Суредъёсыз Арина Лопатиналэн.

Текстэз Светлана Едыгаровалэн.

Ленӥлэн сямыз öвöл удалтэм: туж кышкась, бöрдӥсь но куатаськись пöрмем. Кöлыны выдыкуз, пеймытын кöлыны кöшкема: малпа, кин ке но валес улысь потоз но пыдтӥз кутоз шуыса. Кöшкема, кыӵе ке но моко пеймыт укное йыгаськоз шуыса. Соин ик Ленӥ уйбыт ӝуатэм лампаен кöла. Нош мамаез нукыртэ, озьы трос электричество но коньдон быре шуыса.

Эшшо Ленӥ пуныослэсь кышка. Одӥг пол бускель пуны туж зол утыса сьöраз уйиськиз, öжытак гинэ öз куртчы. Ачиз пуны туж мусо адске кадь, мугорыз но бадӟым öвöл. Мукет пиналъёсын мыло-кыдо шудэ, уг уты, Ленӥез гинэ уг яраты. Со нуналэ Ленӥ азбарысь куакъёс пушкы ватскиз но ӝытозь отын нискетыса пукиз. Бер ӝыт гинэ мамаез сое отысь шедьтӥз.

– Эк-эк-эк, кышкасе тон мынам, – нежтӥз мамаез, – кино-о бен сыӵе пичи пунылэсь кышка!

Быззззз! эшшо но золгес бöрдыны кутскиз Ленӥ. Бызьыса пыриз гуртаз но, шобрет улэ ватскыса, кема бöрдӥз на. «Мон ваньмызлэсь кышкасько! Мон ялан бöрдӥсько!» шуыса нискетыса кыллиз.

Школаын но ульчаын, эшъёсыныз шудыкуз, ӵемысь бöрдонэз потылӥз: кин ке донгыны шедьтэ ке, Ленӥ ӟыззз бöрдэ ини. Ватскыса шудыкузы, Ленӥез нырысь шедьто ке, со куатаське ини. Бызьыса мыныкуз ӵемтаськыса усе ке, нош ик бöрдонэз потэ. Сомында бöрдэменыз, эшъёсызлэн Ленӥез шудонэ но кутэмзы уг поты ни.

Нош самой кышкытэз Ленӥлэн улоназ – со физкультура урок, тужгес но бассейнын. Нырысетӥ урокын Ленӥ ӵушконзэ гуртаз вунэтэм. Дышетӥсьлы со сярысь вераны öз дӥсьты, возьдаськиз. Бассейнысь потэм бере, дӥсьсэ кот мугорыз вылэ дӥсяз но школаын лумбыт кынмыса ветлӥз. Ленӥ висьыны усиз, арня ӵоже дышетскыны öз ветлы. И вообще, Ленӥлы бассейн уг яра: отын кот, кезьыт, хлорка зын, пиналъёс кесясько но ӵашето, Ленӥлэн пеляз жоннн вазе. Нош дышетӥсь ӵаш потӥсь бассейнын кесяське: «Озьы каре! Табере тазьы каре! собере отчы мынэ!…» Ленӥлэн пельыз урме, мар дышетӥсь вера, уг вала ни. Нош дышетӥсь йыркуръяськыны кутске:

– Лена, ма отын сылӥськод?! Мон верай ук, табере тыбыр вылын уяса мынӥськом! Ваньмыз сопал дуре вуизы ини, тон гинэ ог интыяд сылӥськод на!

Озьы верам бере, Лени ӟыззз бöрдыны кутске но урок пумозь куатаськыса улэ. Нош дышетӥсь Ленӥлэн мамаезлы чагиське: «Нош ик öз кылзӥськы, нош ик урокбыт куатаськыса улӥз». Нош мамаез лулӟылэ гинэ, мар вераны уг тоды. Уйин, шобрет улэ ватскыса, Ленӥ вöсяське ас понназ: «Остэ Инмаре, мусое, кар озьы, медам ни луы физкультура урок! Мед быдэс дуннеын вань школаосысь пыраклы быроз физкультура урок! Мед коть математика луоз со интые, бассейнэ гинэ ветлоно медам луы! Юртты мыным, Инмаре, пожалуйста, ну пожалуйста!» Ленӥ математика урокез но сокем ик уг яраты вал, но даже математика урок бассейнлэсь трос поллы умойгес!

Одӥг пол нош ик вуиз кöшкемыт нунал. Туннэ физкультура. Бассейнын. Нырысетӥ урок. Ленӥ кулэ котырзэ рюкзаказ тыриз но бассейнэ мынӥз, кытын физкультура уроксы ортче. Пырон öсэз усьтӥз но, шуак дугдӥз. Собере öсэз пытсаз но бассейн сьöрысь парке кожиз. Ленӥ уроке öз мыны.

Кöня ке ӟус вылын пукиз, ӵужектэм куаръёсты ӵыжаса ветлӥз, нызьылиез адӟиз но сое музъеме согиз: «Мын, берт гуртад» шуиз солы. Собере паркысь фонтанэз адӟиз. Фонтан уг ни ужа, толлы дасяськыса кысэмын ини, но вуэз пыдэсаз кöня ке кылемын на. Ленӥлэн йыраз соку ик малпан чилектӥз: рюкзакысьтыз пыласькон дӥсьсэ, ӵушконзэ поттӥз но, фонтанысь вуын коттӥз, берен рюкзаказ понӥз. Собере кöня ке йырсизэ коттӥз. Паркын кöня ке котыръяськемез бере, школае вуоно уроке мынӥз. Школаын нокин но öз шöдылы кадь, кызьы Ленӥ ваньзэсты пöяса кельтӥз. Вань урокъёс номыр кадь ик капчиен ортчизы.

Школа бере, эшъёсыныз ульчаын шудэмез бере, Ленӥ гуртаз бертӥз. Корка пырыкуз, мамаез гуразьпалан ӝож ымнырын пуке вал.

– Елена, лык ай татчы, – шуиз со. – Кытын тон вал туннэ ӵукна? – юаз со.
– Бассейнэ ветлӥ, – пöяськемезлэсь возьдаськыса вераз Ленӥ, – тани купальнике но ӵушконэ котэсь на.
– Эн пöяськы! – кеськиз мамаез, – мыным физкультураен дышетӥсьты вераз, тон туннэ уроке öд ветлы шуыса. Эшшо ке пöяське на татын! Озьы карид бере, таяз арняе уд мыны кинотеатре Катя эшеныд, коньдон уг сёты, эн ик малпа курыны!

Ленӥлэн бöрдонэз пертчиськиз. Быззззз карыса комнатаяз кошкиз. Сыӵе кема возьмаз со нуналэз, сыӵе кема малпаса улӥз, кызьы со Катя эшеныз мынэ кинотеатре, шыръям коньдонэныз басьтэ поп-корн но фильмез учкемез бере эшъёсызлы маде, кыӵе причёскаен героиня солы тужгес но яраз. Вань эшъёсыз учкизы ини та фильмез кинотеатрын, нош Ленӥ – компьютерысь гинэ! Ыыыыыыыыыыыы! зааар бöрдэ Ленӥ.

Со уйе Ленӥ кема умме усьыны öз быгаты. Кема вогаз ас понназ: Што за улон! Што за физкультура! Што за сям! Што за мама!

Озьы кылльыкуз, малпамтэ шорысь кин ке но пеймыт укное йыгаськиз. Моко кожаса, туж зол кышканназ, Ленӥ шобретаз биниськиз но валес сэргы ӝиптӥськиз. Синъёссэ туж зол кыниз. Шöдӥз, кин ке но укноез усьтэ, эшшо золгес куалекъяны кутскиз. Собере кин ке но каллен гинэ пельпум бордаз йöтскиз. Ленӥ öз усьты синзэ. Собере пельпумзэ эшшо но золгес зуркатӥзы, собере эшшо но эшшо.

Ленӥ нырысь одӥгзэ, собере мукетсэ синзэ усьтӥз – азяз куинь нылъёс сыло. Одӥгезлэн йырсиез вакчи, сьöд, йыраз шлем, ымнырыз лек учке, платтяез вакчи, пыдаз кузь сапег. Мугорзэ утись корт дӥсез вань, кияз бадӟым но кузь меч.

Мукетызлэн йырсиез пельпум дорозяз, суд. Ымнырыз визьмо учке, очкиез вань. Тöдьы дэремен, сьöд штанен, кияз компьютер.

Куинетӥез – туж чебер: йырсиез кузь, тöдьы но бабля. Кузь, тöдьы платтяез капчиен тöлъя веттаське. Таизлэн кияз номыриз но öвöл, но таизлэн киосыз йöспортэмесь: соос ӵуж тылэн ӝуало кадь.

 

– Ми кемалась тонэ тодӥськом, – шуиз шорысез ныл. – Куке пиналъёс бöрдо, соослэн синкылиоссы милям зарни ӵашаямы люкасько. Ми со ӵашаысь бакчамес кисьтаськом, отын кубиста будэ. Туриос со кубиста пӧлысь пичи нуныосты шедьто но соослы мама-папа утчало. Тон котьку юрттӥськод ӵашамес тырмытыны, сое тыраз возьыны. Только берло дыре бакчамес кисьтаса ум вуиське ини, йыровыл луэм ӵашаысь синкылиос тюррр вияло но музъем вылэ йöзор луыса усьыло. Трос гуртъёс, коркаос быризы ини, угось йöзор липетъёсты, укноосты пильылыса быдтӥз; трос писпуос быризы, нош тылобурдоос каръёстэк кылизы.

– Ыыыыыы, монэным сэрен, мон виноват … мон уг быгатӥськы … – нош ик бöрдыны кутскиз Ленӥ.
– Сыл ай, сыл! Эн дырты бöрдыны, – шуиз сьöд йырсиёез ныл, – Ми тыныд юрттыны лыктӥмы. – Мынам Ожга нимы, – шуиз со, – мон тонэ утё, юртто кышкандэ вормыны.
– Нош мон – Визьга, – шуиз очкиенэз ныл. – Мон йырыным зол ужаны быгатӥсько, мон – туж умой аналитик. Мон юртто тыныд котькыӵе югдурын йырыныд малпаськыны.
– Нош мон – Нылга, – шуиз тöдьы платтяен ныл. – Мон туж ӟеч мылкыдо,  ӝожтӥськемдэ, сюлмаськонъёстэ кылзо, тыныд буйганы юртто. Мынам киосы котькинэ буйгатыны быгато. Пуксьы азям, ойдо мон тонэ ӟыгырто, йырдэ маялляло, тыбырдэ вешало. Вот озьы, табере тон буйгаськод, кыниськод синдэ…

Ӵукна Ленӥ капчи мылкыдын сайказ. «Кыӵе умой вöтай!» – малпаз со. «Мынам выль эшъёсы вань шуыса вöтай! Нимъёссэс но тодӥсько на: Ожга, Визьга, Нылга. Сыӵе соос чебересь, визьмоесь, кышкасьтэмесь! И соос мыным юртто! Кыӵе жаль, зэм-зэм улонын сыӵе эшъёсы öвöл шуыса.»

Ленӥ гуразьпала мынӥз. Мамаезлэн кымесысьтыз кисыриоссэ адӟыса, тодаз лыктӥз, кызьы со толон мамазэ пöяз, кызьы мамаез йыркуръяськиз. Ымдуръёсыз нош ик дырекъяны кутскизы. Нош удалтымтэ кинотеатрез тодаз вайыса, куатаськонэз нош ик пурӟиз, тани-тани пельысьтыз ӵын потоз.

Малпамтэ шорысь пель дораз чингыли куара кылӥськиз: дин-дон!

– Бур ӵукнаен! – чузъяськиз куинь тодмо куара.
– Ой! – куалектӥз Ленӥ, – Со вöт öй вал шат!
– Öй, – шуиз куинь тодмо куара.
– Паймоно кадь, – шуиз Лени, – куараосты кылӥсько, нош адямиосты уг адӟиськы.
– Со сяна, милесьтым вераськеммес но нокин уг кылы, – шуиз Визьга.
– Малы куатаськид? – шуыса юаз Нылга.
– Мама монэ кинотеатре öз лэзьы, – бöрдон калэ вуыса вераз Ленӥ.
– Нош малы мамаед öз лэзьы?
– Мон пöяй сое физкультурае ветлӥ шуыса, нош ачим паркетӥ калги.
– Нош малы пöяд?
– Мон кышкай, мама йыркуръяськоз шуыса, тодӥз ке.
– Тон малпад, со уз тоды шуыса? – юаське Нылга.
– Нууу, всёравно тодысал, – нежтӥз Ленӥ, – физкультураен дышетӥсь котьку чагиське мамалы.
– Озьыен малы соку зэмзэ öд вера мамаедлы?
– Мон умой öй малпаськы, сыӵе зол кышкай.
– Нош табере малпаськы, мар али каремед луэ, – шуиз Визьга.
– Мон тодӥсько! – шуыса кеськиз но мамаез доры матэктӥз Ленӥ.

– Мама, вождэ эн вайы пöяй шуыса. Мон туж уг яратӥськы бассейнэ ветлыны, отын кот, кезьыт, ӵаш потэ. Мон урмисько но уг кылӥськы, ма дышетӥсь вера.
– Нылы, вожме уг вайиськы. Ойдо соку тыныд шунытгес купальник басьтом, нош пеляд – наушник ву медаз пыры, пельыд медаз урмы шуыса. Нош тон азьланяз эн пöяськы, вера мыным сюлэмшугъяськонъёстэ.
– Я! – кеськыса Ленӥ мамазэ чупаз но школае кошкиз.

Падӟа кузя васькыкуз, пуны утэм куара кылӥз. Сьöраз бускель пуны нош ик уйиське. Ленӥлэн кышканназ сюлмыз чутрак луиз, öз но кылы, кызьы дин-дон! вазиз.
– Мон татын, мон утё тонэ, – кылӥськиз Ожгалэн куараез.
– Ваньмыз умой, Ожга утёз тонэ, – вераз Нылга. – Табере мон тонэ китӥд кутӥсько, кидэ кырмисько, тон кöня ке чидаськод, куинь пол туж мур шокчиськод но буйгаськод.
– Табере учкы пуны шоры, – вазиз Визьга, – со сьöрад уг уйиськы, со кузёез доры шумпотыса бызе. Учкы, кыӵе мусо кучапи! Уг-а поты сое кöня ке маяллямед?
– Потэ, – шуиз Ленӥ. Чакласькыса матэктӥз пуны доры но маялтӥз сое. Пуны шумпотонназ тэтчаны кутскиз, Ленӥлэсь кизэ, ымнырзэ нюлыны.
– Можно-а мон соин туннэ кöня ке калго? – юаз Ленӥ пунылэн кузёезлэсь.
– О-о, шумпотыса! – мыняз пунылэн кузёез.

Ленӥ школае шумпотыса но лобаса мынӥз. Эшъёсыныз туж умой шудӥз. Кин ке сое донгыны шедьтэ ке, соку ик динь-дон! куара кылӥське: «Со юри öй вал» шуэ Визьга. Ӵемтыса усе ке, Нылга киыныз пыдессэ маялтэ но «Табере султы но азьлань мын» шуэ. Визьтэм пиналъёс исаськыны кутско ке, «Мон татын, мон тонэ утисько, эн кышка» шуэ Ожга. Пиналъёслэсь палэнын мӧзмыса сылыкуз, Визьга шуэ: «Тодӥськод-а, вань одӥг шудон, котькуд пинал со шудонэз яратэ». Ӝоген вань пиналъёслэн Ленӥен гинэ шудэмзы потэ ини. Ленӥлэн улоназ ноку но талэсь шудо нунал öй вал на!

Ӝытпал, кöлыны выдон азяз, Ленӥ мамаезлы вераз:

– Мама, табере тылэз яра кысыны, табере мон пеймытлэсь уг кышкаськы.
Ленӥ пеймытын валесаз выдӥз. Табере со тодэ, Ожга сое пеймытын мокоослэсь уте, нош Нылга йырзэ маялля.

Нош ик вуиз кöшкемыт нунал. Физкультура. Ленӥ дасяз рюкзаксэ, мынӥз бассейнэ, усьтӥз öсэз. Дугдӥз. Öсэз берен пытсаз.

Дин-дон вазиз:
– Мар тон кариськод? – юаз Визьга.
– Мон уг мыны, адӟеме уг поты бассейнэз, – шуиз Ленӥ.
– Собере нош ик мамадэ пöялод-а? – юаз Визьга. – Мамаед нош ик йыркуръяськоз, нош ик мае ке уз лэзьы карыны.
– Ыыыыыы, кышкасько! Мар-о бен каром?! – бöрдыны кутскиз Ленӥ.
– Нырысь ик буйга, – шуиз Нылга но ӟыгыртӥз Ленӥез.
– Табере вера, малэсь кышкаськод? – юаз Визьга.
– Отын кезьыт, – вераз Ленӥ.
– Соку дӥся шуныт купальниктэ, кудзэ мамаед басьтӥз, пöсь душе ветлы, душ бере ӵушконэн бинялскы.
– Мынам пельы урме, мон уг кылӥськы, ма дышетӥсь вера, – ватсаз Ленӥ.
– Пон пеляд наушник, дышетӥсь маке веракуз, мын дораз но эшшо юа одӥг пол.
– Мон возьдаськисько, кышкасько! – синъёссэ ик кыниз Ленӥ.
– Малэсь! – куинь кура кылӥськиз.
– Дышетӥсь йыркуръяськоз, пиналъёс серекъялозы.
– Нош тон дӥсьтӥд ке, одӥг пол коть öд ке кутаськы, вормод. Тон вормид ке, вуоноаз дышетӥсь но уз тышкаськы, пиналъёс но уз ни серекъялэ.

Ленӥ мур шокчиз но, öсэз усьтӥз.

Табере Ленӥ бадӟым будӥз ини. Табере со ӵем уг ни бöрдылы, зарни ӵашаез мукет пиналъёс тырмыто. Кышкамысь Ленӥ öз дугды, вогез но поталля, возьдаськонэз но вань. Дин-дон куараез кемалась уг кылылы ни. Озьы ке но, табере со ачиз быгатэ ассэ утьыны но буйгатыны, нош но нош выль öсъёсты усьяны.

Суредъёсты юри та текстлы лэсьтӥз Арина Лопатина. Арина улэ Ижкарын, дышетске Художественно-эстетической лицейын. Оскисько, азьланяз но ӵошен ужалом шуыса.