Текстэз но нимтэм туспуктэмъёсыз Светлана Едыгаровалэн.

Туэ гужем Францие берылӥм, Нормандие. Нормандилэн шоркарез – Руан. Картэлэн семьяез татын улэ. Руанысь кыдёкын ик ӧвӧл Живерни гурт, отын Клод Монэлэн музеез – улэм коркаез но садэз. Кемалась татчы ветлэм потэ вал ини! Туэ вуылӥ, мылкыды лӧптӥз! Соин та сярысь пост гожтоно кариськи.  

Клод Монэ (Claude Monet 1840-1926) – тодмо француз суредаськись-импрессионист (суредаськись сярысь лыдӟе Википедиысь). 1883 арын Клод Монэ Нормандиысь Живерни (Giverny) нимо гуртысь корка басьтэ. Корка котыраз сад но япон стилен пруд лэсьтэ. Прудлэн но садлэн аспӧртэмлыкез – сяськаос. Туж туж трос сяськаос. Суредаськись ваньзэ ачиз малпа но ачиз сяська кидыс утча. Улонысьтыз берпуметӥ 30 арзэ суредаськись прудзэ но садысь сяськаоссэ суреда. Табере та сад но пруд быдэс дуннеысь туристъёсты кыско.

• 

Пруд

Пруд бадӟым ӧвӧл. Вуын кувшинка но лилия сяськаос будо. Мынам туспукетэмъёсысьтым адӟыны луоз, соос шормучъёс (островъёс) кадь мерттылэмын. Котькуд шормуӵлэн аслаз буёлэз: тӧдьы лилосын шормуӵ, льӧль лилиосын шормуӵ, бусир лилиосын. Клод Монэ туж яратэм лилиосты суреданы. Вуын будӥсь лилиосын суредъёсыз быдэс дуннелы туж тодмоесь луо.

Лилиос сяна пруд котыртӥ трос мукет сяськаос будо.

Тани тазьы Клод Монэ лилиосты суредам.

Сад

Клод Монэлэн садэз – со сяськаен мерттэм бакча. Картошка, кубиста, сугон, ӵушкушман, огреч интые татын сяська гинэ будэ. Сяськаос туж тунсыко мерттэмын – буёлэн-буёлэн. Шуом, одӥг интыын ӵуж но ӵуж-пыръем гинэ сяськаос будо, мукет интыын – льӧль но льӧльлы матын луись оттенокъёс. Кытын ке но одӥг буёл постепенно мукет буёлэ выже, кытын ке – тунсыко буёл сочетание пумиське. Туспукиэмъёсысь адӟи, котькуд ар пӧртэм сяськаос мерттэмын шуыса. Котькуд ар та сад произведение искусства выллем луэ. 

Ми та музее август кутсконын ветлӥм. Табере мыным тунсыко тодыны, кызьы ар ӵоже сяськаос пушъё. Кылсярысь, милям азбарамы Хельсинкиын вазь тулысысен кутскыса гужембыт бӧрсьысь-бӧрсьы маке но сяськаяське: одӥгез быре, мукетыз пезьдэ. Клод Монэлэн бакчаяз но-а мед-а озьы ик?

Мынам учкемея но тодмамея, Клод Монэлэн садаз туж трос огшоры сяська, кудӥз котькуд удмурт гуртысь палисадникын будэ. Малпасько, котькуд удмурт нылкышно соосты умой тодма. Кылсярысь: флоксы, ноготки, георгин, герань, гладиолус, шундыберган (коть одӥг удмурт кыл шедиз!), гвоздика, роза, бархатцы, петуния, космеи, ромашка, но мукет.

 Удмурт палисадникын будӥсьтэмез но вань, кылсярысь, тани таӵе сяськаяськись писпу. Собере трос лаванда. Та интыын льӧль-пыръем сяськаос гинэ будо.   

Нош татын ӵуж но ӵуж-пыръем сяськаос гинэ.

Ӵуж сяськаослэн королевазы – шундыберган. Улӥын – королева свитаеныз.

Тунсыко буёл суред.

Корка

Клод Монэлэн улэм коркаяз но луэ пыраны. Со кык этажъем из корка. Таӵе вашкала коркаос Франциын трос.

Таяз комнатаын Клод Монэ куно пумиталляз, дыр.

Таиз со ик комната.

Таиз изён комната.

Таиз кыӵе ке но чай юон комната порма, дыр.

Тани гуразьпал, таӵе гур. Столовоез малы ке но ӧвӧл пуктӥськем. Со копак ӵуж.

Таиз пӧраськон котыр.

Укноос. Яратӥсько укноосты.

Таиз мон, пӧяськем кадь медам луы шуыса.

Та музей Парижысь кыдёкын ик ӧвӧл, ог 80 км. Ориентир – Vernon шуыса нимаськись пичи кар. Татчы поездэн лыктыны луэ. Вокзалысь Живерни музее автобусъёс ветло. Парижысь шонерак но луэ экскурсионной автобусэн лыктыны.    

Тани музейлэн официальной сайтэз http://giverny-france.com/