• 

Текстэз Светлана Едыгарова гожтӥз. Туспуктэмъёс WordPress галереясь басьтэмын.

“Дюрикен Эте но Кузё” верослэсь нырысетӥ люкетсэ татысь лыдӟе.

Чырткем, тетраде! Сомында гожтонэ люкаськиз! Кузёен пумиськеме бере, сыӵе улонэ вошьтӥськиз! Таӵезэ Дисней мультикъёсысь но адӟылэме ӧй вал на! Фонарикме тани ошо, табере киы бушаз гожъяськыны. Мон нош ик уйин гожъяськисько. Ваньмыз кӧло ини. Этеез учки вылӥ валесысь, нись-нись кӧлэ, нош шкаыфысь Кузёлэн соргетэмез кылӥське. Табере ваньзэ лад-лад гожъяло. Ах, да! эшшо туннэ нуналэз гожтыны вунэтӥ – туннэ куамынэтӥ март.  

Кузёен пумиськеммы бере, улонмы Этеен воштӥськиз. Эте но воштӥськиз. Азьло, садикысь бертыса, пол вылэ выдэ но «Разденьте меня!» шуыса кылле вал. «Ма, Серёжик, тон бадӟым ин ук, пие» куаретэ вал мама. «Я устал, я целый день работал!» вазе соиз. Собере мамалэн чиданэз быре но, кылиськыны юрттэ вал. Нош табере, садикысь бертыса, туж ӝог гинэ ачиз кылиське, пыдкутчанзэ но ӝикыт гинэ интыяз понэ, ачиз чай юэ, сиське мара но шумприч комнатае пыре. Собере ӧсамы бумага ошиськом, отын «Стоп!» гожтэмын, мамаен-папа медам пыре шуыса. Соку Кузё шкафысьтыз потэ. Эте солы котьку канфет-преник сётэ. Ӵемысь преникез ӝыныез сиемын луэ ини. Выль эшмы сярысь ноку но уг вунэты. Эшшо Эте тросгес удмурт сямен вераськыны кутскиз, уг ке но умой пӧрмы, тырше.

Мама абдрамысь уг дугдылы табере, ма пиезлы йӧтӥз шуыса. Паймемзэ весь тётя Манялы но ӵужилы вера. Нырысь малпа вал, ми комнатаын ватскыса видеошудонъёсын шудӥськом шуыса. Нош мон телефонме вунэтыса гуразьпалась ӝӧк вылэ кельтылыны кутски. Компьютерысьтым но куара ӧз кылӥськылы ни. Озьы мама малпаны кутскиз, восьмой мартлы салам дасяськом шуыса, собере мамалэн имениказ, собере папалэн…  

Одӥг пол, комнатае пытсаськеммы бере, Кузёмы бӧрдыны кутскиз. Ма луиз шуыса паймим Этеен. Песьтэрме, пе, киоске вунэтӥськем.

–  Песьтэр?! – ма та кыл таӵе шуыса пайми. Тодам лыктӥз, кызьы папамы Этеез пичи дыръяз песьтэр шуыса нима вал. – Неужто тынад но этеед вань? – паймыса юасько Кузёлэсь.

Песьтэр – со, пе, рюкзак выллем, только «писпулэн куэзлэсь» лэсьтэмын. Ӵуказеяз, школаысь бертэм берам, Кузёен тодмо коискмы доры ветлӥм. Ӝуштыса кӧня ке бергаз киоск котыртӥ, пыраз-потаз, шедьтӥз ик «писпулэн куэзлэсь лэсьтэм рюкзаксэ»! «Песьтэре! Песьтэре!» шумпотӥз Кузё. Ӝытазе, Этеен комнатае пытсаськеммы бере, Кузё возьматӥз, маиз песьтераз вань. Маиз но отын ӧвӧл вылэм!

Гозыос, бирдыос, куалялюльы, куасьмем эбек, кӧльыос, куасьмем боды пумъёс, губи, куасьтэм турынъёс, куаръёс, мульыос, сяськаос, ӝуйы, бубыли, сӥньыс, куасьмем кут но ӟоз, но мукет олома гинэ! – Кузё соосты мынам арбериосы шуэ.

Ми Этеен та песьтэраз бугыръяськыны туж яратӥськом! Мае ке но бырйиськом но, Кузё милемлы со арбери сярысь выжыкыл маде. Озьы маде, как будто ми асьмеос со выжыкылэ вуиськом! 3D кионын но таӵезэ уг возьмато! Табере милемлы нокыӵе телевизор но, компьютер но, телефон но кулэ ӧвӧл ни, мультикъёс но учкеммы уг пот ни, видеошудонъёсын но шудэммы уг пот ни.

Кӧня ке нунал талэсь азьло нош ик висьыны уси, «туж урод кызыны кутски» мамалэн верамезъя, соин школае ӧй мыны. Табере Эте вожъяське мыным, быдэс нунал Кузёен ӵошен улом шуыса.

–  Не пойду в садик. Мама, мон что-то кашлятьтӥсько, кхе-кхе, – удмурт сямен вераськыны выре Эте. Со тодэ угось, удмурт сямен вераськыкуз, мама котьма карыны дась.

Адӟисько, мама тани-тани соглаш луоз ини но Этеез гуртэ кельтоз. Телефонэз жингыртӥз.

–  Да, да, даа, да, даа, да, дааа, да, даааа. – Ымнырызъя адӟисько, Эте мыноз ик туннэ садике. – Серёжик, дӥсяськы ӝоггес, мыным ужысь жингыртӥзы, уже трос туннэ. Этедэ туннэ тон ваёд садикысь, – шуиз мыным. – Эшшо базаре курегпуз басьтыны ветлод, ачим уг вуы. Туннэ Нюра апа вузаське, пе. Ме коньдон. – Мыным коньдон мычиз.

– Бедный, бедный, больной ребёёёноооооок, – вераса но бӧрдэмъяськыса, Эте мамаен квартираысь потӥз. Куараоссы коридорысь лифт вуытозь кылӥськизы на.

Куараос дугдэм бере, комнатаысь ӧсэз усьтӥ:

– Кузё пот, нокин ӧвӧл гуртын, – шуи.

Гуртын нокин ӧвӧл дыръя, шкафъёсысь канфет-преник-шоколад утчам. Пакетысь преник ӝыныез куртчылэмын – Эте озьы юри куртчылэ, куртчылэмез солэн шуыса, нокин но медам сиы, пе.

Телевизор ӵаш потэ. Мама, ӵукна учкем бераз, ӧвӧл кысэм.

– Ма отын верало? – юа Кузё.

–  Тон ӟуч сямен одӥг но уд валаськы шат? – Паймисько. Мон малпасько вал, ӟуч кылэз тодӥсьтэм адямиос ӧвӧл шуыса. Школаысь дышетӥсьмы вераз, Россиын улӥсь котькуд адями, пе, ӟуч кылэз тодыны кулэ. Нош озьы ӧвӧл вылэм.

– Уг, – шуэ Кузё. – Монэ ӟуч кылын вераськисьёс уг но адӟо. Монэ удмурт сямен вераськисьёс гинэ адӟо но кыло.

– Ну и ну! – абдрасько. – Табере валасько, малы тонэ киоскысь нокин но ӧз адӟы! Значит, тон параллельной удмурт дуннеын гинэ вань, нош ӟуч дуннеын тон ӧвӧл?

– Озьыгес-а мар-а, – вазе Кузё.

– Нош кызьы Эте тонэ адӟе но кылэ? Со ӟуч сямен вераське ук! – нош паймисько.

– Вань пиналъёс монэ адӟо но кыло – котькыӵе кылын мед вераськозы. Бадӟымъёс уг адӟо, кин удмурт сямен вераське, соос гинэ адӟо но кыло.

– Вау! Круто! – шуисько.  

Канфет-преник сием бере, кызонлэсь лекарство юоно кариськи.

– Мынам кызонлэсь паймымон эмъюме вань, –  шуэ Кузё, – мон тонэ шумприч бурмыто!

– Мынам уг поты шумприч бурмеме, мынам гуртын тонэныд кемагес улэме потэ, – шуисько.

–  Ӵок, – шуэ Кузё, – бурмид ке но, кызэмъяськод ай!

– Я бен, вай татчы паймымон эмъюмдэ.

Кузё песьтэрысьтыз куасьтэм турынъёс, мульыос, сяськаос поттылыса, чай париз.

– Тани эмъюме, – шуыса монэ парем чаеныз удэ, ачиз но юэ. Шӧдӥсько, чыртые небыт но шуныт луэ, мугорам кужмо шуныт тулкым ӝутске, синмы лыз-вож адӟыны кутске.

– Маин та чаед? Синмы ик лыз-вож адӟе, – шуисько.

– Марымен, – шуэ. Папамы но, ма шуыны уг ке шедьты, мырым шуэ. Мама куддыръя папалы исаса «Марымдэ марыменыд марымад ин-а?» шуса вазьылэ. –  Аслам дасям эмъюме, паймымон турынъёсты тодӥсько, паймымон интыысь бичасько, – азьланьтэ валэктыны Кузё.

Чай, яке паймымон эмъюм, юэме бере, базаре курегпуз дуре дасяськи. Кузёез но сьӧрам басьтыны малпай, сое нокин но уг адӟы бере.

Квартиралэн ӧсэз шлач! пытсаськиз. Тётя Маня соку ик йырзэ ӧсэтӥ мычиз:

– Нош ик школае ӧд мыны шат?! Сомында прогуливать карид ке, двоечник луод, –  куаретӥз монэ.

Лифтэ пырим. Кык этаж васькыса, лифтэ воргорон но кышномурт ог вить аресъем нылыныз пыризы.

– Чырткемесь, – вазиз Кузё. Пичи ныл Кузё шоры котырес синмын учке.

– Мама, я вижу волосатого гномика, – шуэ мамаезлы.

– Зайка, вот погуляем и включу тебе мультик, где семеро гномиков, – шуэ мамаез.

– Мама, он еще разговаривает, он сказал «Циркемес».

– Наверно, на сегодня хватит мультиков. Пойдем, зая, пойдем подышим свежим воздухом.

– Драсте, – вазиз воргорон.

Кыре потӥм. Нырам шунам но нош кынмем лымы зын йӧтӥз. Йӧӟектэм сюрес вылэ мамык лымы усе. Малпамтэ шорысь писпуысь ӵыж-ӵыж горд комокъёсты адӟи. Горд кӧто шушыос тӧдьы лымы улысь горд палэзь кокчало вылэм. Кӧня татӥ ветлӥсько, нырысьсэ шушыосты адӟисько!

Базаре трамваен мыноно. Горд кӧто но ӵуж йыро трамвай паймымон тылобурдо кадь адӟиське тӧдьы-сьӧд-пурысь остановка но коркаос азьын. Трамвае пуксеммы бере гинэ, тодам лыктӥз, проезднойме вунэтӥськем шуыса. «Ой, кажется я забыл проездной» кондукторлы шуэме потэ вал но, ымысьтым мукет потӥз:

– Документме вунэтӥськем, – шуисько удмурт сямен. Кондуктор шоры мыр-мыр учкисько. Со уг адӟы. Эшшо одӥг пол «Документме вунэтӥськем» шуисько – уг но кылы, уг но адӟы. Мынам пыдъёсы куалекъяны кутскизы: ӟуч кылын вераськеме уг луы ни, монэ адямиос уг адӟо. Мон Кузё кадь луи.

Синмы нош ик лыз-вож адӟыны кутскиз. Кӧня ке улыса, трамвайысь югыт но небыт тылэн пиштӥсь адямиосты адӟыны кутски, соос шорам учко, пальпото. «Соос монэ адӟо но мыным шумпото» малы ке но малпай мон.

Остановкамы вуэм бере, тэтчыса трамвайысь потӥм. Лымы вылын пукисько, гольык йыр, гольык ки – шапкаме но пӧзьме трамвае вунэтӥськем.

– Кузё, ма монэным таӵе луиз? Ӟуч кылын вераськеме уг луы ни, кондуктор шоры мыр-мыр учкыса но, ӧз адӟы монэ. Табере монэ  югыт тылын пиштӥсь адямиос гинэ адӟо.

– Марым… вераны вунэтӥськем… паймымон эмъюме кызонлэсь бурмытон сяна, эшшо удмуртомытэ. 

– Кызьы озьы удмуртомытэ! – паймыса кеськисько!

– Марым … Тон табере мон кадям удмурт дуннеын гинэ улӥськод. Удмурт сямен гинэ вераськыны быгатӥськод. Удмурт адямиос но пиналъёс гинэ тонэ адӟо. Нош ӟуч сямен вераськись мӧйыос тонэ уг адӟо. Тӥни озьы, юлтоше.

– Нош кинъёс соос югыт тылын пиштӥсь адямиос? – юанэ уг быры.

– Удмурт сямен вераськись но удмурт дуннеын улӥсь адямиос. – Валэктэ Кузё.

«Вот это да!» шуэме потэ вал но, ымысьтым:

– Остэ Инмаре! – потӥз. Тётя Манялэсь тазьы вераллямзэ кылылэме вань кадь.

Мон ӟудӥ. 

Кӧня ке пукеме бере, Нюра апалэн вузаськон интыяз мынӥ.

– Анай курегпуз басьтыны ыстӥз, – шуисько, нош ачим паймисько: мамаез ноку но «анай» шуылэме ӧй вал на.

– Э-э-э, кыӵе чебер удмурт сямен вераське, пие, – вазе Нюра апа. – Тон кинлэн бон пиез? – юа.

– Ниналэн, – шуисько, – Дюрик мон. 

– Чаль ай, чаль, пие, анаедлы шуыса тани бадӟымъёссэ кукей дасяй. –  Монэ лавкаяз пыртэ. – Утялто тонэ, – шуыса кампетъёс поттылэ.

– Насьток! – кеськиз бускель вузаськисьлы, – чаль ай, учкы, кыӵе чебер та пиёке удмурт сямен вераське. – Насьток вуиз но табере мыным сылалтэм огречен-киярен банка мыче.

– Катьырнау! – кеське Насьток, – лык ай, адӟы…

– Кинлэн бон та пиез? – юа Катьырна но кубиста йыр сётэ мыным. – Фариса, лык ай, учкы, – кеське со. 

– Мар бон дауртӥськоды, индэ? – юа Фариса матэктыса, мыным пакетэн преник сётэ.

Собере вуиз Одоть, собере Аннок, собере Такъян, собере Варуш…

Сылӥсько базарын. Котырам кышномуртъёс люкаськемын. Шорам пальпотыса но яратыса учко. Ымныръёссы шунды кадь ворекъяло. Йыразы ӵужо-гордо-вожо-лызо-тӧдьыё кышетъёс керттылэмын. Куспазы маке но ӟольгыриос сямен ӟабыльто, маке но мыным сёто. Киосам сумкаос, пакетъёс ошылэмын кубистаен, сылалтэм огречен-киярен, губиен, преникен, кампетэн. Чыртыям но маке ошемын – сушки вылэм. Киосам кытысь ке но чебер горд-вож пужыё ыжгон пӧзь вуэм, нош йырам – изьы. Син азям ик киям курегпуз-кукей возисько.

Курегпузэз адӟыса, тодам вайи малы лыктэмме.

– Я, тау, – шуисько. – Мон табере берто.

– Э, пие, анаед кыӵе ӟеч тонэ будэтэм!

– Ме эшшо кампет сюрес вылэ.

– Эшшо преник.

– Пересьмон.

– Кокрок.

– Шаньга.

Нырам ческыт пыжиськем зын йӧтӥз. Ӟеп-кисы-корманъёсы кузьым-саламъёслэсь кеськыны дась!

Сумкаосме муз вылтӥ кыскыса, сюлтыр-калтыр остановкае вуи. Соку гинэ Кузё тодам лыктӥз. Малпаны ӧй вутты, адӟисько, эше вуэ ини – со но, мон сямен ик, сумкаосын-пакетъёсын мырдэм ӵемтаськылыса-канжаськылыса лыктэ.

– Тон кытын вал? – юасько.

– Марымъёсме адӟыны ветлӥ, – шуэ.

– Кинэ-кинэ? – уг валаськы.

– Иськавынъёсме адӟыны ветлӥ, – шуэ.

– Кин со – иськавын? – паймисько.

– Ӵыжы-выжые, – валэктэ.

– Тынад базарын иськавынъёсыд вань шат?! – нош ик юасько.

– Нош кин малпаськод кышноослэсь ваньбурзэс утьыса улэ? Кин малпаськод чакласькыса улэ, басьяськись мед тырмыт луоз шуыса, кубиста медам шуя шуыса, кияр ятырзэ медаз чырса шуыса?… Котькинлэн аслаз утисез-кузёез вань!

Мон нош ик ӟудӥ.

Трамвае пуксим. Кондуктор шорам пиштӥсь ымынырын яратыса учке.

– Пие, пуксьы татчы интыям, – кондукторлэн пуконаз монэ пуктэ. – Котырдэ тани татчы поном, нокинлы уз люкеты.

Проезднойме ӧз юа, коньдон тырытэк мынӥ.

Лифтысь потэм берам, котырме гыыыжжжж кыскыса, кызьы но озьы вуи квратира дорозь, усьтонме утчаса сылӥсько. Тётя Маня потӥз.

– Э, пие, кӧня котыред! – пальпотэ со, нош ымнырыз югыт тылын пиштэ. – Вай юртто. – Сумкаосме басьтӥз, курегпузме эскериськыса выж вылысь ӝутӥз но пырыны юрттӥз. Базарысь ваем ваньбуре гурезь бадӟа люкаськиз! Маиз но отын ӧвӧл! Ох, мамаен-папа шумпотозы ук!

Тётя Маня кошкем бере абдраса пуки, ма таӵе тётя Маняен луэм шуыса, ноку но монэным сыӵе ӟеч вераськемез ӧй вал на.

– Малы пиштӥсь адямиос мыным пальпото? Малы соос сыӵе ӟечесь монэным? Малы котькинлэн мыным юрттэмез потэ? – юасько Кузёлэсь.

– Соос шумпото, соослэн кылынызы вераськись пиналъёс вань шуыса, шумпото, ӵыжы-выжы но кыл азьланьтӥсьсы вань шуыса. Соос туж пиналъёсты ярато, шумпото пиналъёслы.

– Нош кызьы соос тодо, кыӵе кылын мон вераськисько?

– Тон но со адямиос кадь ик пиштӥськод. Соос тонэ кыдёкысен адӟо. Одӥг кылын вераськись адямиос ог-огзэсты ярато но дунъяло, тужгес но пиналъёсты. 

– Малы мон соосты татчыозь ӧй адӟылы? Монэ но нокин но ӧз адӟылы?

– Тон котькинэн ӟуч сямен вераськид но ӟуч дуннеын улӥд. Ӟуч сямен вераськись удмурт дуннеын уг адӟиськы.

– Ааааа, – валаса сямен нёжтӥ мон. Кузёлэсь верамзэ эскерон понна, телевизор ӝуатӥ, каналъёсты вошъясько. Учкисько: адямиос ымзэс усьяло, сьӧд костюмен дӥсяськем воргоронъёс кизэс кырмо, бадӟым городъёсты возьмато, трос машинаос, кин ке но эктэ, кытын ке но тӧлпери, кытын ке но автоматъёсын адямиос. Ваньмыз со – туж кыдёкын, валантэм, туж кышкыт. Кышканнам ӝог гинэ кысӥ телевизорез.     

Вераськыса пуконнамы садике мынон дыр вуиз. Кызьы, малпасько, Этеез садикысь басьтом, монэ воспитатель уг адӟы ук. Малпай корка азбарамы бускель тётя Катяез возьманы, солэн нылыз Этеен одӥг ёз, одӥг садике ветло. Эте как будто соин гуртэ бертоз. Тётя Катялэн Этеез вань ини садикысь вайылэмез.

Пукиськом Кузёен ӟечыранын тётя Катяез возьмаса. Тани потӥз, ми бордаз матэктыса садике мынӥм. Со милемды уг адӟы. Садике вуыса, Сёрежикез утчасько. Воспитатель доры лыктӥ но:

–  Серёжик, – шуисько. Со уг адӟы монэ. – Серёжик, – нош ик шуисько. – Уг адӟы. 

– Он в домик спрятался, – шуиз кин ке но пиналъёс пӧлысь.

Эте шудонкорка ватскем.

– Не хочу домой, ещё поиграть хочу, – шуэ.

– Эте, мон Кузёен татчы лыктӥ, – шуисько.

– Где Кузё? Кытын Кузё? – бызьыса ик шудонкоркась потӥз но Кузёез утчаны кутскиз.

Адӟиськом, корт кенер вӧзы трос пиналъёс люкаськиллям. Соос Кузёез озьы котыртӥллям. Кузё песьтерзэ поттэм но пиналъёслы возьматъя, маиз отын вань. Пиналъёс паймыса учко. Эте пӧлазы пыриз но:

– Это мой друг – Кузё, – шуэ.

– Я тоже хочу такого друга! – шуэ Марина нимо ныл.

– И я! – и я! – и я! – и я! – и я! – чирдо мукет пиналъёс.

– Он говорит только по-удмуртски, – шуэ Эте. – Кузё – мынам эш, – юри удмурт сямен вераськыны тырше Эте. – А ещё он настоящие сказки рассказывает, самые-самые пренастоящие! – ушъяське Эте.

– Я тоже хочу говорить по-удмуртски! – шуэ Марина ныл.

– И я! – и я! – и я! – и я! – и я! – кесясько мукет пиналъёс.

– А я уже умею, – нош ик ушъяське Эте.

Со куспын воспитатель лыктӥз.

– Дети, разойдитесь и идите играть. Марьванна проведет с вами игры.

– Мы хотим учить удмуртский! – шуэ Марина ныл воспитательлы.

– Хотим удмуртский! – хотим удмуртский! – хотим удмуртский! – хотим удмуртский! – сьӧраз верало пиналъёс.

– Дети, ваши родители вместо удмуртского выбрали английский, – шуэ воспитатель. – Будете смотреть мультфильмы на английском.

– А мы хотим слушать пренастоящие удмуртские сказки по-удмуртски, которые будет рассказывать Кузё! – уг сётӥськы Марина ныл.

– Хотим по-удмуртски! – хотим по-удмуртски! – хотим по-удмуртски! – хотим по-удмуртски! – сьӧраз нёжъяло пиналъёс.

– Разойдитесь, дети, идите играть! – Пиналъёс садик азбар пасьтана пазьгиськизы.

Тётя Катя, нылзэ китӥз кутыса, садик ӟезьыетӥ потэ. Ми куинь кузя ӟезьы доры шонтӥм. Воспитатель малпаз, туннэ Эте тётя Катяен кошке шуыса.

Гуртэ бертыса, Этелы базарысь ваем ваньбурме возьматӥ.

– Агай, давай ватос сделаем, – шуэ Эте. Кампет-преникмес олокытчы гинэ ватылӥм, мамаен-папа ӧвӧл дыръя, куинь кузя лушкемен сиём. Ӝытазе мамаен-папа бертӥзы но ваньбур гурезямы одӥг канфетэз но, одӥг преникез но ӧй вал ни, кубиста-огреч-губи гинэ кельтӥм на. Соизлы но туж паймизы но шумпотӥзы!

Ӵуказеяз ӵукна ваньзы садике-институтэ-стройкае кошкемзы бере, бызьыса ульчае потӥ. Нош ик пиштӥсь, пальпотӥсь но яратыса шорам учкись ымныръёсты адӟеме потӥз. Кырын лымы шунаны кутскем, машина ӵын зын. Азбаре потӥ – пиштӥсь ымныро адямиосты ӧй адӟы, шунаны кутскем лымылэсь сьӧдэктэм ӟусъёсты гинэ адӟи. Остановкае мынӥ – ӧй адӟы, пурысь шиферез гинэ адӟи. Магазинэ пыри – отын но ӧвӧл. Вузкарись шорам шуям пурысь ымнырын учке:

– Тебе чего, мальчик? – юа.

– Ничего, – шуисько ӟуч сямен. Соку магазинысь лобӟыса сямен потӥ, мон табере нош ик ӟуч сямен вераськисько. Викышъяны кутски, малы ке шуоно, табере валай, малы пиштӥсь адямиосты адӟеме уг луы ни.

– Кузё, малы мон табере нош ик быгатӥсько ӟуч сямен вераськыны? – юасько Кузёлэсь.

– Паймымон эмъюмелэн кужымез одӥг нуналлы гинэ тырме, – валэктӥз со.

– Мон табере пальпотӥсь но яратыса учкись адямиосты ноку но-а уг ни адӟы?

– Малы уд адӟы, тон удмурт сямен вераськись адямиосын удмурт сямен вераськид ке, соос тыныд пальпотозы но шумпотозы. Нош ӟуч сямен вераськись адямиосын ӟуч сямен вераськид ке, телевизорысь, городысь но школаысь дунне тыныд матынгес потоз, умойгес валалод со дуннеез, отысь трос тунсыкозэ шедьтод. Нош ёрмид ке, мон тыныд эшшо эмъюмме паро. Эн куректы, эше, ойдо гуртэ бертыса ватосысьтымы преник сиём!

Кӧты буйгаз, сюлмы но капчи луиз. Корка пала вамыштӥм. Корка дорысь шушыосын писпуэз утчасько. Ӧй адӟы шушыосты, палэзез но куасьмем сьӧд палэзь гинэ адскиз.

– Кузё, нош кытчы яркыт буёлъёс но ческыт зынъёс ышизы? – юасько.

– Отчы ик, кытчы пиштӥсь адямиос ышизы, – вазиз Кузё.

Бертыса канфет но преник сиим. Телевизор учки, табере ваньзэ нош ик валаны кутски, ма отын верало. Ӧй ни кышка. Ваньмыз сыӵе тодмо но огшоры потӥз.

Кӧня ке нунал ортчыса, дорамы тётя Катя лыктӥз. Мама милемды комнатаямы мыныны косиз, «серьёзной вераськонмы», пе, вань. Мон ӧсэ ӟубис кельтыса, лушкемен кылзӥськи вераськемзэс.

Садикысь пиналъёс, Кузёен пумиськемзы бере, нуназе садикын сиськемысь дугдӥллям, пе. Пока, пе, удмурт кылэз дышетыны ум кутске, ум сиське шуо, пе. Вае, пе, милемлы удмурт кылъя кружок, английский кылэз, пе, уг поты дышетэммы. Садикысь директор но воспитательёс кышкатскиллям, ма карыны уг тодо ни, пе: мама-папаослы английский кыл кулэ, нош пиналъёслы – удмурт. Садикын ужасьёс кенешиллям, созэ но тазэ но, пе, ӵошен дышетозы. Табере мама-папаослэн комитетсылэн йырыз – тётя Катя – мама доры дышетӥсь сярысь юаськыны лыктэм. Сыӵе дышетӥсь, пе, кулэ, кудӥз английский но удмурт кылын умой вераське. Мамамы удмурт институтын ужа бере, трос адямиосты тодэ. Отчы-татчы жингыртылӥз, шедиз ик сыӵе дышетӥсь! Кӧня ке дыр ортчыса, Эте садикын удмурт кыл дышетыны кутскиз, английскийзэ но.     

Мон малпаськыны кутски: Эте удмурт но ӟуч кылэз сяна, эшшо английскийзэ тодӥз на ке, кызьы меда со английской дуннеез адӟоз?! Кызьы малпаськоды?