёс трос: Чонари адями (Человек-паук), Бэтмен, Зорро, Тарзан, Робин Гуд но мукет. Нош шундыӝужанпалась (восточной) герой пассивной, пе, луэ: «Itämainen sankari voi olla passiivinen päinvastoin kuin länsimainen sankari» (Шундыӝужанпалась (восточной) герой,  шундыпуксёнпалась (западной) геройлы пумит, пассивной луыны быгатэ) (Virtanen 2019: 72). Япон культура вылын, Виртанен возьматэ, кызьы япон геройёслэн конфликтъёссы жугиськытэк-нюръяськытэк сэрттӥсько-пертчисько.

Мон тае лыдӟи но малпай, удмуртъёс конфликтъёсты япон сяменгес сэртто но пертчо шуыса. Удмурт выжыкылъёсын геройёс визьмынызы, ужаменызы но чидаменызы вормо, драконъёсын уг жугисько. Конфликт кылдэ ке, удмурт адями чида, возьма («айкидо матодын» но Ирина Хакамада «метод затягивания времени» сярысь гожтэ), дыр ортчемъя конфликт может бырыны, воштӥськыны, яке сое выль сямен луоз учкыны.

Зӥбыт но чидась луон удмуртъёсты утиз, бадӟым ожмаськонъёслэсь соос нюлэсъёсы пегӟизы-ватӥськизы. Нош пегӟон интые вашкала удмуртъёс ожмаськысалзы ке, алиозь одӥг удмурт но ӧй кыльысал ни, дыр, малы ке шуоно, удмуртъёслэн лыдзы ноку но трос ӧй вал, степъёстӥ ворттылон валъёссы но, ожмаськон тӥрлыксы но лад-лад ӧй вал, ожмаськем бере Кавказ гурезь выллем пегӟон интызы но ӧй вал. Со понна вашкала удмуртъёслэн зӥбыт, чидась но ужась сямзы вал! Тау тӥледлы, вашкала удмуртъёс, выжыдэс, кылдэс но культурадэс утемды понна! Тау зӥбыт, чидась но ужась луэмды понна!

Ирина Хакамада гожтэ, Россияын улон агрессивной шуыса. Со сяна, шундыпуксёнпалась (западысь) супергеройёслэн культуразы золгес но золгес туала улонэ пыӵа. Милемыз дышето конфликтъёсты меӵак но «мечен ожмаськыса» сэрттыны-пертчыны. Удмуртъёс ӧжытлыдъем калык бере, зӥбыт но чидась сяммы «ляб» сям кадь адӟиське драконъёсын жугиськись супергеройёс пӧлын. Та сяммы юрттӥз милемлы вашкала дырысен калыкмес утьыны, но туала улон туж мукет луиз, туж ӝог, ури-бери. Стресс туж бадӟым. Конфликтъёсты сэрттыны-пертчыны трос дыр ӧвӧл. Туала дуннелэн улоназ пыриськемед потэ ке, конфликтъёсты но мукет сямен решать карыны дышетскыны кулэ. Жаляса верано, зӥбыт, чидась но тужгес ик куатаськон сяммы туала улонын ӵемысь асьмелы пумит луэ. Чидан но куатаськон интые кыӵе ке но конкретной, ӝог решение шедьтыны кулэ. Малпасько, «айкидо» метод туж тупасал удмурт адямилы туала улонын нюръяськыны но ассэ утьыны: партнёрдэ травмировать карытэк атаковать карыны, агрессиез пушкад бысьтытэк (куатаськытэк) вӧзтӥд лэзьыны но вормыны, удмурт выжыкылысь адями кадь, кудӥз вумуртэз, палэсмуртэз, алангасарез вормыны котьку амал шедьтэ, жугиськытэк, вийытэк.

Книгаос:                            

Смирнов, И.Н. Вотяки. Казань, 1890 г.

Хакамада, Ирина. Дао жизни. Мастер-класс от убежденного индивидуалиста. Москва: Альпина Паблишерз, 2011.            

Шкляев, Г.К. Очерки этнической психологии удмуртов. Ижевск: Удмуртский институт истории, языка и литературы УрО РАН, 2003.

Virtanen, Harri. Trauma ja rakkaus. Eli kuinka selviytyä mahdottomasta. Helsinki: Suomalaisen kirjallisuuden seura, 2019.