Гожтӥз но туспуктылӥз Светлана Едыгарова. Нырысетӥез туспуктэм Pexels.com сайтысь.

Лымшор (южной) удмуртъёс понна кешырен торт, нош кылем удмуртъёс понна ӵужкушманэн торт.

Ӵужкушманэн торт трос странаосын тодмо. Финляндиын та тортэз туж ярато, сое котькуд кафеысь шедьтыны луэ, финн сямен сое porkkanakakku (porkkana “кешыр” но kakku “торт”) шуо. Ӵемысь сое кекс выллем лэсьто (нырысетӥ туспуктэм вылын кадь). Та тортэз вань семьяе яратэ. Именикъёсы но мукет праздникъёсы котьку ачим лэсьтӥсько. Шумпотыса гожтӥсько, кызьы сое лэсьтоно. Лэсьтонэз ӝог но капчи.  

Кулэ луоз

200 гр. сакыр песок

120 гр. вöй

3 курегпуз

300 гр. пызь

1 пичи пуньы разрыхлитель

1 пичи пуньы изэм корица

0,5 пичи пуньы изэм имбирь

0,5 пичи пуньы изэм кардамон

0,25 пичи пуньы изэм гвоздика

2 пичи пуньы лимонлэн вуштэм кӧмыз (цедра)

4-5 шоро-куспо ӵужкушман-кешыр

Эшшо пушмульы поныны луэ на, кылсярысь, грецкой пушмульы. Но мыным пушмульыен кӧс потэ.

Кремез

200 гр. сливочной сыр (кылсярысь, туспуктэмын «Филадельфия». Кинлэн луонлыкез ӧвӧл таӵе сыр басьтыны, учке ютюбысь, кызьы сое лэсьтоно, «сливочный сыр для кремов и чизкейка» шуыса утчалэ)

50 гр. вӧй

100 гр. сахарной пудра (яке огшоры сакыр песок)

1 пичи пуньы лимонлэн вуштэм кӧмыз (цедра)

1 сиськон пуньы лимонлэн сокез

Лимонлэсь соксэ но песок асьтэ мылкыддыя поныны луэ. Мон яратӥсько чырс шӧмез, соин лимонлэсь соксэ тросгес понӥсько, нош песоксэ ӧжытгес поныны тыршисько.

Тазьы лэсьтӥсько

Вӧез шунатоно. Ӵужкушманэз вуштоно.

• 

Курегпузэз песокен шукконо, мон миксерен шуккисько.

Пызе пононо разрыхлитель, корица, имбирь, кардамон, гвоздика. Сурано.

Специосын пызез шуккем курегпузэн сурано. Отчы вуштэм ӵужкушман пононо, лимонлэсь кӧмзэ отчы ик вуштоно, но пумаз шунатэм вӧй пононо. Ваньзэ умой сурано.

Ыльнянез пыжиськон тэркые кисьтоно. Мон сое вӧясько но пызен пазясько, медам лякиськы шуыса.

Пыжоно 180 градусын 30 минут котыр. Мынам семьяе уг яраты кӧс тортъёсты, соин мон вазьгес басьтӥсько.

Тани тазьы пыжем корж адӟиське. Таязэ корже кӧня ке лякиськиз.

Кремзэ тазьы лэсьтӥсько

Сливочной сыре сакыр, шунатэм вӧй, лимонлэсь вуштэм кӧмзэ но соксэ понӥсько но фенчикен ӝог-ӝог сурасько комокъёсыз бырытозь. Соин тортэз зырасько. Кремен зыран азьын корж сӥямын луыны кулэ.

Чеберъясько. Торт дась!  

•