Нимы Светлана Едыгарова. Тросэз монэ Светӥ шуо. Вордски Шаркан районысь Гондырвай гуртын. Улӥ Пороз гуртын. Укмысэтӥ класс бере Иже Гуманитарной лицее дышетскыны кошки.

Вообще-то, мынам кинорежиссёр луэме потэ вал. Пермысь культурая институтэ но ветлэме вань. Но экономической кризисэн сэрен-а мар-а, оло мукет муген, удмурт филологие пыри. Нырысь малпай вал, одӥг арзэ дышетско но, нош ик режиссёре мыно шуыса. Озьы ӧз пӧрмы, татчыозь удмурт кылын вырисько!

Нырысь литература тунсыко потэ вал. Удмурт Институтысь аспирантурае но литературая темаен пыри вал, удмурт филологиез быдтэм бере. Финн-угор кылъёсы берыктэм удмурт поэзиез эскерыны малпасько вал. Малпай, кылбуръёс кузесь ӧвӧл, лыдӟиськонэз трос ӧвӧл, ӝог гинэ диссертация гожто. Кожай, литература сярысь вераськыны капчи, визьмо ымнырын оломар зулид-марад но, вот тыныд литературной анализ дась!

Собере Удмуртиысь кошки. Таберезэ Тартуысь докторантурае (аспирантурае) пыри. Аго Кюннап профессорлэн* лекцияз ветлӥ но, литература лингвистикаен ӵошатыса туж несерьёзной потӥз, но кема малпаськытэк лингвистикае выжи. Озьы мон лингвист луи.

Диссертациме удмурт кылысь асъян (притяжательной) категория сярысь гожтӥ; удмурт суффиксъёсты но синтаксисэз эскери. Берло дасо арзэ Хельсинки университетын ужасько, табере тросгес социолингвистикаен вырисько, кыл варьированиез эскерисько.

Табере литература сярысь мукет сямен малпасько. Суффиксъёс суффиксъёсын, нош литература – со кыллэн энергиез-кужымез, литература – со кыллэн лулыз. Оло соин но туж зол удмурт сямен гожъяськем потыны кутскиз: трос аръёс ӵоже удмурт суффиксъёсты эскерем бере, кылъёслэсь но суффиксъёслэсь кылдытэм кужымзэс шӧдэм-эскерем потэ табере.

Али семьяеным Хельсинкиын улӥсько.

* Аго Кюннап профессор Тарту университетысь финн-угор кылъёсъя кафедралэн кема аръёс ӵоже кивалтӥсез вал. Ачиз самоед кылъёсты эскериз, сӥё-дано тодосчи, али пенсиын ини.