Текстэз Светлана Едыгаровалэн

Туспуктэмез татысь: https://www.piqsels.com 

Текст удмурт калык выжыкылъя гожтэмын.

Улэм-вылэм одӥг Ныл. Солэн анаез кулэм, атаеныз кык кузя кылиллям. Атаезлы секыт луэм: пӧрасез ӧвӧл, корка утялтӥсез ӧвӧл, скал кыскыны нокинлы, уриськыны нокинлы. Ачиз воргорон лумбыт колхозын ужа, бертыса пу пильылоно, скал кысконо, вань кышномурт ужез лэсьтоно. Нылыз лумбыт огназ: ӵукна сайкакуз, атаез кошкемын ини, ӝыт кӧлыны выдыкуз, атаез я пудо сюдэ, я пу пильылэ. Гуртын садик ӧвӧл, сьӧрло гуртозь вить километр, – кин сое садике нуллоз-ваёз? Атаез колхозэ вазь кошке, бер бертэ. Озьы Ныл пичи дырысен ик корка утялтыны дышем: пол ӵужем, ву вайылэм, шыд пӧзьтэм. Ӝоген пу но пильылыны, скал но кыскыны дышем.

Чидамтэ воргорон, сьӧрло гуртысь огназ кылем кышномуртэ ваем. Кышномуртлэн аслаз нылыз вылэм ини. Выль корка вуыса, кышномурт коркаез ас сяменыз возьыны кутскем. Кышномуртлэн азьло картэз начальник вылэм, баё улӥллям. Огшоры колхозниклы быземеныз сэрен-а мар-а, туж керӟег луэм кышномурт, ассэ вылтӥ карыса возем. «Мон татчы узыр коркась вуи, тӥ кадь куанеръёс мынэсьтым кылзӥськыны кулэ» шуыса куаретылэм.

Коркаез зэмзэ ик зол возем. Вакчи дыр куспын укное сяськаос потӥллям, занавескаос, корка ӝикытгес луэм, пӧрськем ческытгес, нош воргоронлэн валесэз – небытгес но шунытгес. Кыкназэсты ик нылъёсты бускель гуртысь садике тракторен нуллӥллям-вайылӥллям.

Воргорон капчиен шокчем. Нош Ныл мур куректонэ усем. Сюранаез тае адӟемпотостэм карем, ятыр ужатэм, кузгатылэм: «Кыӵе тон ӝикыттэм! Сынаськытэк тугаськем йырсиен ветлӥськод! Кофтаед но тӥни пась! Ӟеч нылъёс озьы уг ветло! Ӟеч нылъёслэн йырсизы котьку ӝикыт пунэмын, пасьёссы кышъямын. Учкы, кызьы аслам нылы быгатэ, дышетскы солэсь!»

Ныл дышетскиз. Кӧня ке улыса, йырсизэ ачиз туж ӝикыт пуныны дышем, дӥсез котьку ӝикыт, пе, пасьёсыз кышъямын. Нош сюранаез синтэм полёкан кадь весь тышкаське, пе: «Учкы, кыӵе сутьыр-сатьыр гуразьпалэз миськид, кӧня курмемез бервылад кылиз! Учкы, парсь кадь сиськид, няньдэ ӝӧк пасьтана пыргытӥд! Ӟеч нылъёс озьы уг сисько. Учкы, кызьы аслам нылы сиське, одӥг пырыез но ӝӧк вылэ уг усьы! Вот што значит умой воспитание!»

Воспитанной ныл зэмзэ ик туж ӝикыт вылэм, перфекционистка: чебер но ӝикыт дӥсяське, пе, йырсияз котьку гладить карем бантик пунэмын, чебер сиське, валес котырыз котьку валиськемын, миндэрез шуккылэмын-марамын. Гадяз ноку но коё-воё виштыосыз уг луыло, пе, дӥсяз одӥг кышъям интыез но ӧвӧл. Вань шудонъёсыз лад-лад ӝажые тыремын. «Идеальной ныл», – малпам Ныл. – «Мон ке сыӵе луысал!»

Нош Ныл адӟымтэ Идеальной ныллэсь номыре ужатэк улэмзэ. Со котьма борды кутскиськыны кышкам. Кышкам, вдруг солэн ужез уз пӧрмы: пол ӵужыны кутскиз ке, вдруг жагез кылёз, скал кыскыны потӥз ке, вдруг скал сое ӵыжоз. Озьы Идеальной ныл интые Ныл скал кыскем, корка ӵужем, пудо сюдэм, ву вайылэм, сюранаезлэсь вань косъяськемзэ быдэсъям. Котьмар мед ужалоз Ныл, сюранаезлэн кӧтыз уг буйга, пе, котьку маиз ке но уг тырмы.

Одӥг пол азбарысен Ныл ӟезьы сьӧрысь куараосты кылэм.

– Уг тодӥськы, ма кароно та Нылын, – сюранаезлэсь куаразэ тодмам Ныл. – Веть нюлымтэ кунян кадь таиз нылы, олокытысь киосыз будо. Ма борды уг кутскы, ваньмыз тюпыль-тяпыль пӧрме. Кеськыса уг ке вераськы, кылымтэ улэ аналске. Дотово ӝикыттэм, тусьты-пуньызэ миськем вуаз гылтэ! Вань нерваосы быризы ини та Нылэз нодъяннам!
– Ма мон сое туж ужась но ӝикыт кожасько вал, – бускель кышномуртлэсь куаразэ тодмам Ныл, – Солэсь таӵезэ уг тодӥськы вал!

Со нуналэ Ныл вӧтаз. Адӟе, Ныл чапчара гольык гурт кузя мынэ. Гурт калык шораз лек учке, адямиос сяласько шораз, изъёс зӥръяло. Соос Ныллэн мугораз вуо, вӧсь каро, ӵабъяло. Мугорыз лызэктӥз, вирӟектӥз. Учке, шораз пуны туж зол утыса лыктэ, лэчыт пиньёсыз адско, ымысьтыз дыльдыез вия. Тани-тани тэтчоз но Ныллэн гульымаз куртчиськоз!

Ныл шуак сайказ. Идеальной ныл сое зуркатэ:
– Ма озьы кесяськиськод?! Кӧлыны уд сётӥськы, – куаретэ со.

Со дырысен, сюранаез куаретыку, Ныллэн мугорыз косканы кутскылӥз, тани-тани урмем пуны гульымаз куртчиськоз кадь. Умой кӧлэмез ӧз луы ни, киысьтыз ваньмыз усе, йырсиез тугаське, шыдэз гадь вылаз киське.

Одӥг уе инмын яркыт, тыр толэзь ӝутскиз. Ныллэн умме усемез уг луы. Тодаз лыктӥз, ӵуказелы ву вайыны вунэтэм. Валесысьтыз султыса, кӧлон дэрем вылаз фуфайка дӥсяз, кышет керттӥз, гольык пыдаз гынсапег понӥз, ведра но карнан кутӥз. Муночоазьысь тӥр кутӥз на. Бакча сьӧры потӥз.

Сьӧд уез яркыт тыр толэзь югдытэ. Лымы тыр толэзьлэн югытаз чиля. Куазь ӟырт кезьыт. Карнанэн Ныл лымыетӥ лёгем сюрес кузя мынэ. Гынсапег улын лымы ӟырк-ӟырк вазе. Куара кыдёке кылӥське. Лымыен но йӧэн шобырскем тымет. Лёгем сюрес мунчо доры нуэ. Люкмес, татын нуназе кышноос гылъясько. Люкмес йӧэн кортнамын. Ныл йӧэз тӥрен кора. Тӧдьы лымыын сьӧд ву. Отысь Ныл шоры тыр толэзь учке. Одӥгеныз ведраеныз ву омыртэ, ведра киысьтыз гылӟе но вуэ вые. Мукетыныз омыртэ, таиз но вуэ вые. Карнанэныз ведразэ кутыны выре, карнанэз но вуэ вые. Огшап ныл сьӧд вуэ учке. Ву пушказ кыске.

Ныл султэ. Шокче. Ымысьтыз шуныт пар потэ. Кышетсэ кыле. Пунымтэ йырсиез пельпум вылаз усе. Фуфайкаысьтыз бирдызэ пертчылэ. Фуфайка лымы вылэ усе. Егит ныл тӧдьы дэремен сьӧд люкмес дурын сылэ. Гынсапеген. Дэрем пыр гольык мугорыз чильпыра. Одӥгзэ сапегзэ кыле, гольык пыд лымы вылэ султэ. Мукетыз пыд кезьыт лымы вылэ лёгиське. Сьӧд инмын тӧдьы толэзь пиштэ.

Ныл катьтэммыса вуэ усе.

«Дугды! Дугды!» куара кылӥське.

Ныл вуын. Ву улын пеймыт ӧвӧл. Кезьыт но ӧвӧл. Кышкыт но ӧвӧл. Татын ик вердраосыз, карнанэз. Тодмотэм адямиос дортӥз кошко, шораз пальпотыса учко. Тӥни палэнынгес анаез ортче. Пальпотэ, Нылызлы киыныз шона. Лек пуны интые мусо кучапи Ныллэн пыд бордаз маялляське. Малпамтэ шорысь кин ке но туж зол йырситӥз кыске.

Ныл лымы вылын кылле. Кот дэремен. Куазь лымыя. Ныл уг кынмы. Пушказ шуныт. Пальпотэ.

Ныл куать толэзь больницаын кыллиз. Кема дыр ӵоже йырсазьтэк улӥз. Йырсазьыз берытскем бере, солы мадизы, вуэ усемзэ бускель воргорон адӟем шуыса. Бускель воргорон со ӝытэ семьяеныз мунчое ветлэм вылэм. Уйин тодаз лыктэм, мунчое чильымзэ вунэтэм шуыса. Тӥни озьы уйшоре мунчое мыноно кариськем со. Мыныкуз адӟем, кин ке но люкмесэ тэтчем. Бызьыса вуэм но, Нылэз йырситӥз кыскыса поттэм. Нылэз фуфакае биньыса гуртаз ваем. Кышноез скороез ӧтем. Нылэз скороен больницае нуиллям.

«Нош кин мыным «Дугды!» шуыса кеськиз?», – малпа Ныл, больницаысь койка вылын кылльыкуз. Укное учкиз, кырын пеймыт, тыр толэзь Ныллэсь валессэ югдытэ.

– Тон, тон озьы кеськид! – вазиське Ныл Толэзьлы. – Толэзь пальпотэ.
– Тон монэ быронлэсь утид! – Толэзь пальпотэ.

Малпамтэ шорысь Ныл Толэзьысь Карнанэн нылэз адӟиз. Кема учкиз шораз, собере пальпотӥз но киыныз шоназ. Карнанэн ныл но Ныллы киыныз шоназ.

Ныл бурмиз, юнмаз. Дораз бертыса, сӥзьыл куазь вуэм бере, городэ дышетскыны кошкиз. Дырын-дырын, пеймыт уйёсы эшезлы вазиськылӥз. Соку мылкыдыз буйгалляз, мугорыз шунытэн пачылмылӥз.

Ныл Кышномурт луиз, яратӥсь карт шедьтӥз, пинал вордӥз. Ӟеч кылъёсыныз картсэ но пиналъёссэ шунтылӥз. Нош Толэзьысь Карнанэн ныл егит нылъёсты эскериз-утиз.