Текстэз но туспуктэмъёсыз Светлана Едыгаровалэн.

Таиз яратоно тортмы: ческыт, ӝог но капчи лэсьтӥське, трос оломар но кулэ öвöл. Семьяямы ваньмы яратӥськом та тортэз. Котькыӵе праздниклы но пумиськонлы яралоз. Та тортлэн варинтъёсыз вань: тросгес пыжоно ке, огшоры корж выллем луэ, öжытгес пыжоно ке, брауни (англ. brownie cake) выллем яке мад (англ. mud cake шуо, удм. кылын дэри торт шуыны луоз) выллем луэ. Тросэз та тортэз француз шуыса малпало, но французъёс сое американецъёслэсь басьтӥллям. Мон та тортэз тазьы лэсьтӥсько.

Кулэ луоз

200 гр. сьöд шоколад (70 %)
120 гр. вöй
150 гр. сакыр песок
3 курегпуз
80 гр. пызь
1 пичи пуньы разрыхлитель (Мон разрыхлитель уг понӥськы, озьы тортэ ыльгес пöрме, бруни но мад тортлы тупагес. Семьяе тазьы яратэ.)

Тазьы лэсьтӥсько

Мискае вöез юдӥсько но шоколад тӥяса понӥсько. Сое пичи тыл вылын шунтӥсько, сураллясько. Медам сутскы!

Тани тазьы шунаны кулэ.

Отчы понӥсько сакыр песок но курегпуз, сурасько. Собере пызь понӥсько, нош ик сурасько.

Тортэз пыжисько тани таӵе пиялалэсь лэсьтэм формаын. Мукет материаллэсь но лэсьтэм формаын пыжыны луэ. Сое вöясько но пызь кöня ке пызьнасько, медам лякиськы шуыса. Французъёс озьы каро.

Татчы кисьтӥсько ыльнянез но гурэ понӥсько. Гур 175 °C луыны кулэ. Мынам гуре зол пыже, 15-20 мин. тырмыт луэ, собере эшшо кысэм гурын ог 5 мин. возисько на. Собере öжытгес пыжоно ке, торт ыльгес луэ. Кемагес пыжоно ке, кӧсгес но чурытгес луэ.

Тани таӵе луэ торт гурысь поттэм бере. Ӵемысь тазьы ик сииськом. Куноос дыръя, формаысь басьтыса чеберъясько. Чеберъяны луэ, кылсярысь, узы-борыен, сакыр пудраен, мар ке но суреданы луэ, гожтыны (шуом, вордскем нуналэн ӟечкыласа). Та текстлэн кутсконаз тортэ викториен но сакыр пудраен чебермамын.

Тани татын тортлэн мукет палыз. Та палзэ чеберъясько.

Ческыт мед кошкоз, эшъёс!

Наташа Перевощиковалэн тани таӵе пöрмем. Со тортэз яблок повидлоен но кудымульыен (черникаен) чебермам. Угось, Наташалэн вордскем палъёсаз (Балезино котырын), кудымульы будэ. Нош мынам вордскем палъёсам (Шаркан котырын) уг буды.