Текстэз гожтӥз но туспуктӥз Светлана Едыгарова.

Та текстэз кылзыны луэ. Зӥбе улӥысь ссылка вылэ.

Тани тон – удмурт кышномурт! Шедьтӥ тонэ. Наконец-то! Сыӵе кема утчай, сыӵе кема уйылӥ, нокызьы но сутылыны ӧй быгаты. Тон, Кылдысин выллем, весь пегад мынэсьтым, ымнырдэ но вылтустэ вошъяд: то ӟуч кышномуртлы пöрмид, то городской нылашлы, то столичной московичка яке питерской штучка луылӥд, то европейка но американка луэмед потӥз, яке француженка. Котькин луылӥд, удмурт кышномурт гинэ луэмед ӧз поты! Зэмос ымнырдэ котьку ватыса улӥд мынэсьтым.

Мон сутылӥ, кутӥ тонэ, быжтӥд ӝабыртӥ! Табере уд пегӟы ни мынэсьтым! Пегӟид ке но, одно ик шедьто!

Удмурт кышномурт, мыным мукетыз кышномурт кулэ ӧвӧл. Мыным тон гинэ кулэ! Сыӵе, кыӵе тон вань. Нош тодӥськод-а, кыӵе тон? Татчыозь ас шорад мурт синмын учкид: то ӟуч синмын, то бигер, то американ, то француз, то эстон, то финн но мадьяр, то итальян, то немец… Кызьы бен зэмос тустэ адӟод мурт синмын учкыса?! Озьы тынад тусыд кырыжо-мерыжо адске. Но тон солы оскиськод, малпаськод, тон зэмзэ но сыӵе кырыжо-мерыжо кышномурт шуыса. Усьты синдэ, удмурт кышномурт, но учкы выльысен ас шорад ас синмыныд!

Мугорыд но вылтусыд. Вашкала дырысен ик нырысетӥ путешественникъёс кызьы мугордэ но тусбуйдэ возьмато? Пичи мугоро, векчи киё но куко, пурысь йырсиё но синмо. Ни рыба, ни мясо. Оло тонэ сӥтьпужыё гордань, сюбег синмо китаянка яке чукча шуыса исамзы вань? Нош табере синдэ паськыгес усьтыса учкы ай шорад. Адӟиськод-а, кыӵе тынад лад-лад мугорыд, кужмо мугорыд, пыдыд тып-тып музъем вылын сылэ, вазь кисырмем киыд котькыӵе ужез капчиен лэсьтэ. Пичи мугорыд эктыса-лэйкаса кадь ветлэ, котькытчы вуэ, котькыӵе шуг-секытэз чида. Пересьмыса но мугорыд вить аресъем ныллэн кадь капчи но лэйкыт. Ас синмыным адӟылэме вань, кызьы 70 аресъем удмурт пересьёс йыруллань бекмыллясько! Удмурт кышномурт, учкы ай ас шорад. Адӟиськод-а, тынад тусбуяд но мугорад кык дуннепал ваче вуэ: Евпропа но Азия. Тон валаськод-а, кыӵе тынад чебер но оригинальной вылтусыд?! Сюбег синъёсыд шундыӝужанпал выжыкылысь царевналэн кадесь, нош пурысь синъёсыд Скандинавиысь сӥзьыл инбам кадь. Нош шунды чупаса кадь сӥтьпужы бамад чильпам, яратыса йырсидэ зарниям. Ох! Кыӵе тон чебер, удмурт кышномурт!

Удмурт кышномурт, тынад туж мур но туж чувствительной пуш дуннеед. Пушкад бадӟым драмаос мыно, может даже трагедия в нескольких актах, нош ачид ньыльпыдъяськыса убоысь жагтурын ишкиськод, скал кыскиськод, бусыын ыж возьмаса кыллиськод. Нош Джульетта нервно курит в сторонке. Сыӵе яратӥсько, куке инметӥ лобакуд но, музъем вылын йыг-йыг сылӥськод!

Удмурт кышномурт, тон сыӵе ужась! Быдэс дуннеын тон кадь ужась адями ӧвӧл, дыр. Тон нокыӵе ужлэсь уд кышкаськы. Кулэ луиз ке, космодром но пуктод куинь нунал куспын! Только эн вунэты, ужан сяна шутэтскыны но быгатыны кулэ. Жаля мугордэ но йырдэ. 

Удмурт кышномурт, тынад туж паймымон кужымед вань. Кин ке сое сексуальность шуэ, кин ке распущенность, кин ке ведӥн кужым но шуэ. Котькызьы мед нималозы. Со кужым – выжыдэ азьланьтыны но утьыны быгатон кужым. Татчыозь, трос дауръёс ӵоже, удмурт выжыдэ но кылдэ утьыны быгатӥд. Оскисько, азьланяз но быгатод шуыса. Эн сётӥськы та кужымдэ ултӥясь зулёнъёслы. Тон уд тодӥськы, Европаысь котькуд кышномурт вожъяськысал тыныд, таӵе кужымед сярысь тодысал ке. 

Удмурт кышномурт, удмурт воргорон шоры куддыръя вылтӥ учкиськод. Ӟуч яке бигер воргоронэн ӵошатсконын, удмурт бере кыле шуыса малпаськод. Тодыса ул, удмурт кышномурт, удмурт воргорон чигтэмын. Самой бадӟымез чигтон – удмурт воргоронэз музъем бордысь палэнтӥзы, солэсь музъемзэ талазы (раскулачить каризы но колхоз кылдытӥзы). Собере войнаос, перестройка, экономической кризисъёс – ваньмыз со нырысь ик воргоронлэн пельпум вылаз усе. Тодыса ул, удмурт кышномурт, удмурт воргорон, ачид кадь ик, туж чувствительной. Соин солы секыт «мачо» культураын улыны. Но эн вунэты, чувствительной воргоронлэсь туж ӟеч карт но атай пӧрме шуыса. Ог-огдэс гажаса гинэ зол выжы лэзьыны но выжыдэс азьланьтыны быгатоды. 

Удмурт кышномурт, тон туж вожъяськись. Бускелед сяськаё голоша басьтэ ке, тыныд но соку ик сыӵе голоша кулэ. Эшедлэн пиналыз университетэ пыре ке, тынад но пиналдэ ури-бери университетэ донгемед потэ. Вожъяськон – со тынад улон моторед. Öй ке вожъяськысал, али ке но кутэн ветлысалыд на, дыр. Только тодыса ул, удмурт кышномурт, мар бускеледлы-эшедлы умой, куддыръя тыныд со умой ӧвӧл. Сьӧд голоша но тӧдьы носки котькинлэн пыдаз тупалоз, нош мини юбка котькинлы уз тупа. Дышетскы сюлэмдэ, семьядэ-пиналъёстэ кылзыны, ма соослы кулэ, ма тыныд гинэ тупа но кулэ.

Удмурт кышномурт, тон ваньмызлэсь возьдаськиськод, керпотӥськод. Сямыдлэсь, выросъёсыдлэсь, мугорыдлэсь, пыдъёсыдлэсь, киосыдлэсь, анай-атаедлэсь, анай кылыдлэсь, удмурт луэмедлэсь. Возьдаськон – со тынад Инмаред. Улон сюрестӥ мыныкуд, котьку малпаса улӥськод, мар калык малпалоз, возьытэ уг-а усьы. Вазьдаськон – со нормально, со тыныд улонлэсь эсэпсэ валаны юрттэ. Нош бадӟым городэ-улонэ кошкиськод ке, возьдаськонэд тынад дунне быдӟа луэ. Секыт озьы улыны. Дышетскы кулэ дыръя возьдаськондэ шикысэ пытсалляны. Нош мон кыл сётӥсько, мон тынэсьтыд трос поллы ӧжытгес возьдасько. Коть ресторанын пурт-вилкаосты сураса сиськы, коть ульча кузя кутэн ветлы, коть пиналъёсыд йыр вылазы мед ветлозы, коть пиналъёсыд мед суро-пожо вераськозы. Мон зол куараен шуо: «Адямиос, учке ай, кыӵе йӧно та кышномурт! Кыӵе со ӟеч анай! Кыӵе со ужаны быгатэ! Котьма малпалэ та кышномурт сярысь, но мон сое туж гажасько но яратӥсько! Мон солэсь уг возьдаськиськы!»   

Удмурт кышномурт, куддыръя тон сыӵе куатаськись но вог луиськод. Оло пинал дыръяд яратон но нуныян ӧз тырмы. Оло тон атайтэк яке анайтэк кураӟдыса будӥд, оло анаед-атаед но ӧй вал. Оло сьызьым пинал пӧлын будыса нуныям но внимание ӧз тырмы. Оло секыт улонэз адӟыса, анай-атаед лекомизы, тонэ куштыса кельтӥзы, оло вина ӟенелик пыдсы выйизы. Будыса кӧтӝожед ӧз буйга. Табере картэныд но пиналъёсыныд но кӧтыд буйганы уг быгаты. Яратонэз тодылымтэ бере, табере ачид но уд быгатӥськы яратыны. Утча сое пушкысьтыд. Астэ яратыны дышӥд ке, улондэ но яратод.

Удмурт кышномурт, тон аслэсьтыд дундэ уд тодӥськы. Оло бадӟым улонэ потыкуд, тынад утисед но дурбасьтӥсед ӧй вал. Тонэ ултӥяллязы, дӥсяськемдэ, ӟуч сямен вераськемдэ серекъяса, «деревенщина», «вотячка», «мормышка», «некультурной», «колхозницалэн нылыз» шуылӥзы, удмурт сямен вераськыкуд автобусысь потыны косӥзы. Соку одӥг адями но тон понна дур ӧз басьты, ӧз шуы: «Адямиос, малы озьы та егит нылэз ултӥяськоды? Уг яра озьы мукет кылын вераськем понна, мукет луэм понна адямиез ултӥяны! Нылы, эн кылзы таӵе зулёнъёсты, оскы мыным, тон туж ӟеч нылаш, нош анай кылыд туж вашкала, чебер но дуоно.» Кызьы быгатӥськод, озьы кӧтӝождэ, яратон но гажан дефициттэ буйгатыны выриськод: ӟуч сямен чебер вераськыны дышетскиськод, чебер дӥсяськыны, бадӟым начальник луиськод, трос медальёс но грамотаос люкаськод, званиос люкаськод, трос коньдон поттӥськод, силиконовой гадьёс но ымдур лэсьтӥськод. Озьы верамед потэ кадь: «Учке ай, кыӵе мон ӟеч! Яратэ монэ! Гажалэ монэ!» Озьы статус, медальёс но силиконовой вылтус пыр гажан но яратон утчаськод. Удмурт кышномурт, котькин тон мед луод, коть скалкыскись, коть колхозница, коть дышетӥсь, коть президент, коть модель, коть гуртын пукись, коть вина юись, ужтэм адями, коть узыр ужбергатӥсь, коть лушкаськись, коть кизили, коть проститутка; котькызьы тон мед дӥсяськод, котькыӵе тынад вылтусыд мед луоз, котькызьы тон мед вераськод ӟуч сямен мон тонэ одӥг кадь ик туж мур гажасько но туж зол яратӥсько. «Мар понна?» юаськод тон. Малы ке шуоно, котькуд адями дуно, малы ке шуоно, ми одӥг кылын вераськиськом, тон кадь умой монэ нокин но уз вала. Тон ваньмызлэсь дуно адями мон понна! Табере мон тон понна дур басьто!    

Удмурт кышномурт, озьы пöрмиз, туннэ тон огнад удмурт кыл понна кыл кутӥськод. Малы ке шуоно, тон – анай. Государство шуэ: «Мы не запрещаем вам говорить на родном языке», «организуйте факультативно обучение родного языка», «родители сами не хотят отдавать детей». Удмурт активистъёс курлало, тужгес ик кинлэн пиналыз ӧвӧл на: «Малы пиналъёсыныды удмурт сямен уд вераськиське?», «Малы билингвизм амалэн уд дышетӥське, ученойёс доказать каризы…». Яке кин ке но калык азьын куаш-куаш нагло пӧяське: «Удмурт кылэз утёно», «пиналъёсын вераськоно», «удмурт классъёсы сётоно», нош ачиз дораз бертэ но куаш-куаш ӟуч сямен вераське. Мон ваньзэ валасько. Тонэ тазьы курлась но виноват карись ӧй луысал, тон тазьы нагло ӧй пӧяськысал, дыр, тон ӟуч кышномурт-анай кадь гань-гань улысалыд ке: тани тыныд чебересь ӟуч книгаос кӧня потэ, сюрсо мультикъёс, ӟуч сямен вераськись эшъёс, ӟуч садик-школа-институт, кружокъёс. Хоть тон Америкаын, Австралиын ул, ӟуч кылын книгаос, мультикъёс котькытын шедьтыны луэ. Нош тыныд, удмурт анай, ваньзэ тае аслыд лэсьтоно луэ.          Огнад.            Собере пиналыд садике-школае мынэ но, ӟуч яке мукет кылэ выже.               Ӵок.                   Котькызьы даурты, котькыӵе кылын вераськы пиналыныд, главноез – шумпот анай луэмедлы! Эн гинэ пӧяськы калык азьын, вера озьы, кызьы вань.   

Удмурт кышномурт, тон – огшоры. Нош тыныд котькуд сэрегысь верало: лидер луоно, развиваться кариськоно, ӟеч анай луоно, пиналдэ сизьым кыллы дышетоно, карьера лэсьтоно, креативной луоно, удмурт кылдэ но культурадэ утёно, удмурт луэменыд данъяськоно. Огшоры луыны гинэ модно ӧвӧл туэ. Собере улытозяд ымысьтыд шукы потытозь бызьылӥськод-бергаськод лидер луыны тыршыса, семинар-тренинг-курсъёстӥ ветлыса, пиналъёстэ кружокъёстӥ нуллыса, удмуртлыкез утемед понна грамотаос но медальёс люкаса. Собере кужымед, тазалыкед, мылкыдыд бырыса музъем вылэ кыминь усиськод но малпаськод: Кинлы та ваньмыз кулэ? Кин понна, мар понна вань кужымме, тазалыкме быдтӥ?! Пиналъёсылы но семьяелы шумпотон интые, кытӥ ке но грамотаос утчаса ветлӥ, кинлы ке но маке доказывать карыса, гадям мыжгаса бызьылӥ! Мар понна! Удмурт кышномурт, табере ноку эн вунэты ни, тон огшоры шуыса. Котьмар мед луоз, коть советский союз, коть перестройка, коть та супер «модной» улон, коть евровидение, из но му но мед пилиськоз, нош тон огшоры котькуд ӵукна султӥськод но, кыӵе туннэ куазь шуыса учкиськод, гурдэ ӧстӥськод, семьядэ, пудодэ утялтӥськод, ма кулэ сое ужаськод, курадӟиськод, шумпотӥськод, бӧрдӥськод, кырӟаськод, семьяедлы ӟеч кылъёс вераськод, нош но нунал ортиз шуыса кӧлыны выдӥськод. Яратӥсько тонэ огшоры луэмед понна! Тӥни сыӵе тон, аутентичной кышномурт.        

 Удмурт кышномурт, тау тыныд! Вай кидэ, табере ваче улон сюрес кузя мыном, ӵошен сюлмаськом но шумпотом. Котькыӵе шуг-секытъёсты кышкатэк пумиталом.