Текстэз но туспуктэмъёсыз Светлана Едыгаровалэн.

Мадленъёс (яке француз сямен madeleines) – со француз печення. Рецептэз пӧртэм луыны быгатэ, но огазея соосты та печеннялэн вылтусыз – со куалялюльылы яке зарезьысь ракушкалы тупа. Франциын котькуд магазинын соосты вузало. Туж умой пиналъёслы полдниклы сюдыны яке кытчы ке мыныку сьӧре кутыны. Та печенняез туж капчи но ӝог лэсьтыны. Куке дыры вань, пиналъёслы полдниклы лэсьтӥсько. Пиналъёслэн асьсэ коже но луоз лэсьтэмзы.

Кулэ луоз

2 бадӟым курегпуз (яке 3 пичи)
150 гр. песок
150 гр. пызь
125 гр. вӧй
1 пичи пуньы разрыхлитель
лимонлэн цедраез (кинлы кызьы яра)

Тазьы лэсьтӥсько

Нырысь ик курегпузэз песокен сурано, мон огшоры венчикен сурасько.

Собере отчы пызь, разрыхлитель, лимон цедра но шунатэм вӧй пононо. Сурано. Ыльнянь дась!

Дась ыльнянез формае тыроно. Мынам юри мадленъёсты пыжон силиконовой формае вань, тани таӵе куалялюльылы тупась формаос. Тае свекровкае сётӥз. Та формаез мон уг вӧяськы. Мукет форма но кутыны луэ, соку сое вӧйын зырано, медам лякиськы шуыса.

Та формае ыльнянез ӧжыт гинэ понӥсько, пыжыкуз со ӝутскоз. Тани таӵе адӟиське ыльнянь. Сое гурын 180 ºC ог 10 минут пыжоно.

Нош таиз пыжем бере.

Мукет палыз тани таӵе адӟиське.

Куддыръя ыльняне кынтэм узы-боры понӥсько, ӵемысь со кудымульы (черника). Со сяна, шоколад пырыос, яке мукет чеберъян поныны луэ. Ческыт мед кошкоз, эшъёс!