Текстэз Светлана Едыгаровалэн.

Туспуктэмез татысь: https://pxhere.com/ru/photo/177818

Кызь укмысэтӥ февраль, Ижкар

Сыӵе учыр вал туннэ! Сыӵе учыр! Возьмалэ ай, тани фонарикме умойгес интыяло, шобретме тупато. Коркан ваньзы кӧло ини, мон тани шобрет улын гожъяськыса кыллисько, медам нокин но шӧды шуыса. Тышкаськозы ато. Али ик ӧй ке гожты, собере вунэто пыр-поч гожтыны, ма туннэ луиз!

Тааак. Нырысь ик, туннэ кызь укмысэтӥ февраль (Нуналыз но кемдӥз ук!). Школае туннэ ӧй мыны, пылэдэн висьыны уси. Уйин температура ӝутскиз, зырыме ву кадь вия. Ӵукна мама шуиз, школае, пе, уд мыны, гуртэ кылёд. Мон, конешно, шумпотӥ.

Так-то мон четвёртой классэ ветлӥсько, дас одӥг арес мыным. Нимы мынам Дюрик. Вообще-то, тетрадьёсам Юрий шуыса гожъямын, Юрий Гагарин кадь, но ваньзы монэ Дюрик шуо. Папалэн агаезлэн кышноез Татарстанысь, Фарида кенак шуиськом сое, со озьы вераське: йыр интые дьыр шуэ, йӧл интые дьӧль. Мон вордскем бере «Дюректэс адӟем потэ ини! Возьматэ ук Дюриктэс!» шуэ, пе. Нырысь серекъяса гинэ монэ озьы шуыны кутскиллям мамаосы, собере со ним озьы ик кылиз. Табере вань семьяе монэ озьы нима.

Ма сярысь таӵе гожъясько вал ай? Ах да, школае туннэ ӧй мыны. Ӵукна мама коньдон кельтӥз на, магазинэ пельнянь но аптекае лекарство басьтыны ветлод, пе. Бумага вылэ лекарстволэсь нимзэ гожтӥз но прихожие Этелы дӥсяськыны юрттыны мынӥз. Эте – со мынам вить вресъем выны, вообще-то солэн Серёжик нимыз, но мама эте шуыны дышетӥз. Озьы ик дыши.

Прихожийын кӧня ке даллашемзы бере, садике кошкизы. Этелэн одно ик сӥзьыл нуллон пӧзьзэ понэмез потэ вал, нош туннэ кезьыт, мама сое шуныт ыжгон пӧзь дӥсятӥз. Этеез садике нуэмез бере, мама институтаз кошке. Папа кошкемын ини та дыре.

Мон огнам кыли. Укноетӥ учки, оло мамалэсь но Этелэсь подъездысь потэмзэс адӟо шуыса. Ӧй адӟы. Улӥськом ӝужыт коркан, дас ньылетӥ этажын. Укноетӥ сик адске, вить этажъем коркаос. Укно улын ик супермаркет. Мама Ижез чебер кар ӧвӧл шуэ ке но, милям укноетӥмы со туж чебер адске. Мыным озьы потэ. Туннэ кезьыт, завод мурыосысь ӵын шонерак выллань тубе.

Телевизор учкем уг поты. Телевизор ӝытбыт ужа, Эте одӥгез бӧрсьы мукетсэ мультик учке, йыр ик жумме. Мама сериалъёс учке. «Кӧня ке хоть майбыр улонэз адӟисько» шуэ. Папа «новости» учке, ӝытбыт одӥг ведущий одӥг иворъёсты вера. «Нош ик пересьмисьтэм старушкаед иворъёсын кышкатэ» шуэ мама папалы тодмо ведущий-кышномурт сярысь.

Кӧня ке легоен шудӥ. Выль арлы кузьмазы. Эте понна Тол Бабай мыным сое кузьмаз. Бадӟым космической станция. Кӧня ке нунал мон сое лэсьтыны выри. Этелэн но туж лэсьтэмез потэ вал. Мон адӟымтэ дыръя, лушкем шудэ легоеным. Собере адӟисько, маиз ке но тӥямын, я деталез кытчы ке но ышемын. Йыры кур луэ. «Эшшо одӥг пол исад на ке, машинкадэ жаге кушто» шуисько. Мама тышкаське, малы шудонъёстэ Этеедлы уд сётӥськы шуыса. Нош ачиз телефонзэ Этелы шудыны уг сёты ук!

Кӧт сюманы кутскиз. Кутӥ мамалэсь кельтэм коньдонзэ, лекарство нимын бумагаез, дӥсяськи, квартираез ӵогай. Ӵапак соку бускель квартираысь тётя Маня потӥз.

– Тон школаын ӧвӧл шат?! – абдраз со.
– Мон висько, мынам пылэд, – верай солы.
– Висиськод ке, пук дорад. Микробъёстэ пазяса татӥ эн ветлы! – Озьы шуиз но кышкаса палэнскиз дорысьтым. Мынам микробъёсы вылаз пыӵъёс кадь тэтчалозы шуыса малпаз-а мар-а.

Лифтэ но пырыны монэ бордаз ӧз лэзьы, кема витёно луиз. Папа тётя Маняез «параноик» шуэ. Со котькыӵе висёнъёслэсь кышка, ачиз нош висёнъёсын энциклопедия кадь: кыӵе гинэ солэн висёнэз ӧвӧл! Дорамы маке муген пыре ке, котьку висён сярысь вераськон потэ. Мама зӥбыт кылзӥськыса пуке, «Ох!», «Ах!» гинэ кырылэ на. Тётя Маня – удмурт. Мамаен, папаен, монэным удмурт сямен вераське. Этеен – ӟуч сямен.

Кык пинал пӧлысь мон гинэ удмурт сямен вераськисько, нош Эте – ӟуч сямен. Пичигес дыръяз, Эте суро-пожо вераське вал. Нош али тросгес ӟуч сямен. Садике мынэмез бере, удмурт кылыз ышиз-быриз. Куддыръя бен удмурт кылъёсыз потало ик. «Мама, лёлё хочу», «Агай, поедем к ӵужи (мамалэсь мамазэ озьы шуиськом)» шуылэ. Ӵемысь нылъёс кадь вераське: «Я уже зӥбила» шуэ лифтлэсь кнопказэ зӥбемез бере. Тётя Маня Этелэсь тазьы вераськемзэ кылэ ке, чапкиськыны кутске:

– Нина, – шуэ со мамалы, – учкай, пиед умойтэм вераське ук! Малы озьы курадӟытӥськоды пидэс?! Малы удмурт сямен вераськиськоды, вераське ӟуч сямен, мед дышоз одӥг кылын коть чебер вераськыны. Серем ук сураськыса вераськемез!

Аслаз тётя Манялэн кыкез ик пиналыз, – али бадӟымесь ини, асьсэлэн семьязы вань ини, – удмурт сямен пал кыл но уг валало. По крайней мере, ачиз Тётя Маня озьы шуэ. Картэз нош, ачиз но Тётя Маня, кыкназы ик тёп-тёп удмуртъёс, кытысь ке но то ли Пурга, то ли Можга палась. Картэз вить ар талэсь азьло кулӥз, вордскем удмурт гуртаз ик ватӥзы сое. Зэмзэ вераса, пиналъёсыз тётя Манялэн дораз туж шер бертыло. Мама шуэ, пиналъёсыз сое «деревня» малпало.

– Мыным серем ӧвӧл, мыным туж мусо потэ, – шуэ мама тётя Манялы Этелэн вераськемез сярысь.

Мамаелэн вань принципез – пиналъёсыныз удмурт сямен вераськыны. Мамае мынам – учёной или, кызьы ачиз шуэ, тодосчи, удмурт кылтодосчи. Ужаны ветлэ институтэ, отын удмурт кылэз изучать каре, кыӵе ке но словарьёс лэсьтэ, выль удмурт кылъёс малпа. Куддыръя гуртын но гожъяськыса пуке, статья гожъясько шуэ.

Мамаелэн тросэз эшъёсыз но коллегаосыз кунгож сьӧрын уло. Тросэзлэн семьяосазы пиналъёссы пӧртэм кылын верасько. Мама соослэсь адӟем каре, мынам пиналъёсы билингвъёс шуэ. Билингвъёс сярысь книгаос лыдӟе, эшъёсыныз кенеше, ачиз но гожъя ми сярысь. Эшшо монэ английской кружоке гожтӥз, куинетӥ кылэз, пе, мыным капчигес луоз дышетыны, малы ке шуоно, мон кык кылэз тодӥсько ини.

Милемын мама чылкыт удмурт кылын вераськисько шуыса малпа. Ӟуч кылъёс интые, институтаз малпам кылъёсын вераське: словарь интые кыллюкам шуэ, остановка интые дугдылонни, звонитьтыны интые жингыртыны. Мамалэн озьы чылкыт вераськемез ӝытозь гинэ луэ. Собере ӝытазе жадьыса бертэ но, «Нош ик словарьме уже вунэтӥ» шуэ, «Дюрик, ӵужиед звонитьтӥз-а инӥ?» шуыса юа.

Папалэн принципез ӧвӧл бере, со мамая кариське: удмурт кылын вераськисько каре. Нош зэмзэ учконо ке, кыӵе кылын солы вазиськод, со но сыӵе ик кылын вазе. Соку мама сое «бессознательной попугай» шуыса тышкаське. Папамы милям пуктӥськись, «труженик» шуэ сое мама. Адямиослы я корка, мунчо, я квартира ремонтировать карыны юрттэ. Алнаш палан вордскемын но будэмын. Мамамы – Шаркан палась. Кыкназы ик удмуртъёс, удмурт сямен верасько, но мукет верасько: мамалэн курегез курегпуз пуза, нош папалэн – кукей, мама огреч сылалтэ, нош папа – кияр, мамамы уйин кӧлэ, нош папамы изе. Мамалэн папалы йырыз кур луэ, нош папалэн мамалы вожез потэ. Таӵе дыръя мама папаез пыӵкылэ: «Вожед потэ ке, ӵужкушман си» шуэ, оло, ӵужед, пе, потоз. Нырысьсэ кылыкуз, папа ӵужкушманэз петрушка шуыса кожам. Берло гинэ валам, алнашъёс ӵужкушманэз кешыр шуо шуыса. Табере ачиз но ӵужкушман шуылэ инӥ. Мон ӵужи дорын ӵемгес улылӥсько бере, шаркан сяменгес вераськисько.

Мамамы милям, ятыр дышетскеменыз-а мар-а, котькинэ дышетыны яратэ. Ӵужиез но дышетэмысь уг дугдылы: «Мама, вераськы пиналъёсын удмурт сямен!» шуэ, или «Мама, малы сомында ӟуч кылъёсты поттылӥськод! Удмурт кылъёс вань ук!» Ӵужие тырше, конешно. Куддыръя тыршемез ятыр луэ. Пичи Этееным кутске удмурт сямен вераськыны, собере Эте ӟуч сямен вазе ке, ӵужи но сьӧраз ӟуче выже. Монэным удмурт сямен вераськыкуз, берёза, ёжик, сказка шуэ. Мама тае кылэ ке, «Ну мама! Кызьпу, ӵушъял, выжыкыл кылъёс вань ук!» шуыса куаретэ. Соку ӵужие удмурт кылъёсты но сураса вераны кутске, олокыӵе гинэ газетысь лыдӟем (мукет диалектъёсысь) кылъёсты пыртылэ: коньдон интые уксё шуэ, сик интые нюлэс, трос интые уно. Куддыръя кышканы кутске, нош ик маке но умойтэм вералоз шуыса, соку чиньыеныз возьматъя ини: «Пие, вай ай тӥни сое. Тани тае тани татчы пононо» шуэ.

Юамды потэ, дыр, кызьы мон сыӵе умой удмурт сямен вераськыны дыши? Мон вордскем бере, мамалы бадӟым проектын ужан понна грант сётӥллям. Нош садикысь инты мыным сётӥллямтэ. Озьы монэ ӵужи доры возьманы ыстӥллям. Куинь арес тырмем бере, садикын инты шедем ик. Мон отчы куинь нунал ветлӥськем но зол висьыны усиськем. Куинь толэзь висиськем, ӵужи монэ дораз утялтыса возем. Собере эшшо садике куинь нунал ветлӥськем, нош ик висьыны кутскиськем. Собере садике ӧз ни сётъялэ, школа дорозь гуртын будӥ. Озьы мон тёп-тёп удмурт пияш луи. Туннэ но мамаен-папаен удмурт сямен вераськисько. Мама ассэ тышкаськылэ, монэ пичигес дыръям ӵужие будэтӥз шуыса. Нош эшъёсыныз скайпен вераськыкуз ушъяське, кыӵе мон чебер удмурт сямен вераськисько шуыса. Собере буйга.

Подъездысь потэм бере, мынӥ супермаркетэ. Отысь пельнянь басьтӥ. Отын ик аптека вал, возьматӥ лекарстволэсь, или кызьы мама шуэ эмъюмлэсь, нимзэ. Вузкарись эмъюм но сдачи сётӥз. Малпай киоске ветлыны, отысь дунтэм канфет басьтыны. Мыныкум, нош ик зырыме вияны кутскиз, салфетка сьӧрам кутыны вунэтӥськем. Бӧрсьысь бӧрсьы вить пол туж зол кизьнӥ.

– Эн, пе, сюлмаськы, – шуиз кин ке но вить пол, удмурт сямен, векчи гинэ тумошо куараен.

Мон пайми. Кин татын удмурт сямен вераське? Кин тодэ, мон удмурт сямен валасько шуыса? Котырак учки, нокин но ӧвӧл.

Киоскысь чупа-чупс басьтӥ, бумагазэ кесяса, ымам понӥ.

– Мыным но басьты кампет, – шуиз кин ке. Соку гинэ киоск сьӧрысь мокоез адӟи: мугорыз пичи, быдэсак гоно, гонэз курмемын, гынмемын, ачиз кыӵе ке но погмаськем, курмем ӟустариен биняськемын.

Нырысь малпай, пылэдэн сэрен галлюцинаци адӟи шуыса. Киоск дорысь ӟус вылэ пукси. Моко чукинь-бекинь вамышъяса дорам лыктӥз.

– Сиеме потэ, – шуиз со.
– Кин-о тон? – юай.
– Так-то мон Корка Кузё вал, – шуиз моко, – корка утисе кулӥз, коркаез куашкатӥзы. Коркатэк кыли. Али тани киоскын шунтӥськисько. Киоск Кузё шуод-а мар-а. Но сиёнэз татын лад-лад ӧвӧл: тамак, вина, сима, жвачка. Кырсь, кезьыт!
– А кытысь тодӥд, мон удмурт сямен вераськисько шуыса?
– Ӧй тоды. Мон мукет сямен вераськыны уг быгатӥськы. Адямиослы кема ӵоже вазиськисько ини, нош нокин но пумитам уг вазьы. Тон нырысетӥез, кин мыным удмурт сямен вазиз. … Сиеме потэ, – Киоск Кузё ымам учкиз. Коньдонэ дас манет гинэ кылиз, эшшо одӥг чупа-чупслы уз тырмы. Ымысьтым басьтӥ но курмем моколы сётӥ. Ымаз поныса, хрум-хрум кариз но соку ик ваньзэ сиыса быдтӥз.
– Эшшо сиеме потэ, – шуиз.

Синъёсыз сюлворыса учко, ачиз куалекъя, кынме, видимо. Жаль потӥз.

– Лык сьӧрам, гуртын нокин ӧвӧл, мон тонэ сюдо. Только тазьы мынӥд ке, адямиос паймозы, кин моко озьы мынэ шуыса. Пуксьы рюкзакам. – Мокоез каллен гинэ кунултӥз кутӥ но рюкзакам понӥ, кӧня ке пась кельтӥ, медам ӝока шуыса. Лифтысь потыкум, нош ик куинь пол кизнӥ.
– Эн, пе, сюлмаськы, – шуиз Киоск Кузё рюкзакысь.

Ӧссэ пичияк усьтыса,
– Эн ветлы татӥ заразадэ пазяса, – шуиз Тётя Маня но ӧссэ шальк! гинэ пытсаз.

Гуртэ пырыса, Киоск Кузёез рюкзакысьтым поттӥ. Пельнянь пӧзьтыны ву пуктӥ. Басьтэм эмъюмме юи.

– Фууу, кыӵе дорысьтыд зын потэ! Тонэ ваннаын пылатоно. Только сиськы нырысь.

Пельнянь пӧзем бере Киоск Кузёез ӝӧк сьӧры ӧти. Ӧтисько – уг лыкты, нош ӧтисько – нош уг лыкты. Куинь пол ӧтьыса гинэ лыктӥз.

– Куинь пол ӧтем бере гинэ сиськыны пуксьыны яра, – валэктӥз Киоск Кузё.
– Гулбечын улӥсьёс гинэ озьы малпало, – шуисько. – Кызь одӥгетӥ даурын улӥськом. Куинь пол ӧтемзэс возьмаса улӥд ке, нырдэ ишкалтыса нуозы! – Зэмзэ вераса, мынам кылъёсы та ӧвӧл, Фарида кенак озьы шуыны яратэ.

Кӧт сюманназ Киоск Кузё пельнянез пӧсен ик ым тыросказ туйназ.

Мынӥ ваннае, ву ӝуатӥ, мамалэсь ческыт зын майталзэ понӥ. Киоск Кузё ваннае пуксиз.

– Мын, пот табере, – шуэ, керпотӥсько, пе.

Ваннаысь пыласькем но кырӟам куара кылӥськиз.

– Ма мон табере дӥсялом, – шуиз Киоск Кузё ваннаысь потэмез бере, пол вылысь курмем но зын ӟустариос шоры возьматыса.
– Вить ай, – шуи но мамалэсь шкафсэ усьтӥ. Отысь мунёез поттӥ. Сое мама кытысь ке но Европаысь басьтӥз вал, конференцие ветлыкуз. Мунё вылын – смокинг. Сьӧд, лад-лад вуремын, эшшо бубылиез чыртыяз понэмын. Пыдаз – кулэсь вурем чилясь ботинка. Мугорыз как раз Киоск Кузёлэн быдӟа.

– Ме, – шуи но мунёлэсь дӥсьсэ Кисок Кузёлы ванна ӧсэтӥ мычи.

Кӧня ке улыса, Киоск Кузё ваннаысь потӥз: йырсиез горд вылэм, дӥсез – как раз, дорысьтыз ческыт сяська зын лыктэ.

– Охо! – кеськи. – Табере тон джентельмен! Зэмос английской лорд!
– Кӧлэме потэээ, – нёжтӥз Киоск Кузё.

«Мда» малпасько ас поннам, «ачиз дунне гогы кадь дӥсяськемын, нош сямыз гулбечын улӥсьлэн кадь».

– Мын Этелэн валесаз выд, – шуи. Эте садикын, кемаен уз берт на.

Комнатае мынӥм. Ми Этеен одӥг комнатын кӧласьком. Валесмы кык этажъем. Со вылӥяз кӧла, мон – улӥяз. Киоск Кузёлы вылӥяз валесэ тубыны юрттӥ, ачим улӥяз выдӥ. Умме усемме ӧй но шӧдылы. Эмъюм монэ озьы кӧлытэм, шӧдске.

– Агай! Агай! Смотри, там кто-то есть! – озьы кесяськыса Эте шобретме кыска. Мон ури-бери валесысьтым тэтчи. Эте валесаз тубиз но, Киоск Кузёлэсь шобретсэ ас палаз кыска, нош соиз ас палаз.
– Эте, дугды, дугды, эн кышкаты Киоск Кузёез!
– Кузё?! Кто такой Кузё?!

Соку ваньзэ мади Этелы, кызьы мон туннэ Киоск Кузёен пумиськи.

– Пиос, ма отын дауртӥськоды? Лыктэ сиськыны, – мама ӧсэз усьтӥз.
– Лыктӥськом! Лыктӥськом! – Кеськи мон. Ӧсэз пытсам бере, чиньыме ым дорам матэктӥ.
– Шшш, эн вера мамалы Кузё сярысь номыр но, со асьмелэн секретмы луоз, – шуи Этелы.
– Шшш, – кариз Эте, – со асьмелэн секретмы, – вазиз Эте удмурт сямен.

Тӥни озьы Киоск Кузё огшоры Кузё луиз. Берен кезьыт киоске улляме сое ӧз луы. Собере Эте сюлворыса Кузёез дорамы кельтыны косӥз. Кыл сётӥз, мамалы-папалы номыр уз поттылы шуыса. Кузё, конешно, пумит ӧй вал. Милям Этеен дӥсь ошылон шкафамы Кузёлы ватскон инты лэсьтӥмы, мама яке папа пырыку, Кузё шумприч шкафаз пегӟе. Эте лӧптэмын. Мама паймемысь уг дугды, ма пичи пиеныз луиз шуыса.

Ярам, туннэ понна тырмоз. Синъёсы кынисько ини асьсэ коже. Гожъяськемысь дугдӥсько. Пумиськытозь, тетраде!

Дюрик фонариксэ кысӥз но тетраденыз валче сое миндэр улаз понӥз. Соку ик умме усиз.

(Та верос азьланьтӥськоз на)

Тани тазьы Жанна Валерия Кепич Кузёез суредаз: нырысь со курмича вал, собере чылкыт но джентельмен луиз. Жанна Валериялы 7 арес, улэ Нюрнбергын (Германиын).