Веган перепеч

Текстэз гожтӥз Светлана Едыгарова, туспуктылӥз Маша Гаврилова.

Выль адямиен эшъяськи. Со – веган. Вань вегетарианецъёс, кудъёсыз сӥль но чорыг уг сиё. Нош веганъёс вань пудо-животэн поттэм сиёнэз уг сиё: сӥль но чорыг сяна, йӧл, курегпуз, куд-огъёсыз чечы но уг сиё. Йӧлын, курегпузэн лэсьтэм сиёнэз но уг сиё. Малы уг сиё? Медам пудо-животэз вӧсь каре шуыса. Кудъёсыз экологической шуг-секытлы пумит луыса. Пудо-животэз будэтон – самой трос углекислой газ поттэ, пе, но инкуазез уродмытэ. Кудъёсыз малпало, веган сиён тазалыклы ӟечгес шуыса.

Эшеным Хельсинкиын пумиськи. Оказывается, Хельсинкиын трос веган сиён: почти котькуд ресторанын-столовойын вань веган сиён, нимаз веган ресторанъёс но вань, магазинъёсын но трос веган сиён вузало, веган мороженой но вылэм!

Хельсинки магазинысь веган сыр.

Выль эшеным перепеч лэсьтыны малпамы – веган перепеч. Сӥлез капчи воштыны: губи, кубиста, кабачок, ӵужкушман но мукет бакчасиён луэ поныны. Нош маин курегпузэз но йӧлэз воштом шуыса мылпаськыны кутскимы. Одӥг книга вузась магазинысь веган рецептъёсын книга адӟим: отын гожтэмын, вань, пе, веган йӧлвыл но сыр. Озьы курегпузэз но йӧлэз веган йӧлвылын но веган сырен воштыны малпам.

Скал йӧлэз будос йӧлэн воштыны луэ вылэм: соя йӧл, миндаль йӧл, сезьы кеньырлэсь йӧл (овсяное молоко), кокос йӧл, рис йӧл, кӧжы йӧл. Нош сыр но йӧлвыл соялэн тӧдьыезлэсь (белок), кокослэсь, пушмульылэсь, сезьы кеньырлэсь, рислэсь но кӧжылэсь луэ, пе, лэсьтыны. Финляндиын бадӟым магазинъёсын нимаз ӝажыос вань веган сиён-юонэн.

Перепеч коньывуонэ (октябре) лэсьтӥм, соин ик нырысь ик губиен лэсьтӥм. Картэ пичи стартапын ужа (Helsieni шуыса нимаське), соос губи будэто. Со ваиз вешенки (кызьы удмурт сямен?) но шитаке губи. Эше лисички (кызьы со удмурт сямен?) вайиз. Эшшо сяська кубистамы (цветная капуста) но кабачокмы кылемын вал, сое понӥм.

Шитаке губи.

Эше басьтӥз веган кизер йӧлвыл (сливки) но веган сыр. Кизер йӧлвыл пушкы сыр вуштӥм.

Ыльняньзэ Надя Рипаттилэн рецептэзъя лэсьтӥ (Надяен интервью учкыны луоз татысь, интервью пумын рецептэз но вань). Пызе сылал понӥсько но сурасько быректэм вуэн, собере кема ныркисько. Озьы куарнянь небытгес луэ.