Текстэз гожтӥз Светлана Едыгарова.

Гӧртэм укноез туспуктӥз Любовь Архангельская.

Гиперчувствительной луон – берло дасо аръёсы туж модной но популярной тема. Интернетысь трос пӧртэм видео та тема сярысь шедьтыны луэ, кылсярысь TED-ысь* адӟылэме вань. Пиналъёсты будэтыны дышетӥсь книгаос но та тема сярысь вераськытэк уг кылё. Малпасько, англи кылын тужгес но трос качественной информация шедьтыны луэ та тема сярысь, нош ӟуч кылын – ӧжытгес. Соин ик дэмласько тӥледлы эксклюзивной материал удмурт кылын!

Ачим мон та тема вылэ нырысьсэ 2015-тӥ яке 2016-тӥ арын потӥ. Кыкетӥез пие вордскем бере, туж бӧрдӥсь луи. Классической крезьгур но кылзӥськеме уг луы ни, соку ик бӧрдэме потыны кутске. Тужгес но трос бӧрдӥсько мультикъёс учкыкум. Пиналъёсы тодо ини, ӵошен мультик учкиськом ке, одно ик бӧрдо шуыса. Кыӵе интыяз бӧрдо шуыса но тодо. Пичиез пие чиньызэ ик синмам донга: «Мама, тон бӧрдӥськод ин-а?» шуыса юа. «Ма ма та таӵе?!» шуыса гугылэ extrasensitive person (туж чувствительной адями) шуыса гожтӥ. Тӥни озьы мон Элейн Эйронлэсь (Elaine Aron) сайтсэ но книгаоссэ шедьтӥ. Highly Sensitive Person шуыса со нима туж чувствительной адямиосты. Ӟуч кылэ та кылсочетаниез пӧртэм сямен берыкто: «гиперчувствительный», «высокочувствительный», «сверхчувствительная натура». Элейн Эйронлэсь но нимзэ пӧртэм сямен гожто ӟуч сямен. Татын мон гиперчувствительной адями шуыса гожъяло (озьы мон Highly Sensitive Person терминэз удмурт кылэ берыктӥсько).

Элейн Эйрон – Америкаысь психология доктор, учёной-тодосчи но ужа психотерапевт луыса. 1990-тӥ аръёсы со адямиослэсь чувствительной луэмзэс эскериз. Исследованиосыз вылэ пыкиськыса, сайт кылдытӥз но чувствительной адямиос сярысь книгаос гожтӥз. Мон кыксэ Амазонысь (интернет магазин) басьтыса англи сямен лыдӟи (та книгаосы туспуктэмын). Та книгаос кыкез ик ӟуч кылэ берыктэмын (та текстлэн пумысьтыз учке).

Тодосчилэн малпамезъя, гиперчувствительной адямиослэн нервной системазы, гиперчувствительной луисьтэм адямиосын ӵошатыса, мукетгес луэ. Гиперчувствительной адямиос, пе, физической, социальной, эмоциональной информациез кемагес, мургес но золгес обрабатывать каро. Кылсярысь, кезьытлы, вӧсь луэмлы, мукет адямиослэн мылкыдзылы трос поллы золгес реагировать каро. Со, пе, нимаське повышенная чувствительность сенсорной обработки информации (анг. Sensory Processing Sensitivity). Вазьгес исследованиосын таӵе адямиосты интроверт, пе, шуо вал. Нош Э. Эйронлэн исследованиез возьматэ, трос гинэ гиперчувствительной экстравертъёс но вань шуыса.

Тодосчилэн верамезъя, дуннеын, пе, ог 15-20 % гиперчувствительной адямиос.

Э. Эйронлэн сайтаз но книгаяз тест вань: юанъёс, кызьы но малы адями реагировать каре. Кылсярысь, мукет адямиослэн мылкыдзылы, вӧсь луэмлы, кофеинлы, зол зынъёслы, зугыртӥсь (бышкиськись) дӥсьлы, зол куараослы, ӵашетэмлы, но мукет. Та юанъёслы ответ сётӥды ке, тододы кыӵе адями луиськоды. Гиперчувствительной адямиос зол реагировать каро музыкалы, фильмъёслы, буёлъёслы. Та адямиос ӝог жадё трос калыклэсь, соослы одно ик кӧня ке огназы улыны кулэ, шутэтскыны адямиослэсь. Соин ик та адямиос кемагес малпасько, кемагес бырйисько, кемагес выль интылы но выль югдурлы дышыны выро.

Гиперчувствительной адямиослы калык пӧлын секытгес улыны: соос кемагес малпасько, кемагес дышыны выро, золгес реагировать каро, малы ке шуоно, гиперчувствительной адямиослэн трос поллы кужмогес физической но эмоциональной шӧдонъёссы. Гиперчувствительной адямиос та шӧдонъёссэс уже кутыны быгато ке, соос туж успешной но талантливой профессионалъёс луыны быгато. Кылсярысь, зынъёслы но шӧмъёслы чувствительной адями туж ӟеч сомелье луыны быгатэ. Сомелье – со винаос лэсьтӥсь но винаосты профессионально тодӥсь адями. Буёлъёсты мур шӧдӥсь адямиос усто суредаськись-художникъёслы, дизайнеръёслы пӧрмо. Мур но узыр пушдуннеё адямиос кылбурчиослы, гожъяськисьёслы, артистъёслы пӧрмо. Кема но мур малпаськись адямиос ӟеч тодосчиос луо но визь-кенеш сётӥсь профессиосын зол луо (точной наукаосты лыдэ басьтыса). Тросэз гиперчувствительной адямиос улонзэс искусстволы сӥзё но туж тодмо художникъёс, артистъёс, гожъяськисьёс, режиссёръёс, критикъёс но мукет луо.  

Ӵемысь гиперчувствительной адямиосты ляб сямо, ятыр нуныям, ятыр ненег яке умойтэм будэтэм адями шуыса малпало. Тужгес но секыт гиперчувствительной пиослы йӧтэ: «пиос уг бӧрдо» шуо соослы, «тон мужик-а ӧвӧл-а?!» шуыса пиослы возьмато, мусояськон но ненегъяськон пиос понна урод шуыса, суредаськон-эктон пиослэн ужзы ӧвӧл шуыса. Нылъёслэн чувствительной луэмзы, пиосын ӵошатыса, ӵемгес нормально шуыса лыдъяське.

Гиперчувствительной луон – со висён ӧвӧл, пинал будэтонэн но со меӵак герӟаськемын ӧвӧл. Гиперчувствительной луон – со адямилэн нервной системаезлэн генетической аспӧртэмлыкез, кудӥз выжыысь-выжые выже. Адями озьы вордске, воштыны сое уг луы.

Гиперчувствительность пинал будэтонэн ӧвӧл ке но меӵак герӟаськемын, Э. Эйрон гожтэ, пиналэз таӵе сямзэ тодыса но та сямзэ гажаса будэтӥд ке, пиналыд успешной но социальной адямилы пӧрмоз. Чувствительной пиналэз будэтон сярысь Э. Эйронлэн быдэс книгаез вань, со ӟуч кылэ берыктэмын (учке туспуктэмысь но та текстлэн пумысьтыз). Тужгес но чувствительной пиослы юн юрттэт но поддержка кулэ, чувствительной сямзэс серекъяны но курланы ӧвӧл кулэ. Та сярысь пыр-поч Тэд Зефф «Чувствительной но кужмо пи» книгаяз гожтэ (учке та текстлэн пумысьтыз). 

Мон ваньзэ тае лыдӟи но, ас поннам кеськи: Ах вот малы мон сыӵе! Пичи дырысен ик уг яратӥськы зугыртӥсь (бышкиськись) дӥсез гольык ку вылэ дӥсяны, уг яратӥськы зол зынъёсты, соин ик ноку но духиен уг пазяськиськы. Зол приторной духи зынлэсь соку ик йыры висьыны кутске. Бордам ӵаш вазе ке яке кин ке вераське ке, мур малпаськыса ужаме уг луы ни. Уг яратӥськы трос калык пӧлын улыны – жадисько, аэропортъёслэсь-вокзалъёслэсь шузимисько. Куке 15 арескам нырысьсэ гуртысь огнам Иже лыктӥ, ӵаш-паш потӥсь городлэсь, трос калыклэсь, общественной транспортлэсь, машинаослэсь шузимыса йырсазьме ыштӥ.  

Э. Эйронлэсь книгазэ лыдӟеме бере, капчияк шокчи. Малпай, мон совершенно нормальной адями, сямы но «ляб» ӧвӧл, мультик учкыкум но бӧрдэме нормально. Каллен-каллен тросгес тодӥ чувствительной луэме сярысь, пиналъёсме но учкыса тросгес валаны кутски. Пиналъёсы шоры но выль сяменгес учкыны кутски, умойгес валаны кутски, малы бадӟымез пие сыӵе зол реагировать каре шуыса. Нырысь вожъяськисько вал чувствительной луисьтэм адямиослы: соослы капчигес улыны, капчиен дышо, кылсярысь городысь улонлы ӝог дышо, ӧжытгес кышкало, кыштыр гинэ пайда поттыны быгато. Нош табере малпасько, зато мынам малпаськон ӧры пыдэстэм – со понна уждун басьтӥсько, сыӵе драмаос пушкам мыно – Голливуд отдыхает! Нокыӵе стимуляторъёс кулэ ӧвӧл.   

Собере одӥг нуналэ малпай, мон огнам таӵе ӧвӧл шуыса, мынам Удмуртиысь вань семьяе таӵе чувствительной. Эшъёсме-тодмоосме тодом вайыса, малпай: ма туж тросэз удмуртъёс ук мон кадям гиперчувствительноесь! Кылсярысь, горд йырсиё адями – кыӵе солэн чувствительной куэз: шунды шорын туж ӝог ӝуа но палаське, кезьытын – куӵа (куасьме но палаське), нош кыӵе со ранимой адями! 

Удмуртъёслэн чувствительной луэмзы сярысь гожъямын ини. Ӵемысь удмуртъёслэсь сямзэс тазьы валэкто: «молчаливые», «сдержанные», «миролюбивые», «стеснительные», «обидчивые», «боязливые» но мукет (кылсярысь, Г.К. Шкляев пыр-поч исследовать каре, кин но ма гожъяз удмуртъёслэн сямзы сярысь). Малпасько, вань та кылъёс удмурт адямилэн чувствительной луэмэз сярысь верало.

Малпасько, удмуртъёслэн чувствительной луон гензы вань. Со сяна, удмуртъёслэн чувствительной луэмзы калыклэн статусэныз но традиционной улонэныз герӟаськемын на. Тросэз дуннеысь коренной калыкъёс (англ. indigenous people)** бадӟым но урбанизированной (городской) культураосын ӵошатыса, трос поллы чувствительноесьгес луо. Та калыкъёслэн улонзы зол инкуазен герӟаськемын. Улон интыысьтызы экология уродме ке, коренной калыкъёслэн инкуазен тупаса улэмзы уг ке луы ини, городэ улыны кошконо луэ ке, озьы быдэс калык но ышыны-бырыны быгатэ, малы ке шуоно, та калыкъёс бадӟым городын улыны дышымтэ (та сярысь лыдӟыны луэ, кылсярысь, Давид Кристаллэн «Кыллэн кулэмез» книгаысьтыз). Яке кызьы ке но воштӥськыны кулэ (та сярысь луэ лыдӟыны «Как и зачем сохранять языки народов России?» книгаысь, 36-42 бамъёсысь). Удмурт адями но гуртын гань-гань улэ, кылыз но татын умойгес улэ. Нош городэ вуыса, удмурт адями ыше-быре но ӟучоме. Мыным али но секыт бадӟым городын улыны, сюлмы весь пичи гуртэ инкуазьлы матэ кыске. Туж умой шӧдӥсько, кызьы гуртэ бертыса, мугоры но йыры соку ик гань-гань луо.

 Э. Эйрон книгаяз гожтэ, пӧртэм культураосын гиперчувствительной адямиосты пӧртэм сямен дунъяло шуыса. Америка, гожтэ со, гиперчувствительной луисьтэм адямиосты гажась страна. Вашкала дырысен Америкае нырысь ик тюрмае-ссылкае келям адямиос лыктӥзы – кышкасьтэм ожмаськыны-жугиськыны яратӥсь, ӝог пайда поттыны быгатӥсь авантюристъёс. Со дырысен чупырес, кышкасьтэм но сэзь, вакчи дыр куспын умой карьера лэсьтыны быгатӥсь американец гажано адями луиз. Нош дыг, кема малпаськись но мур пушдуннеё гиперчувствительной адями «ляб» адями луиз. Берло дыре та стереотипъёс калленэн воштӥсько. Э. Эйрон озьы ик гожтэ, Китайын, пе, наоборот, востэм но ожмаськыны яратӥсьтэм китаец-воргоронъёсты кышномуртъёс яратысагес асьсэлы карт басьто. 

Мон малпасько, гиперчувствительной луон удмуртъёслы котьку тодмо вал, удмуртъёс понна со умой сям. Кылсярысь, востэм но трос зулисьтэм (вераськисьтэм), но зол ужась кен яке эмеспи котьку умоен лыдъяськиз. Гиперчувствительной воргорон но удмуртъёс понна туж ӟеч адями. Ӵемысь со яратӥсь карт но ӟеч атай луэ. Востэм, муртась (адямиослэсь кышкась) пинал но удмурт анай-атайёс понна проблема ӧвӧл.

Нош проблема со бордын – удмуртъёслэн матысь бускельёссы, ӟучъёс но бигеръёс, – гиперчувствительной луисьтэм адямиосты золгес гажало, тужгес но гиперчувствительной луисьтэм воргоронъёсты. Ӟучъёс – вашкала дырысен вузаськись-басьяськись, Уралэз но Сибирез сайкем калык. Туж чупырес, трос коньдон поттыны быгатӥсь ӟуч адями, тужгес ик воргорон, ӟечен лыдъяське. 

 Бигеръёс (татаръёс но башкиръёс) – интыысь-интые кӧчылыса ветлӥсь (кочевой), ожмаськись калыкъёслэн ӵыжы-выжыоссы. Ляб, висись но кышкась адямиос сюрес урдсы кылизы, тужгес но золъёсыз но кышкасьтэмъёсыз гинэ кыдёке кошкизы. Шумприч но пайда поттыны быгатӥсь бигер – туж ӟеч бигер.

Востэм, зӥбыт, шоро-куспо, чувствительной удмурт адями таӵе бускельёслэн синмазы «ляб сямо» адске. Бускельёсыз шоры учкыса но асэныз ӵошатыса, удмурт адями ачиз но малпа, солэн сямыз «урод», «ляб» шуыса. Тужгес ик куке бускельёсыз 100 но 5 миллион адями, нош удмуртъёс ог 500 сюрс адями гинэ, соослэн но культуразы чувствительной луэ (та сярысь вылӥынгес гожтӥ).   

Э. Эйрон но мукет тодосчиос, психологъёс но активистъёс шуо, гиперчувствительной луон – со туж бадӟым кузьым. Гиперчувствительной адями улонэз но дуннеез трос поллы мургес шӧдэ, дуннелэсь узырзэ умойгес но паськытгес адӟе. Зэм, чувствительной адямилы секытгес мегаполисъёсын но ӝог дуннеын улыны. Озьы ке но, гиперчувствительной адями сямзэ гажаны но ассэ ӟеч утялтыны дышиз ке, успешной но шудо адями луоз. Финляндиын та тема туж популярной, малы ке шуоно, финнъёс пӧлын удмуртъёс пӧлын кадь ик, трос гиперчувствительной адямиос. Финляндиын гиперчувствительной луись адямиослэн огазеяськонзы но вань. Финн сямен книгаос, семинаръёс, треннингъёс потто-ортчытъяло. Со ужрадъёсын дышето астэ умойгес утялтыны, чувствительной луэмдэ кужымлы берыктыны.

Мон малпасько, удмуртъёслэн чувствительной луэмзы – со удмуртъёслэн валтӥсь кужымзы. Социально-политической но экономической югдур котьку вошъяське, то Совето власть вуэ, то перестройка. Озьы ке но, удмуртъёслэн духовной культуразы али ке но улэп, туж мур но узыр. Брангуртысь песянайёс, Silent Woo Goore, Ижкарысь электронной крезьгур, этнофутуризм, паймымон удмурт суредаськисьёс, кылбурчиос но гожъяськисьёс, кырӟасьёс но эктӥсьёс, «Эктон корка» но «Айкай», удмурт кылын хип-хоп, удмурт тодосчиос, зарни кибашлыос – тани милям кужыммы!

Улон воштӥське, дунне воштӥське. Табере гиперчувствительной творческой адямиослэн но дунзы но улонзы воштӥське. Пичи гуртысь адями творчествоеныз быдэс дуннеез паймытыны, коньдон поттыны быгатэ. Эшъёс, гиперчувствительной кужымдэс воля лэзе: гожъяське, кылбуралэ, суредаське, киужен выре, вераське, эктэ, кырӟалэ, туспуктылэ, бӧрдэ, серекъялэ, куректэ, шумпотэ! Эн кышкалэ но эн возьдаське! Озьы удмурт кыл но культура кема улозы на.

Та блогез удмурт сямен гожъян понна мон Финляндиысь тужгес но бадӟым Конэ Фондысь (Koneen Säätiö) грант басьтӥ. 

*  TED – со американской медия, кудӥз дунтэк пӧртэм темаослы сӥзем лекциосты Интернет пыр возьматэ.

**Коренной народ (англ. indigenous people) терминлэн Россиын мукетгес значениез луэ: Россиын коренной народ шуыса нимаськон понна калыклэн лыдыз 50 сюрслэсь ятыр луыны ӧвӧл кулэ. Нош удмуртъёс солэсь тросгес бере, удмуртъёсты коренной народ шуыны уг луы, пе. Озьы ке но, валтӥсь ужпум татын – калыклэн традиционной сямен улэмез. Тросэз удмуртъёс вашкала дырысен гуртын уло, улон интымы сюрс ар ӵоже трос ӧз воштӥськы. Соин, малпасько, удмуртъёс мукет коренной калыкъёслэсь туж ик пӧртэм ӧвӧл.

Татын книгаос но ссылкаос:

The Highly Sensitive Person (hsperson.com) Таиз Элейн Эйронлэн сайтэз англи кылын.

Aron, Elaine N. The Highly Sensitive Person. How to Thrive When the World Overwhelms You. New York. 1996.

Та книга ӟуч кылэ берыктэмын:

Эйрон, Элейн. Сверхчувствительная натура. Как преуспеть в безумном мире. М.: Азбука. 2014.

Aron, Elaine N. The Highly Sensitive Child. Helping our children thrive when the world overwhelms them. New York: Harmony. 2002.

Та книга ӟуч кылэ берыктэмын:

Эйрон, Элейн. Высокочувствительный ребенок. Как помочь нашим детям расцвести в этом тяжелом мире. 2018.

Crystal, David. Language Death. Cambridge: Cambridge University Press. 2000

Zeff, Ted. The strong and sensitive boy. 2010. Тайзэ ӧй шедьты ӟуч кылын.

Замятин, К., Пасанен, А., Саарикиви, Я. Как и зачем сохранять языки народов России? Хельсинки, 2012.

Шкляев, Г. К. Очерки этнической психологии удмуртов. Ижевск: Удмуртский институт истории, языка и литературы УрО РАН. 2003.